رەسەيدە كوروناۆيرۋس كۇشەيىپ تۇر
ماسكەۋدە 11 كۇندىك لوكداۋن جاريالاندى. وسى مەرزىم ىشىندە ءدارىحانالار مەن حالىققا قاجەتتى زات ساتاتىن دۇكەندەر عانا اشىق بولادى، دەپ حابارلايدى Almaty-akshamy.kz
رەسەيدە كوروناۆيرۋس ءورشي ءتۇستى. ەلدە جاپپاي ۆاكسينالاۋ جۇمىستارى جۇرگىزىلىپ جاتقانىمەن، ناتيجە از. كەرىسىنشە، جاعداي ودان ءارى ۋشىعىپ بارادى. كۇن سايىن كوۆيد جۇقتىرعاندار مەن قايتىس بولعاندار سانى ارتىپ جاتىر. وسىعان بايلانىستى بۇكىل ەل بويىنشا دەمالىس كۇندەرى ەنگىزىلەتىن بولدى.
«ءقازىر ىندەتتىڭ جاڭا تولقىنىنا تەگەۋرىندى تويتارىس بەرۋ وتە ماڭىزدى. وسى رەتتە 30 قازان مەن 7 قاراشا ارالىعىندا بۇكىل ەل بويىنشا دەمالىس جاريالاۋ تۋرالى ۇسىنىستارىڭىزدى قولدايمىن»، - دەدى رەسەي پرەزيدەنتى ۆلاديمير پۋتين.
ەل پرەزيدەنتى ۆلاديمير پۋتين ءوڭىر باسشىلارىنا قاجەت بولسا قوسىمشا شارا قابىلداۋعا بولاتىنىن دا قاداپ ايتتى. مۇنى ەسكەرگەن ماسكەۋ مەرى شۇعىل شەشىم قابىلداپ، قازاننىڭ 28-ىنەن باستاپ قالادا لوكداۋن ورنايتىنىن جاريالادى. وعان سايكەس، كاسىپورىندار جۇمىسىن توقتاتادى. بۇقارالىق شارا وتكىزۋگە تىيىم سالىنادى. ال مەكتەپ وقۋشىلارى دەمالىسقا كەتەدى. 11 كۇن بويى قالادا ازىق-تۇلىك دۇكەندەرى مەن ءدارىحانالار عانا قىزمەت كورسەتەدى. ەلدەگى ەپيداحۋالدىڭ تىم ناشارلاپ كەتۋى ۆاكسينالاۋ قارقىنىنىڭ تومەندىگىمەن بايلانىستى. بيلىك وكىلدەرى تۇرعىنداردى تەزىرەك ەكپە الۋعا شاقىرىپ جاتىر.
«تاعى دا قايتالاپ ايتامىن. ۆاكسينا ينفەكسياعا شالدىعۋدى ءارى ءولىم ءقاۋپىن ازايتادى. وسى رەتتە ۆاكسينالاۋ قارقىنىن ارتتىرۋ كەرەك ەكەنىنە ءوڭىر باسشىلارىنىڭ نازارىن اۋدارعىم كەلەدى. ال ازاماتتارىمىزدى ەكپە سالدىرۋعا شاقىرامىن»، - دەيدى رەسەي پرەزيدەنتى ۆلاديمير پۋتين.
ءقازىر دارىگەرلەر مەن ساراپشىلار ىندەتتىڭ ءتورتىنشى تولقىنى الدىڭعىلارىنا قاراعاندا الدەقايدا ءقاۋىپتى بولۋى مۇمكىن ەكەنىن ەسكەرتەدى.
«قازىرگى تاڭدا ناۋقاستاردىڭ دەنساۋلىعى تىم تەز ناشارلاپ كەتىپ جاتىر. بۇرىن مۇنداي جاعداي تەك ەگدە ادامدار اراسىندا بايقالسا، بۇگىندە اۋىر حالدە جاتقاندار قاتارىندا 30 جاستاعى ازاماتتار كوپ. وسىعان قاراپ، قازىرگى كوروناۆيرۋستىڭ الدەقايدا ءقاۋىپتى ەكەنىن ايتۋعا بولادى»، - دەيدى باس دارىگەر ەگور لۋكيانوۆ.
كورشى ەلدە ينفەكسياعا شالدىعۋ كورسەتكىشى 24 قىركۇيەكتەن باستاپ ءوسىپ كەلەدى. كۇن سايىن 30 مىڭنان استام ادامنان ۆيرۋس انىقتالادى. بۇگىندە ولاردىڭ جالپى سانى 8 ميلليوننان اسادى.