قالا اكىمىنىڭ ورىنباسارى اسقار ءامرين اتالعان قۇجاتتىڭ ەكى جاقتى مىندەتتەردى شەشەتىنىن اتاپ ءوتتى: بىرەگەي تاريحي كەلبەتتى ساقتاۋ جانە الەمدىك ۇردىستەرگە سايكەس كەلەتىن بولاشاق مەگاپوليستىڭ بەينەسىن جاساۋ.
بۇگىن الماتىدا VIII سايلانعان ءماسليحاتتىڭ كەزەكتى XIII سەسسياسى ءوتتى. سەسسيا بارىسىندا قابىلدانعان ماڭىزدى شەشىمدەردىڭ ءبىرى – دەپۋتاتتاردىڭ مەگاپوليستىڭ ديزاين-كودىن بەكىتۋى، دەپ حابارلايدى اlmaty-akshamy.kz
«ديزاين-كودتى ازىرلەۋ اياسىندا حالىقارالىق تاجىريبەنىڭ تالداۋى جۇرگىزىلىپ، ساراپشىلارمەن 15 جوبالىق سەمينار ۇيىمداستىرىلدى. قالا تۇرعىندارىنىڭ 13 مىڭنان استام ساۋالناماسى جينالىپ قاراستىرىلدى. رەسپوندەنتتەردىڭ 40-50% استامى – قالامىزدا تۋعاننان بەرى تۇرىپ كەلە جاتقان الماتىلىقتار»، - دەدى اسقار ءامرين.
الماتىنىڭ قالالىق كەڭىستىگىنە ديزاين-كودتى ەنگىزۋ اۋقىمدى تالقىلاۋلار مەن قالالىق قوعامداستىقتىڭ بىرلەسكەن كۇش-جىگەرىنىڭ ناتيجەسى بولدى. وسىعان دەيىن قۇرىلىس، ساۋلەت، ۋربانيستيكا جانە جەر قاتىناستارى جونىندەگى جونىندەگى كوميسسيانىڭ وتىرىسىندا دەپۋتاتتار جوباعا ازىرلەۋشىمەن تالقىلاۋدان كەيىن ەنگىزىلگەن ءبىرقاتار ۇسىنىمداردى ايتقان. اتاپ ايتقاندا، جاڭا ديزاين-كود ەنگىزىلگەننەن كەيىنگى ءبىرىنشى جىلى ازاماتتاردان كەلىپ تۇسكەن وتىنىشتەر سانى كوپ بولعان جاعدايدا تۇزەتۋلەر ەنگىزۋ مۇمكىندىگى قاراستىرىلدى.
قالا اكىمى ەربولات دوسايەۆ قالا تۇرعىندارى مەن كاسىپكەرلەرىنىڭ قاجەتتىلىكتەرىنە جاۋاپ رەتىندە ديزاين-كودتى كەزەڭ-كەزەڭىمەن ەنگىزۋدى تاپسىردى. وتپەلى كەزەڭ جاڭا ستاندارتتارعا يكەمدى بەيىمدەلۋدى قامتاماسىز ەتەدى. جاڭا نىساندار ۇسىنىستاردىڭ تولىق كولەمىن قولدايدى، ال بۇرىننان بار نىساندار ءۇشىن كەشەندى ءتاسىل قاراستىرىلعان. اقپارات، رەسۋرستار جانە تاجىريبە الماسۋدىڭ ورتالىعىنا اينالعان ديزاين-كودىنىڭ سايت-سەرۆيسى جاسالدى. بۇل الاڭ ديزاين-كودتى ەنگىزۋ كەزىندە قوعامدىق ديالوگ پەن بىرلەسىپ جۇمىس ىستەۋدىڭ ماڭىزدى قۇرالى بولادى.
ديزاين-كود – ءارقايسىسى جەكە باعىتتى سيپاتتايتىن قوسىمشالار جيىنتىعى. مۇنداي قوسىمشالاردىڭ التاۋى بولدى: اقپارات تاسىعىشتارى، ناۆيگاسيا، قالالىق جيھاز، كوگالداندىرۋ، قاسبەتتەر مەن قورشاۋلار. الماتى اكىمىنىڭ تاپسىرماسى بويىنشا قالالىق نىسانداردى جارىقتاندىرۋ بويىنشا جەتىنشى قوسىمشا قوسىلدى.
ءماسليحات سەسسياسى بارىسىندا دەپۋتاتتار سايلاۋ كوميسسيالارىنىڭ بەس جىلدى قۇرايتىن وكىلەتتىك مەرزىمىنىڭ وتۋىنە بايلانىستى الماتى قالاسىنىڭ سايلاۋ كوميسسيالارىنىڭ جاڭا قۇرامىن بەكىتتى. ماسەلەن، سايلاۋ كوميسسيالارىنىڭ جاڭا قۇرامىن قالىپتاستىرۋ ەكى ايدان كەشىكتىرىلمەي باستالادى جانە 2024 جىلعى 9 قاڭتاردا سايلاۋ كوميسسيالارىنىڭ وكىلەتتىك مەرزىمى اياقتالعانعا دەيىن ءۇش كۇننەن كەشىكتىرىلمەي توقتايدى. ءماسليحاتتىڭ جۇمىس توبى ۇسىنىلعان قۇجاتتاردى مۇقيات قاراپ، ۇمىتكەرلەر بويىنشا شەكتەۋلەردىڭ بار-جوعىن تەكسەردى. ۇمىتكەرلەردىڭ تاجىريبەسى، كاسىپتىك ءبىلىمى مەن داعدىلارىن ەسكەرە وتىرىپ، بارلىعى ءۇش ساياسي پارتيادان 1872 ۇسىنىس جانە سەگىز قوعامدىق بىرلەستىكتەن 2490 ۇسىنىس ءتۇستى. الماتى قالاسىنىڭ اۋماقتىق سايلاۋ كوميسسياسىنىڭ اقپاراتى بويىنشا، سايلاۋ كوميسسيالارى اۋماقتىق كوميسسيالاردىڭ 63 مۇشەسىنەن جانە ۋچاسكەلىك كوميسسيالاردىڭ 4299 مۇشەسىنەن تۇرادى.