وتكەن جىلى ەلىمىزدە قۇراستىرىلعان 103 مىڭ جاڭا اۆتوموبيل ساتىلدى. بۇل تۋرالى بۇگىن ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى مارات قارابايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اۆتوموبيل جاساۋ سالاسىنا كەلەتىن بولساق، 2022 جىلدىڭ قورىتىندىسى بويىنشا ىشكى نارىقتا 150 مىڭ اۆتوموبيل ساتىلدى. ونىڭ 103 مىڭ بىرلىگىن وتاندىق كومپانيالار جاساپ شىعارعان بولاتىن. بيىل اۆتوموبيل وندىرۋشىلەرىنە قاتىستى ساياساتتى قايتا قاراۋ تۇرعىسىنان ماڭىزدى سانالادى. بۇل سەكتوردا ءبىزدىڭ الدىمىزدا 3 مىندەت تۇر. ءبىرىنشى - شىعارىلاتىن اۆتوموبيلدەر قاتارىن كەڭەيتۋ. قازىرگى تاڭدا ەكى اۆتوموبيل زاۋىتىنىڭ قۇرىلىسى ءجۇرىپ جاتىر»، - دەدى ول.
ءمينيستردىڭ ايتۋىنشا، ەكىنشى - شاعىن توراپتى قۇراستىرۋدى دامىتۋ. ول ءۇشىن اۆتوكولىك وندىرۋشىلەرىنە كولىك قۇرالدارىن وقشاۋلاۋ جانە شاعىن توراپتى قۇراستىرۋعا كوشۋ ءۇشىن تالاپتاردى كۇشەيتۋ بويىنشا ءىس-شارالار قابىلدانىپ جاتىر. ءۇشىنشى - كومپونەنتتىك بازانى قۇرۋ. بۇگىنگى كۇنى دوڭعالاق ديسكىلەرىن، اككۋمۋلياتورلاردى شىعاراتىن كاسىپورىندار جۇمىس ىستەيدى. ولاردى وتاندىق اۆتوموبيلدەرگە ورناتۋ ءۇشىن ومولوگاسيا پروسەسى وتكىزىلۋدە.
«وقشاۋلاۋ دەڭگەيىن تەرەڭدەتۋ اياسىندا اۆتوموبيل ورىندىقتارىن، مۋلتيمەديالىق جۇيەنى، قاپتامالاردى، شاشىراتقىشتار مەن شينالار سياقتى اۆتوكومپونەنتتىك بازانى دامىتۋ جوسپارلانۋدا. ول ءۇشىن ءتيىستى ءوندىرىس ورىندارىنىڭ قۇرىلىسى باستالدى»، - دەدى مارات قارابايەۆ.