زيكستو كومپانياسى جايلىلىعى جوعارى 300-دەن استام جولاۋشىلار ۆاگونىن قۇراستىرادى
شۆەيساريالىق Stadler كومپانياسى ەلىمىزدە 2030 جىلعا دەيىن 537 زاماناۋي جولاۋشىلار ۆاگونىن شىعارادى. بۇل تۋرالى بۇگىن ۇكىمەت وتىرىسىندا يندۋستريا جانە ينفراقۇرىلىمدىق دامۋ ءمينيسترى مارات قارابايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«تەمىرجول ماشينالارىن جاساۋدى دامىتۋ نارىقتى لوكوموتيۆتەرمەن، جۇك جانە جولاۋشىلار ۆاگوندارىمەن تولىقتىرۋ مىندەتتەرىن شەشۋگە باعىتتالاتىن بولادى. بۇل شۆەيساريا، اقش جانە فرانسيا ينۆەستورلارىمەن بىرلەسە جۇزەگە اسادى. مىسالى، Stadler 2030 جىلعا دەيىن اربا، ۆاگوننىڭ دانەكەرلەنگەن شاناعى، كليماتتىق قوندىرعى سياقتى وتاندىق كومپونەنتتەردى پايدالانا وتىرىپ، جاڭا زاماناۋي جولاۋشىلار ۆاگوندارىنىڭ 537 بىرلىگىن، سونداي-اق ينتەرەر، ەكستەرەر، ەلەكتر جابدىقتارىنىڭ 20 ەلەمەنتىن شىعارادى»، - دەدى مارات قارابايەۆ.
ونىڭ اتاپ وتۋىنشە، زيكستو كومپانياسى جايلىلىعى جوعارى 300-دەن استام جولاۋشىلار ۆاگونىن قۇراستىرادى.
«2030 جىلعا دەيىن تەمىرجول ماشينا جاساۋدىڭ بارلىق باعىتتارى بويىنشا جەرگىلىكتى قامتۋ ۇلعايتىلادى. بولات دايىندامالارىن ءوندىرۋ بويىنشا ءىرى جوبالاردى ىسكە اسىرۋ ماشينا جاساۋشىلاردى قاجەتتى شيكىزاتپەن قامتاماسىز ەتەدى. قازىرگى ۋاقىتتا وندىرىستە رەسەيلىك دايىنداما پايدالانىلادى. ىسكە قوسىلاتىن جوبالاردا وتاندىق ءوندىرىس قازاقستاندىق بولات نەگىزىندە قالىپتاساتىن بولادى»، - دەدى مينيستر.