كوممۋنيكاسيا جەلىلەرىن تارتقاننان كەيىن قازاقستاندىقتارعا 10 سوتىق جەر تەلىمىن تاراتۋدا ەش قيىندىق بولمايدى.
بۇل تۋرالى سەنات ءتوراعاسى ماۋلەن اشىمبايەۆ ايتتى، دەپ حابارلايدى Almaty-akshamy.kz
سەناتتىڭ جالپى وتىرىسىنان كەيىن تىلشىلەر پالاتا ءتوراعاسىنان قازاقستاندىقتاردىڭ 10 سوتىق جەردى الۋعا بەلسەندى تۇردە قۇجات تاپسىرۋىنا قاتىستى سۇراق قويدى.
«جەكە ءوز باسىم جەر تەلىمىنە ءوتىنىم بەرگەن جوقپىن. اتاپ ايتقاندا، جەر ۋچاسكەسىنە ءوتىنىم بەرۋگە ءار ازامات قۇقىلى. نەگىزى، ەلىمىزدە جەر بارشىلىق، بۇل تۇرعىدا ادامدارعا دۇرىس ءتۇسىندىرۋ كەرەك. قازاقستان اۋماعى اۋقىمدى، تەرريتوريا جەتكىلىكتى، 10 سوتىق تەلىمنەن قازاقستان ازاماتتارىنا تاراتۋعا بولادى. مەنىڭ ويىمشا، ءبىز وسىعان بىرتىندەپ كەلەمىز. دەگەنمەن بۇل جەر تەلىمدەرىنە كوممۋنيكاسيالاردى تارتۋ ماسەلەسى بار. ول جەرلەردە جولدار، ەلەكتر جارىعى، سۋ، كارىز جۇيەسى بولعانى ءجون»، - دەدى م. اشىمبايەۆ.
وسى ورايدا ول ينجەنەرلىك جەلىلەرگە قاتىستى ماسەلە بار ەكەنىن، بۇل باعىتتاعى تاقىرىپتاردى دەپۋتاتتار كوتەرىپ جۇرگەنىن ايتتى.
«جىل سايىن كوممۋنيكاسيانى تارتۋعا ءتيىستى قاراجات ءبولىنىپ جاتىر، بۇل جۇمىستار جالعاسا بەرەدى. سوندىقتان كەزەڭ-كەزەڭمەن اكىمدىكتەر، ۇكىمەت اتالعان ماسەلەلەردى شەشىپ، ءبىزدىڭ ازاماتتار قاجەتتى جەر تەلىمدەرىن جەكە تۇرعىن ءۇي قۇرىلىسىنا الادى دەپ سانايمىن»، -دەدى سەنات ءتوراعاسى.
ەسكە سالا كەتەيىك، قازاقستاندىقتار ەندى جەكە تۇرعىن ءۇي قۇرىلىسىنا جەر الۋ ءۇشىن eGov.kz پورتالى ارقىلى كەزەككە تۇرا الادى.