قازاقستان بوكس فەدەراسياسىنىڭ جىلدىق ءداستۇرلى جيىنى بارىسىندا كەڭەس راقىشيەۆتىڭ ورنىنا فەدەراسيانىڭ جاڭا پرەزيدەنتى بولىپ شاحمۇرات ءمۇتالىپ سايلاندى، – دەپ حابارلايدى اlmaty-akshamy.kz فەدەراسيانىڭ باسپا ءسوز قىزمەتىنە سىلتەمە جاساپ.
كونفەرەنسيانىڭ كەزەكتى وتىرىسىندا وتكەن جىل قورىتىندىلانىپ، ەرلەر جانە ايەلدەر كومانداسى باس باپكەرلەرىنىڭ ەسەبى تىڭدالدى. قبف جاڭا باسشىسىنىڭ سايلاۋ وتىرىستىڭ سوڭعى بولىگىندە ءوتتى.
جاڭا قىزمەتىندە العاش رەت ءسوز العان پرەزيدەنت قبف الدىنداعى مىندەتتەردى بىرلەسىپ ورىنداۋدىڭ ماڭىزدىلىعىن اتاپ ءوتتى. سونداي-اق، ول وزىنە سەنىم ارتقان قاۋىمداستىق مۇشەلەرىنە العىس ءبىلدىرىپ، ورتاق ماقساتقا جەتۋ جولىندا ءوزىنىڭ بار كۇشىن سالاتىنىن ايتتى.
«ماعان جۇكتەلگەن جاۋاپكەرشىلىكتى سەزىنە وتىرىپ، قازاقستان بوكسىن ءارى قاراي دامىتۋعا، سپورتشىلارىمىزعا جان-جاقتى قولداۋ كورسەتىپ، ولاردىڭ مۇددەسىن قورعاۋعا، قبف ءرولىن ەل ىشىندە جانە حالىقارالىق دەڭگەيدە ارتتىرۋعا بار كۇشىمدى سالامىن. بيىل وتەتىن ماڭىزدى دودالار قارساڭىندا كوماندانىڭ الدىندا ۇلكەن ءبىر ماقسات تۇر. ءوز تاراپىمىزدان دايىندىققا قاجەتتى بارلىق جاعدايدى جاساۋدى جالعاستىرا بەرەمىز. بىرلەسە ەڭبەك ەتۋ ارقىلى وتاندىق بوكستىڭ الەمدىك ارەناداعى بەدەلىن نىعايتا تۇسەمىز»، - دەدى قبف جاڭا باسشىسى.
شاحمۇرات ءمۇتالىپ 1990 جىلى 18 قىركۇيەكتە الماتى وبلىسىنداعى كازسيك اۋىلىندا تۋعان.
ەكونوميكا عىلىمدارىنىڭ ماگيسترى، كۋالا-لۋمپۋردەگى The Asia Pacific University of Technology & Innovation (APU) وقۋ ورنىندا ءبىلىم العان. كاسىپكەر، «Integra Construction KZ» جشس-نىڭ بەنەفيسيار يەسى.