قازاقستاندا كوممۋنالدىق تولەمدەر مەن نەسيەلەر بويىنشا بەرەشەك مۇرا بولىپ سانالادى.
ەگەر ادام مۇرانى قابىلدايتىن بولسا، وندا نوتاريۋس ارقىلى قايتىس بولعان مۇرا قالدىرۋشىنىڭ قارىزى تۋرالى انىقتاپ الۋى كەرەك، دەپ حابارلايدى Almaty-akshamy.kz
قايتىس بولعان ادامنىڭ مۇراگەرى تۋىسىنىڭ نەسيەسىن الۋدان باس تارتۋعا قۇقىلى. مۇندايدا ول مۇرانىڭ قالعان بولىگىنەن (بار بولسا) باس تارتۋى ءتيىس. سەبەبى مۇرانىڭ ءبىر بولىگىنەن باس تارتۋعا، ەسكەرتۋلەرمەن نەمەسە شارتپەن مۇرادان باس تارتۋعا زاڭ بويىنشا جول بەرىلمەيدى. قاراپايىم تىلمەن تۇسىندىرەتىن بولساق، پاتەردى مۇراعا الىپ، ءبىراق ونىڭ بۇرىنعى يەسىنىڭ قارىزىن تولەۋدەن باس تارتۋعا بولمايدى.
ەگەر ادام مۇراگەرلىكتەن باس تارتسا، بۇل جاعدايدا ول ءوز قۇقىقتارى تۋرالى مالىمدەمەۋىنە بولادى.
"سونىمەن قاتار ول مۇرا قالدىرۋشىنىڭ مۇلكىن پايدالانۋ، كوممۋنالدىق قىزمەتتەرگە اقى تولەۋ، جوندەۋ جۇمىستارىن جۇرگىزۋ سەكىلدى ارەكەتتى جاساماۋى ءتيىس. بىلمەستىكتەن مۇراعا كىرۋ تۋرالى ءوتىنىش بەرىپ، كەيىن ويىن وزگەرتىپ جاتسا، وندا ءتيىستى مۇراعا قۇقىق تۋرالى كۋالىك العانعا دەيىن نوتاريۋسقا مۇرادان باس تارتۋ تۋرالى ءوتىنىش بەرۋى ءتيىس. ال كۋالىكتى العاتىن بولسا، وندا مۇرادان تەك سوت ارقىلى باس تارتۋعا بولادى"، - دەپ حابارلادى اگەنتتىك.
ەگەر ادام مۇرانى قابىلدايتىن بولسا، وندا نوتاريۋس ارقىلى قايتىس بولعان مۇرا قالدىرۋشىنىڭ قارىزى تۋرالى انىقتاپ الۋى كەرەك.
اگەنتتىكتىڭ دەرەگىنشە، مۇراگەر وسى اقپاراتتى بىلگەننەن كەيىن نەسيە بەرۋشىلەرگە ادامنىڭ قايتىس بولۋى تۋرالى كۋالىكتى ۇسىنىپ، ايىپپۇلداردى ەسەپتەمەۋدى جانە ول مۇراگەرلىك قۇقىعىنا ەنگەنگە دەيىن قارىزدى توقتاتا تۇرۋدى تالاپ ەتكەنى ءجون.
ەگەر نەسيە بەرۋشى مۇرا قالدىرۋشى قايتىس بولعان سوڭ ءوسىمپۇلدى ەسەپتەسە، وندا مۇراگەر بەرەشەكتى قايتا ەسەپتەۋدى تالاپ ەتە الادى.
"مۇرانى قابىلداعان ادام قايتىس بولعان تۋىسىنىڭ نەسيەسىن قارىز شارتىندا جازىلعان كەستە بويىنشا وتەيتىن بولادى. ەگەر بەرەشەكتى وتەۋ كەستەسى وعان ىڭعايسىز بولسا نەمەسە قارىزدى مەرزىمىنەن بۇرىن جاپقىسى كەلسە، مۇنىڭ ءبارىن نەسيە بەرۋشىمەن شەشىپ الۋى ءتيىس"، - دەلىنگەن حابارلامادا.
ەگەر مۇرا قالدىرۋشى مەرزىمى ءوتىپ كەتكەن بولسا جانە ودان بەرەشەكتى ءوندىرىپ الۋ تۋرالى زاڭدى كۇشىنە ەنگەن سوت شەشىمى بولسا، وندا مۇراگەر دە بۇل ماسەلەنى كرەديتورمەن جەكە رەتتەۋى قاجەت.
مۇرانى پايدالانباس بۇرىن مۇلىكتىڭ نارىقتىق قۇنىن باعالاعان ءجون. بۇل قارىزدىڭ الىنعان مۇراعا سايكەستىگىن انىقتاۋعا، مەملەكەتتىك باجدى ەسەپتەۋگە قاجەت بولادى.
ەگەر قايتىس بولعان ادامنىڭ مۇراگەرلەرى بولماسا نەمەسە ولار مۇرانى پايدالانۋدان باس تارتسا، وندا ول يەسىز مۇلىك دەپ تانىلادى جانە ول كوممۋنالدىق مەنشىككە وتەدى.