پوليسەيلەر 250-دەن استام ەرلىك ارەكەتتەر جاساپ، 400-گە جۋىق ادامنىڭ ءومىرىن ساقتاپ قالدى
ىىم-دە قىزمەت بابىندا ەرلىك تانىتىپ، بورىشىن ابىرويمەن اتقارعان پوليسيا قىزمەتكەرلەرىنە قۇرمەت كورسەتىلدى، دەپ حابارلايدى Almaty-akshamy.kz Polisia.kz سايتىنا سىلتەمە جاساپ.
قارۋلى قىلمىسكەرلەردى ۇستاۋ كەزىندەگى جانقيارلىعى جانە ادام ءومىرىن اجالدان اراشالاۋ بارىسىنداعى جەدەلدىگى ءۇشىن ۆەدومستۆو باسشىسى مارات احمەتجانوۆ ارىپتەستەرىنە العىس ءبىلدىردى.
«قازاقستاندىق پوليسيا تاريحىندا ءبىز ماقتان تۇتاتىن باتىرلىقتىڭ مىسالدارى كوپ. سوڭعى جىلداردىڭ وزىندە پوليسەيلەر 250-دەن استام ەرلىك ارەكەتتەر جاساپ، 400-گە جۋىق ادامنىڭ ءومىرىن ساقتاپ قالدى»، – دەدى ىشكى ىستەر ءمينيسترى.
شىمكەنت قالاسى پوليسيا دەپارتامەنتى تۇران اۋدانى پوليسيا باسقارماسىنىڭ جەدەل ۋاكىلى ارمان ءارىپجانوۆ پەن جامبىل وبلىسى پوليسيا دەپارتامەنتى سارىسۋ اۋدانى پوليسيا ءبولىمىنىڭ جەدەل ۋاكىلى بەكەن قونىسوۆ ءىى دارەجەلى “ايبىن” وردەنىمەن ناگرادتالدى. 20 اقپاندا ارمان ءارىپجانوۆ ءوز ومىرىنە ءقاۋىپ تونگەنىنە قاراماستان، شىمكەنت قالاسىنداعى قارۋ-جاراق دۇكەنىنە قاراقشىلىق شابۋىل جاساعان كۇدىكتىنى ۇستادى.
«سول كۇنى ارىپتەسىم ەكەۋمىز بەينەباقىلاۋ كامەرالارىن قاراپ جۇرگەن ەدىك. قارۋ دىبىسىن ەستىگەن ساتتە دەرەۋ سىرتقا جۇگىرىپ شىقتىم. وقۋشىلار مەن ستۋدەنتتەر وتە كوپ بولدى. سولاردىڭ ءبارىن شەتكە شىعۋعا ءوتىنىپ، قارۋلى ازاماتتىڭ ارتىنان ءجۇرىپ وتىردىم. قولايلى ءساتتى كۇتىپ، اۆتوكولىكتىڭ ماڭىنا كەلىپ، قويان-قولتىق ۇرىس ءتاسىلىن قولدانىپ، قارۋىن تارتىپ الدىم. ەشقانداي قورقىنىش بولعان جوق. سەبەبى ءبىرىنشى ورىندا ادامداردىڭ قاۋىپسىزدىگىن ساقتاپ، قىلمىسكەردى قولعا ءتۇسىرۋ بولدى»، – دەدى شىمكەنت قالاسى پد تۇران اۋدانى پوليسيا باسقارماسىنىڭ جەدەل ۋاكىلى.
ال بەكەن قونىسوۆ 19 اقپان كۇنى جامبىل وبلىسى جاڭاتاس قالاسىندا قارۋلى قىلمىسكەرلەردىڭ قىلمىستىق ارەكەتىنىڭ جولىن كەسۋ كەزىندە باتىلدىق پەن ەرلىك تانىتتى.
«قوعامعا ءقاۋىپ ءتونىپ تۇرعاندىقتان، ەشقانداي قيىندىققا قاراماستان، قىلمىسكەردى توقتاتۋعا تىرىستىق. ارىپتەستەرىممەن بىرلەسكەن جۇمىستىڭ ناتيجەسىندە ول قولعا ءتۇستى»، – دەدى جامبىل وبلىسى پد سارىسۋ اۋدانى پوليسيا ءبولىمىنىڭ جەدەل ۋاكىلى.
سونداي-اق بۇل كۇنى تاراز قالاسىندا بەس ادامنان تۇراتىن وتباسىنى گازبەن ۋلانۋدان قۇتقارعان كامەلەتكە تولماعاندار ءىسى جونىندەگى ۋچاسكەلىك پوليسيا ينسپەكتورى الىشەر ەرمەكوۆ ماراپاتتالدى. وعان “قۇقىق ءتارتىبىن قامتاماسىز ەتۋگە قوسقان ۇلەسى ءۇشىن” مەدالى تابىستالدى.
«وقيعا 6 ناۋرىز كۇنى كەشكى ۋاقىتتا ورىن الدى. كەزەكشىلىككە شىققان كەزىمدە №22 مەكتەپ ديرەكتورىنىڭ ورىنباسارى ەلميرا اجىبەك قىزى ماعان حابارلاستى. ول ەكىنشى سىنىپ وقۋشىسىنىڭ ساباققا سەبەپسىز كەلمەگەنىن، اتا-اناسىنىڭ بايلانىسقا شىقپاعانىن ايتتى. ءمان-جايدى ءبىلۋ ءۇشىن ءبىز بالانىڭ ۇيىنە باردىق. كورشى ءۇيدىڭ قورشاۋى ارقىلى كىردىك. تەرەزەنىڭ الدىندا كىشكەنتاي بالا جاتتى. دەرەۋ تەرەزەنى اشىپ، ىشتەگى ادامداردى سىرتقا شىعاردىق. گاز بەن جارىقتى سوندىردىك. ازاماتتارعا العاشقى كومەك كورسەتىپ، كەيىن جەدەل جاردەم ماماندارىنا تاپسىردىق»، – دەدى تاراز قالاسى پب 2ء-شى پوليسيا ءبولىمىنىڭ كامەلەتكە تولماعاندار ءىسى جونىندەگى ۋچاسكەلىك پوليسيا ينسپەكتورى.
ءتارتىپ ساقشىسىمەن بىرگە بولعان تارازدىق №22 ورتا مەكتەپ ديرەكتورىنىڭ ورىنباسارى ەلميرا ەسەلبايەۆا دا ماراپاتقا يە بولدى. ۇستازدى جامبىل وبلىسى پوليسيا دەپارتامەنتىنىڭ باسشىسى قۇتتىقتادى.
ايتا كەتۋ كەرەك، اجالدان امان قالعان وتباسى مۇشەلەرىنىڭ ءومىرى مەن دەنساۋلىعىنا بۇگىندە ەشقانداي ءقاۋىپ جوق. ۇيلەسىمدى جانە جەدەل ءىس-قيمىلداردىڭ ارقاسىندا قۇتقارىلعان جانۇيانىڭ وتاعاسى ءوز العىسىن ءبىلدىردى.
«كورەتىن جارىق ساۋلەسى بار ەكەن» دەپ جاتادى عوي. وسى كىسىلەردىڭ ارقاسىندا ءبىر ەمەس، بەس بىردەي ادامنىڭ ءومىرى قۇتقارىلدى»، – دەدى باقىتجان بايتاسوۆ.