ەكونوميكالىق ىنتىماقتاستىق جانە دامۋ ۇيىمى (ەىدۇ) ءبىلىم الۋشىلاردى باعالاۋ جونىندەگى PISA-2022 حالىقارالىق باعدارلاماسىنىڭ ناتيجەلەرىن جاريالادى، دەپ حابارلايدى Almaty-akshamy.kz.
وندا 81 مەملەكەتتەن قاتىسقان 15 جاستاعى ءبىلىم الۋشىلاردىڭ ماتەماتيكالىق، وقۋ جانە جاراتىلىستانۋ ساۋاتتىلىعىنىڭ دەڭگەيى باعالاندى. بۇل تۋرالى ق ر وقۋ-اعارتۋ ءمينيسترى حابارلادى.
قازاقستاندىق وقۋشىلار جاراتىلىستانۋ ءپانى بويىنشا ءوز كورسەتكىشتەرىن 26 ۇپايعا كوتەردى. سول ارقىلى قاتىسۋشى مەملەكەتتەر اراسىندا ەڭ جوعارى وسىمگە قول جەتكىزدى جانە ماتەماتيكا مەن وقۋ كورسەتكىشتەرىن ەىدۇ-نىڭ سەگىز ەلىمەن بىردەي دەڭگەيدە ساقتاپ قالدى. بۇل قازاقستاننىڭ ماتەماتيكا جانە جاراتىلىستانۋ بويىنشا توپ-50 ەلدىڭ ىشىنە كىرۋىنە مۇمكىندىك بەردى.
قازاقستان 81 ەلدىڭ ىشىندە ماتەماتيكادان 46-شى (2018 ج. 54-ورىن)، وقۋدان 61ء-شى ورىن (2018 ج. 69-شى)، جاراتىلىستانۋ ءپانى بويىنشا 49-شى ورىندى (2018 ج. 69-شى) يەلەندى.
ايتا كەتۋ كەرەك، PISA-2022 ناتيجەلەرى بويىنشا ەلىمىزدەگى قالا مەن اۋىلدىق جەرلەردەگى وقۋشىلار اراسىنداعى ءبىلىم ساپاسىنىڭ الشاقتىعى ازايعانى بايقالادى. وقۋ-اعارتۋ ءمينيسترى عاني بەيسەمبايەۆتىڭ ايتۋىنشا، وتاندىق ءبىلىم سالاسىنىڭ دامۋى ءبىرقاتار فاكتورلارعا بايلانىستى.
«مەملەكەت باسشىسىنىڭ ءبىلىم بەرۋ جۇيەسىنە ۇزدىكسىز كورسەتىپ كەلە جاتقان جان-جاقتى قولداۋىنىڭ ارقاسىندا وسىنداي كورسەتكىشتەرگە قول جەتكىزىلدى. پەداگوگ مارتەبەسىن ارتتىرۋ، جالاقىنى كوبەيتۋ، قوسىمشا ءبىلىم بەرۋدى، ينفراقۇرىلىمدى دامىتۋ، بالالارىمىز ءۇشىن ءقاۋىپسىز جانە جايلى ورتانى قامتاماسىز ەتۋ شارالارى ءبىلىم ساپاسىن ارتتىرۋعا تىكەلەي اسەر ەتەدى. ءبىلىم سالاسىن دامىتۋداعى مەملەكەتتىك ۇستانىمنىڭ دۇرىستىعى ايقىندالدى. وسى باعىتتاعى جۇمىستى كۇشەيتە تۇسكەن ءجون»، - دەدى مينيستر.
ايتا كەتۋ كەرەك، وقۋ-اعارتۋ مينيسترلىگى حالىقارالىق تاجىريبەنى ەسكەرە وتىرىپ، ءبىلىم بەرۋ ساپاسىن ودان ءارى ارتتىرۋ ءۇشىن 5 نەگىزگى باعىت بويىنشا جۇيەلى جۇمىستار جۇرگىزۋدە. اتاپ ايتساق، "ءبىلىم بەرۋدەگى وزگەرىستەردىڭ 1000 كوشباسشىسى" كادرلىق رەزەرۆىن قالىپتاستىرۋ جانە مەنەدجمەنتتى نىعايتۋ؛ 21 عاسىرداعى داعدىلار مەن قۇزىرەتتەردى دامىتۋ ءۇشىن وقۋ باعدارلامالارىن جاڭارتۋ، اۋىل مەكتەپتەرىن قولداۋ جونىندەگى كەشەندى باعدارلامانى ىسكە اسىرۋ؛ دايىندىق تاسىلدەرىن جەتىلدىرۋ، پەداگوگتەردى قايتا دايارلاۋ جانە بىلىكتىلىگىن ارتتىرۋ؛ "جايلى مەكتەپ" ۇلتتىق جوباسى شەڭبەرىندە جاڭا مەكتەپتەر سالۋ، قالعان ءبىلىم وشاقتارىن جاڭعىرتۋ، ينفراقۇرىلىمىن دامىتۋ؛ ساپانى باعالاۋدىڭ ۇلتتىق جۇيەسىن ترانسفورماسيالاۋ. بۇل شارالاردىڭ بارلىعى بيىل ۇكىمەت قاۋلىسىمەن بەكىتىلگەن «مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋدى دامىتۋدىڭ 2023-2029 جىلدارعا ارنالعان تۇجىرىمداماسىندا» قامتىلعان.