اقپارات جانە قوعامدىق دامۋ مينيسترلىگى «ماسس-مەديا تۋرالى» زاڭ جوباسىنىڭ تۇجىرىمداماسىن ازىرلەدى.
زاڭ بۇقارالىق اقپارات قۇرالدارى سالاسىنداعى قوعامدىق قاتىناستاردى رەتتەيدى، تەلەراديو حابارلارىن تاراتۋ سۋبەكتىلەرىنىڭ قۇقىقتارى مەن مىندەتتەرىن جانە كونستيتۋسياعا سايكەس بۇقارالىق اقپارات قۇرالدارى بوستاندىعىنىڭ مەملەكەتتىك كەپىلدىكتەرىن بەلگىلەيدى، دەپ حابارلايدى Almaty-akshamy.kz.
قۇجاتتا اتاپ وتىلگەندەي، ءسوز، شىعارماشىلىق، ءوز كوزقاراستارى مەن سەنىمدەرىن باسپا جانە وزگە دە نىساندا ءبىلدىرۋ، اقپاراتتى زاڭمەن تىيىم سالىنباعان كەز كەلگەن تاسىلمەن الۋ جانە تاراتۋ بوستاندىعىنا ق ر كونستيتۋسياسى كەپىلدىك بەرەدى.
سەنزۋراعا تىيىم سالىنادى.
مەملەكەتتىك ورگاندار، قوعامدىق بىرلەستىكتەر، لاۋازىمدى ادامدار، ماسس-مەديا ءاربىر ازاماتقا ءوزىنىڭ قۇقىقتارى مەن مۇددەلەرىن قوزعايتىن قۇجاتتارمەن، شەشىمدەرمەن جانە اقپارات كوزدەرىمەن تانىسۋعا مۇمكىندىك بەرۋگە مىندەتتى.
بۇل رەتتە بۇقارالىق اقپارات قۇرالدارى تەرروريزمگە قارسى ءىس-قيمىلدى جۇزەگە اسىراتىن مەملەكەتتىك ورگاندارعا جاردەمدەسۋگە مىندەتتى.
بۇقارالىق اقپارات قۇرالدارىنىڭ نەگىزگى پرينسيپتەرى:
- اقپاراتتى ەركىن الۋ جانە زاڭداردا تىيىم سالىنباعان كەز كەلگەن تاسىلمەن تاراتۋ قۇقىقتارىنىڭ كونستيتۋسيالىق كەپىلدىكتەرىن، ءسوز جانە شىعارماشىلىق بوستاندىعىن قامتاماسىز ەتۋ؛
- جەكە تۇلعانىڭ، قوعامنىڭ جانە مەملەكەتتىڭ اقپاراتتىق ەگەمەندىگى مەن اقپاراتتىق قاۋىپسىزدىگىن قامتاماسىز ەتۋ؛
- جەكە جانە زاڭدى تۇلعالار قۇقىقتارىنىڭ تەڭدىگى؛
- تاراتىلاتىن اقپاراتتىڭ زاڭدىلىعى مەن دۇرىستىعىن قامتاماسىز ەتۋ؛
- وبەكتيۆتىلىكتى قامتاماسىز ەتۋ؛
- بۇقارالىق اقپارات قۇرالدارىنىڭ، جەكە جانە زاڭدى تۇلعالاردىڭ قىزمەتتەرىن تۇتىنۋشىلاردىڭ قۇقىقتارى مەن زاڭدى مۇددەلەرىن قورعاۋ؛
- بۇقارالىق اقپارات قۇرالدارىن دامىتۋ ءۇشىن تەڭ مۇمكىندىكتەردى قامتاماسىز ەتۋدە كورىنەتىن ادال باسەكەلەستىك؛
- قازاقستان اۋماعىندا تەلەراديو حابارلارىن تاراتۋ سالاسىنداعى ۇلتتىق ستاندارتتار نەگىزىندە تەلەراديو حابارلارىن تاراتۋ سالاسىنداعى قاۋىپسىزدىكتى، سەنىمدىلىكتى جانە ساپانى قامتاماسىز ەتۋ؛
- وتاندىق تەلە-راديوارنالاردى دامىتۋ، وتاندىق تەلە- راديوباعدارلامالاردى شىعارۋ جانە تاراتۋ ءۇشىن جاعدايلار جاساۋ؛
- بۇقارالىق اقپارات قۇرالدارى سالاسىنداعى قىزمەتتىڭ جاريالىلىعى مەن اشىقتىعى.
- كاسىبي جانە ەتيكالىق مىنەز-قۇلىق نورمالارىن ساقتاۋ؛
- ازاماتتىڭ جەكە ءومىرىن، ار-نامىسىن، قادىر-قاسيەتىن قۇرمەتتەۋ؛
- اقپاراتقا تەڭ قول جەتكىزۋدى قامتاماسىز ەتۋ؛
- وتاندىق بۇقارالىق اقپارات قۇرالدارىنىڭ باسەكەگە قابىلەتتىلىگىن ىنتالاندىرۋ؛
- قوعامدىق قاۋىپسىزدىكتى قامتاماسىز ەتۋ.
اقدم تۇسىندىرگەندەي، قولدانىستاعى «بۇقارالىق اقپارات قۇرالدارى تۋرالى» زاڭ تۇبەگەيلى ەسكىرگەن، قازىرگى زاماننىڭ سىن-تەگەۋرىندەرىنە سايكەس كەلمەيدى جانە بۇقارالىق اقپارات قۇرالدارى سالاسىنداعى قوعامدىق قاتىناستاردىڭ قازىرگى زامانعى تالاپتارىن تولىق قاناعاتتاندىرمايدى. سوندىقتان ءسوز بوستاندىعى قۇقىعىن نىعايتۋعا جانە قامتاماسىز ەتۋگە باعىتتالعان، سونداي-اق بۇل قۇقىقتى، ەڭ الدىمەن، عالامتور جەلىسىنىڭ قازاقستاندىق سەگمەنتىندە شەكتەۋ شارتتارىن قامتيتىن مەملەكەتتىڭ جاڭا قاعيداتتارى مەن كەپىلدىكتەرىنە نەگىزدەلگەن زاڭ قابىلداۋ قاجەت.
وسىلايشا، ءسوز بوستاندىعى، پىكىر ءپليۋراليزمى مەن مەملەكەتتىك قاۋىپسىزدىكتى، قوعامدىق ءتارتىپتى، حالىقتىڭ دەنساۋلىعى مەن يماندىلىعىن قامتاماسىز ەتۋگە باعىتتالعان قاجەتتى شەكتەۋلەر اراسىنداعى تەپە-تەڭدىكتى بەلگىلەيتىن تۇبەگەيلى جاڭا سحەمانى بەكىتۋ ۇسىنىلادى.
اقدم اتاپ وتكەندەي، نەگىزگى رەفورمالار جۋرناليستەردىڭ قۇقىقتىق مارتەبەسىن ارتتىرۋعا جانە ولار ءۇشىن قۇقىقتىق كەپىلدىكتەردى كۇشەيتۋگە باعىتتالادى.
زاڭ جوباسى مەن تۇجىرىمداماسى 27 قاڭتارعا دەيىن اشىق نقا سايتىندا ورنالاستىرىلعان.