ماڭعىستاۋلىق ەكى ەرىكتى الماتىعا جاياۋ جەتتى

ولاردىڭ ماقساتى جالعىزباستى اناعا باسپانا الىپ بەرۋ

اقتاۋدان قايىرىمدىلىق جاساۋ ءۇشىن جاياۋ جولعا شىققان ماڭعىستاۋلىق ەكى ازامات الماتىعا امان-ەسەن جەتتى، دەپ حابارلايدى Almaty-akshamy.kz BAQ.KZ-كە سىلتەمە جاساپ.

ەرىكتى جالعاس ءسادۋوۆتىڭ ايتۋىنشا، جولدا ەشقانداي قيىندىق بولماعان. تەك قاسىنداعى جولداسى اۋىرىپ قالعان. دەسە دە ۇزاق جولدى ەڭسەرىپ، 39 كۇندە الماتىعا جەتكەن.

-اقتاۋدان دوپپەن شىققان ەدىك. دوپتى اتىراۋ قالاسىندا قول سومكە مەن ساعاتقا الماستىردىق. ورال قالاسىنان ساقيناعا اۋىستىردىق. اقتوبە قالاسىندا پوليسيا قىزمەتكەرلەرى ساقينا الماي، قايتا قولىمىزعا ساعات ۇستاتتى. سونىمەن ساقينا مەن ساعات قولىمىزدا بولدى. ارالعا كەلگەندە تاعى ءبىر تۇرعىن ساقينا بەردى. ودان بولەك ەسەپشوتقا اقشا جينالدى. ال الماتىعا كەلگەندە قىمبات قۇلاققاپقا ارالدىق تۇرعىننىڭ بەرگەن ساقيناسىن اۋىستىرىپ الدىق، - دەدى جالعاس ءسادۋوۆ. 

وسىلايشا جاياۋ جولاۋشىلاردىڭ العا قويعان ماقساتى ويداعىداي ورىندالدى. قازىرگى تاڭدا ەسەپشوتقا 4 ميلليون تەڭگەدەن استام قارجى جينالعان. سونىمەن قاتار قولدا ساقينا، ساعات، قۇلاققاپ بار. ەندى قايىرىمدى جولاۋشىلار جاياۋ تالدىقورعان قالاسىنا بەت الماق.

-تالدىقورعانعا بارىپ كەلگەننەن كەيىن اۋكسيون وتكىزەمىز. سول ارقىلى جينالعان زاتتاردى ساتىپ، قارجىنى بىرىكتىرىپ، باسپانا الامىز، - دەدى جالعاس ءسادۋوۆ.

ايتا كەتەيىك، ماڭعىستاۋلىق ەرىكتىلەر جالعاس پەن جەڭىس 1 ءساۋىر كۇنى الماتىعا جاياۋ جولعا شىققان بولاتىن. نەگىزگى ماقساتى – ەكى بالاسى ەپيلەپسيامەن اۋىراتىن جالعىزباستى اناعا باسپانا الىپ بەرۋ.