ماسكەۋدە بەس ادامنان كوروناۆيرۋستىڭ «كەنتاۆر» دەگەن ءتۇرى انىقتالدى

دارىگەرلەر ماسكەۋدە كوروناۆيرۋس جۇقتىرعان بەس پاسيەنتتەن «كەنتاۆر» دەگەن كىشى ءتۇرىن تاپتى.

بارلىق ناۋقاستاردا اۋرۋ جەڭىل تۇردە وتۋدە. ناۋقاستار اراسىندا اۋرۋحاناعا جاتقىزىلعاندار جوق. سوڭعى ەكى اپتادا رەسەيدە انىقتالعان كوروناۆيرۋستىق ينفەكسيانى جۇقتىرۋ جاعدايلارىنىڭ ىشىندە «وميكروننىڭ» كىشى تۇرلەرى - BA.4 جانە BA.5 شتامدارىنىڭ ۇلەسى 51،76%-كە جەتتى، دەپ حابارلايدى Almaty-akshamy.kz COVID-19 تارالۋىنا جول بەرمەۋ جونىندەگى ۆاك-تىڭ Telegram كانالىنا سىلتەمە جاساپ. 

وميكروننىڭ ءوزى جاعدايلاردىڭ 1،85%-ىندە، دەلتا نۇسقاسى 0،73%-ىندە انىقتالعان.

"كەنتاۆر" - "وميكرون" كوروناۆيرۋس شتامىنىڭ جاڭا كىشى ءتۇرى. بۇل كوروناۆيرۋستىق مۋتاسيا ءۇندىستاندا جانە كەم دەگەندە ون ەلدە، سونىڭ ىشىندە نيدەرلاندى، اۆستراليا، گەرمانيا، ۇلىبريتانيا، اقش جانە كانادادا تابىلدى.  

ال قىتايداعى سزيانسي پروۆينسياسىندا اققۋلاردىڭ كوروناۆيرۋس جۇقتىرۋ جاعدايى العاش رەت  تىركەلدى. اقش بيولوگيا عىلىمدارىنىڭ دوكتورى قۇستارداعى كوروناۆيرۋستى انىقتاۋ COVID-19-دا ودان دا ءقاۋىپتى مۋتاسياعا اكەلۋى مۇمكىن دەپ ەسكەرتتى. سونىمەن قاتار، قونىس اۋداراتىن قۇستاردىڭ ءومىر سالتىنا بايلانىستى اققۋلار قىسقا مەرزىمدە بۇل مۋتاسيالاردىڭ كەڭ قاشىقتىققا تارالۋىنا ىقپال ەتۋى مۇمكىن. عالىمدار كوروناۆيرۋستىق ينفەكسيادان قورعانۋدىڭ جالعىز ءادىسى - ۆاكسينالاۋ ەكەنىن ايتادى.