بۇقار جىراۋ اۋدانى، مۇستافين اتىنداعى اۋىلىنىڭ اكىمى قايرات قۇسايىنوۆ كولىكتى ماس كۇيىندە باسقارعانى ءۇشىن ۇستالدى.
وقيعا 3 اقپانعا قاراعان ءتۇنى اۋىلىشىلىك جولداردىڭ بىرىندە بولعان. ەر ادامنان الكوگولدىڭ ءيىسىن سەزگەن پوليسەيلەر ونى ساراپتاماعا جىبەرگەن. ناتيجەسىندە ورتاشا دارەجەدەگى ماس بولۋ فاكتىسى انىقتالعان، دەپ حابارلايدى اlmaty-akshamy.kz.
اكىمشىلىك سوت اكىمدى جەتى جىلعا كولىك جۇرگىزۋ قۇقىعىنان ايىرىپ، 15 تاۋلىككە قاماۋعا الدى.
ءبىر قىزىعى، بۇعان دەيىن دە قايرات قۇسايىنوۆ ماس كۇيىندە كولىكتى جۇرگىزىپ بارا جاتقان جەرىنەن ۇستالعان بولاتىن. بۇل وقيعا 2018 جىلدىڭ 25 تامىزىندا ورىن العان ەدى. ءسويتىپ، ءۇش جىلعا كولىك جۇرگىزۋ قۇقىعىنان ايىرىلعان بولاتىن. ودان كەيىن قايرات قۇسايىنوۆ سول بۇقار جىراۋ اۋدانىنا قاراستى قۋشوقى اۋىلىنىڭ اكىمى بولدى.
ءبىراق اراعا ەكى جىل سالىپ، قۇقىعىنان ايىرىلعان اكىم قايتادان پوليسەيلەردىڭ قولىنا ءتۇستى. بۇل جولى ونىڭ قولىندا كولىك جۇرگىزۋ كۋالىگى جوق بولاتىن.
اكىم مەملەكەتتىك قىزمەتشىلەردىڭ ادەپ جونىندەگى كەڭەسىنە شاقىرىلدى. كەڭەس كەزىندە قايرات قۇسايىنوۆ ءوزىن گەنەرالدىڭ تاپسىرماسىن ورىندايتىن جاۋىنگەرگە تەڭەدى. كەز كەلگەن ۋاقىتتا بەرىلگەن تاپسىرمانى بۇلجىتپاي ورىنداۋعا دايار ەكەنىن ايتىپ اقتالدى. ەل-ىشىندەگى كوروناۆيرۋستىق جاعدايعا بايلانىستى اكىم قىزمەتتىك كولىكپەن اۋداندى ارالاپ، حالىققا كومەك جاساپ جۇرگەنىن العا تارتتى. سول كەزدە ەل ىشىندەگى جاعدايدى ەسكەرگەن بيلىك ورگاندارى اكىمگە ەسكەرتۋ بەرۋمەن شەكتەلگەن ەدى. ال ەندى بۇل جولى قايرات قۇسايىنوۆتىڭ مەملەكەتتىك قىزمەتكەر رەتىندەگى تاعدىرى تۇرمەدەن جازاسىن وتەپ شىققان سوڭ بەلگىلى بولماق.