ازيا-تىنىق مۇحيتى جانە «جىبەك جولى» حالىقارالىق ماتەماتيكالىق وليمپيادالارى باستالدى، دەپ حابارلايدى Almaty-akshamy.kz.
ەل نامىسىن ءار وڭىردەن قاتىساتىن 157 وقۋشى قورعايدى. ولار «ماتەماتيكا» ءپانى بويىنشا رەسپۋبليكالىق وليمپيادانىڭ وبلىستىق كەزەڭ جەڭىمپازدارى مەن جۇلدەگەرلەرى. ۇيىمداستىرۋشىلاردىڭ ايتۋىنشا، زياتكەرلىك جارىستار ماتەماتيكا عىلىمدارى سالاسىنداعى دارىندى وقۋشىلاردى انىقتاۋعا، شاراعا قاتىسۋشى ەلدەر اراسىندا حالىقارالىق ءبىلىم بەرۋ جانە عىلىمي بايلانىستاردى دامىتۋعا باعىتتالعان.
«قازاقستاننان بۇل وليمپيادالارعا جىل سايىن 120-دان اسا وقۋشى قاتىسادى. 2003 جىلدان باستاپ ءبىزدىڭ وليمپياداشىلار 65 التىن، 182 كۇمىس جانە 302 قولا مەدال جەڭىپ الدى»، - دەيدى «دارىن» رعپو زياتكەرلىك ءىس-شارالاردى ۇيىمداستىرۋ جانە حالىقارالىق ىنتىماقتاستىق ءبولىمىنىڭ مەڭگەرۋشىسى اباي دۇيسەن.
ايتا كەتەيىك، ازيا-تىنىق مۇحيتى حالىقارالىق وليمپياداسىنا ارگەنتينا، اۆستراليا، كانادا، گونكونگ، يندونەزيا، جاپونيا، قازاقستان، كورەيا، مالايزيا، اقش، تۇركيا، مەكسيكا سەكىلدى 38 ەل قاتىسادى.
ال «جىبەك جولى» وليمپياداسىندا ۇلى جىبەك جولى بويىندا ورنالاسقان ەلدەردىڭ دارىندى وقۋشىلارى جارىسادى.