بىلتىر كۇزدە كاسىپكەر جانە اقتوبە قالالىق ءماسليحاتىنىڭ دەپۋتاتى سانيا مۋراتوۆا ماس كۇيىندە كولىك جۇرگىزگەنى ءۇشىن ۇستالعان بولاتىن.
ىشىمدىك ءىشىپ رولگە وتىرعان بۇرىنعى دەپۋتات قوعامدىق كەڭەسكە مۇشە بولدى، دەپ حابارلايدى aqshamnews.kz «دياپازون»-عا سىلتەمە جاساپ.
قوعامدا ۇلكەن رەزونانس تۋدىرعان وقيعادان كەيىن سانيا مۋراتوۆا دەپۋتاتتىق وكىلەتتىلىگىن توقتاتقان بولاتىن. سوت ونى سىرتتاي جەتى جىلعا جۇرگىزۋشى كۋالىگىنەن ايىرىپ، 15 تاۋلىككە قاماۋعا العان ەدى.
بۇل جولى سانيا مۋراتوۆا اقتوبە وبلىسىنىڭ قوعامدىق كەڭەسىنىڭ جاڭا مۇشەسى رەتىندە ەلدىڭ نازارىن وزىنە اۋداردى. بۇل تاعايىنداۋ قالا تۇرعىندارىنىڭ نارازىلىعىن تۋعىزدى. كوپتەگەن اقتوبەلىكتەر ماس كۇيىندە كولىك جۇرگىزگەن ەكس-دەپۋتاتتىڭ قوعامدىق مۇددەلەردى قالاي قورعاي الاتىنىنا تاڭدانىس بىلدىرۋدە.
قوعامدىق كەڭەستىڭ وكىلەتتىگى كەڭ. ونىڭ مۇشەلەرى مەملەكەتتىك ورگانداردىڭ قىزمەتىن تالقىلاۋعا جانە شەشىم قابىلداۋعا قاتىسىپ، اتقارۋشى ورگانداردىڭ قىزمەتىنە باقىلاۋ جاسايدى، ولاردىڭ جۇمىسىنىڭ اشىقتىعىن قاداعالايدى.