جينالعان قاراجات مارقۇمنىڭ وتباسىنا تابىس ەتىلدى
الماتىدا ب ا ق وكىلدەرى اراسىندا ومىردەن ەرتە وتكەن بەلگىلى جۋرناليست ماقسات سلامبەكوۆتى ەسكە الۋعا ارنالعان شاعىن فۋتبولدان تۋرنير ءوتتى. ەكىنشى جىل قاتارىنان ۇيىمداستىرىلىپ وتىرعان الا دوپ باسەكەسىنىڭ اۋقىمى كەڭەيىپ، رەسپۋبليكالىق دەڭگەيدە ناسيحاتتالدى. جارىستا قىزىلوردا، شىمكەنت، تالدىقورعان جانە جەرگىلىكتى ب ا ق وكىلدەرىنەن بارلىعى 10 كوماندا توبە كورسەتىپ، اردا ازاماتتى ەسكە الدى. تۋرنير «الماتى» تەلەارناسىنىڭ 25 جىلدىعى اياسىندا وتكىزىلدى، دەپ حابارلايدى اlmaty-akshamy.kz.
تانىمال جۋرناليست ماقسات سلامبەكوۆ – بۇكىل سانالى عۇمىرىن تەليەۆيزيا سالاسىنا ارناعان جان. ەڭبەك جولىن «الماتى» تەلەارناسىنان باستادى. ون جىلدان اسا ەڭبەك ەتىپ، «تاريح تارازىسى»، «قىل كوپىر»، «جەكپە-جەك»، «ەمشىلەر»، «كاسىپ كوزى» سەكىلدى باعدارلامالاردى كورەرمەن نازارىنا ۇسىنىپ، تەلەارنادا رەداكتور، پروديۋسەر، مەنەدجەر قىزمەتتەرىن اتقاردى. تەلەارنانىڭ دامۋىنا ەلەۋلى ۇلەس قوسىپ، كورەرمەن كوڭىلىنەن ەرەكشە ورىن العان ارىپتەستى ەسكە الۋ ءىس-شاراسىنا ماقسات سلامبەكوۆتىڭ اناسى كەلىپ، ۇلىنىڭ ارىپتەستەرىنە العىس ايتتى. جينالعان كوماندالارعا ساتتىلىك تىلەدى.
– بالاما جاقسى تاربيە بەردىم دەپ ويلايمىن. ءوسىردىم. جەتكىزدىم. بۇگىن تۋرنيرگە 10 كوماندا قاتىسىپ جاتىر، بولاشاقتا ءىس-شارانىڭ اۋقىمى كەڭەيە بەرسىن، – دەدى م. سلامبەكوۆتىڭ اناسى ءۇمىتجان سلامبەكوۆا.
جاسىل الاڭدا جاسىنداي جارقىلداعان ماقسات سلامبەكوۆتى ارىپتەستەرى ۇزدىك قاقپاشى رەتىندە جاقسى تانيدى. قازاق ءجۋرناليسىن «بارتەز» دەپ تە اتاپ كەتكەنى بەكەر ەمەس. ويتكەنى ونىڭ الاڭداعى شەبەرلىگى ءبىر بولەك، ناعىز كاپيتانعا ساي بولمىسى دا كومانداسىنا سەنىمدىلىك ۇيالاتاتىن.
– بيىل – ەرەكشە جىل. سەبەبى «الماتى» تەلەارناسىنا 25 جىل تولدى. وسىعان وراي، ب ا ق وكىلدەرى اراسىندا ارىپتەسىمىز ماقسات سلامبەكوۆتى ەسكە الۋعا ارنالعان تۋرنير ۇيىمداستىرىپ جاتىرمىز. مەرەيتوي اياسىندا 50-گە جۋىق ءىس-شارا وتكىزۋدى جوسپارلاپ وتىرمىز، – دەدى «الماتى» تەلەارناسىنىڭ باس پروديۋسەرى راليدا مۇقانوۆا.
ارىپتەستەر اراسىنداعى دوستىق تۋرنيرىندە كوماندالار 2 توپقا ءبولىنىپ، مىقتىنى انىقتادى. بابى مەن باعى قاتار شاپقان تالدىقورعاندىق «قارەكەت» قۇراماسى جۇلدەلى ءبىرىنشى ورىندى يەلەنسە، «وڭتۇستىك» كومانداسى ەكىنشى جانە «سپورت+ قازاقستان» ارناسى ءۇشىنشى ورىندى قاناعات تۇتتى. سونداي-اق ۇزدىك قاقپاشى، شابۋىلشى نوميناسيالارى بويىنشا دا سىيلىق تارتۋ ەتىلدى.
– ماقسات اعا – وتە دارىندى قاقپاشى، بىلىكتى مامان. جاسىل الاڭدا بىرگە وينادىق. بۇگىن چەمپيون بولىپ جاتىرمىز. مەنىڭ عانا ەڭبەگىم ەمەس، كومانداما العىس بىلدىرەمىن، – دەدى «قارەكەت» كومانداسىنىڭ كاپيتانى سامات ەسەنتاي ۇلى.
تۋرنير قايىرىمدىلىق سيپاتتا بولدى. جينالعان قاراجات مارقۇمنىڭ وتباسىنا تابىس ەتىلدى. جارىس سوڭىندا جينالعاندار اردا ازامات جايىندا ەستەلىك ايتىپ، ۇيىمداستىرۋشىلارعا العىس ءبىلدىردى.