ماڭگى ءتىرى مۇقاعالي

بۇگىن - مۇقاعالي ماقاتايەۆتىڭ تۋعان كۇنى.

ق ر مەملەكەتتىك ورتالىق مۋزەيىندە بولتىرىك اتىحان ۇلى اتىنداعى №36 گيمنازياسى جانە ەڭبەكشى اۋىلىنداعى ورتا مەكتەپ وقۋشىلارىنىڭ قاتىسۋىمەن مۇقاعالي ماقاتايەۆقا ارنالعان «وتانىم، ساعان ايتامىن» ادەبي-سازدى كەش ءوتتى.

شاراعا ارنايى باعدارلاما، ۇلكەن دايىندىقپەن كەلگەن بولتىرىك اتىحان ۇلى اتىنداعى №36 گيمنازياسى جانە ەڭبەكشى اۋىلىنىڭ ورتا مەكتەپ وقۋشىلارى مۇقاعالي ماقاتايەۆتىڭ بىرنەشە شىعارماسىن ناقىشىنا كەلتىرىپ، جاتقا وقىپ شىقتى.

اقىننىڭ تۋعان جەرىنە ارناعان اسەرلى جىرلارى ادام بويىنا ۇلتتىق رۋح، جان تازالىعىن دارىتىپ، بولاشاققا دەگەن سەنىمىن ارتتىرا تۇسەتىنى ءسوزسىز. جاسوسپىرىمدەردىڭ ولەڭگە دەگەن ىنتاسى، مانەرلەپ وقۋ شەبەرلىگى، ىزدەنىمپازدىعى كورەرمەن قاۋىمنىڭ ەرەكشە ىقىلاسىنا بولەندى.

ءىس-شارانى اشقان ورتالىق مۋزەيى ديرەكتورىنىڭ جالپى ماسەلەلەر جونىندەگى ورىنباسارى ساروۆ سەرجان باراحان ۇلى «ادەبيەتىمىز ءۇشىن عانا ەمەس، تۇتاس رۋحانياتىمىز ءۇشىن مۇقاعالي قازاق رۋحانياتىنداعى اسا تانىمال شىعارماشىل تۇلعالاردىڭ ءبىرى. اقىن مۇراسى تۇنىپ تۇرعان ونەگە، تاعىلىم. اقىن جىرلارىمەن ەڭ الدىمەن جاستاردى تاربيەلەۋىمىز قاجەت»، - دەدى ول كىرىسپە سوزىندە.

ەڭبەكشى اۋىلىنىڭ ورتا مەكتەپ وقۋشىلارى مۇقاعالي كەشىنە اقىن ولەڭدەرىنىڭ جەلىسىمەن دايىنداعان «اققۋلار ۇيىقتاعاندا» جانە «مۇقاعالي ماقاتايەۆ» كورىنىستەرىن كوپشىلىك نازارىنا ۇسىندى.

ەڭبەكشى اۋىلى مەكتەپ ديرەكتورىنىڭ وقۋ ءىسى جونىندەگى ورىنباسارى احمەتوۆا گۇلجان «مۇقاعالي ماقاتايەۆتىڭ تۋعان كۇنىن اتاپ ءوتۋ مەكتەبىمىزدە داستۇرگە اينالعان. جىل سايىن ادەبي كەشتەر وتكىزۋ،  ولەڭدەرىن جاتقا وقۋ، اندەرىن شىرقاپ ونەر كورسەتۋدە وقۋشىلارىمىز ەرەكشە بەلسەندىلىك تانىتادى. ورتالىق مۋزەيدە كوپشىلىك نازارىنا ونەرلەرىن ۇسىنۋى بالالاردىڭ شابىتىن، ەلىنە، جەرىنە، تىلىنە دەگەن سۇيىسپەنشىلىكتەرىن ارتتىرا تۇسەتىنى انىق»، - دەدى.

ادەبي كەشتىڭ قۇرمەتتى قوناقتارى الماتى قالاسىنىڭ قۇرمەتتى ازاماتى، «دوستىق»، «پاراسات»، «قۇرمەت» وردەنىنىڭ يەگەرى، ءتىل جاناشىرى، قازاقستاننىڭ ەڭبەك سىڭىرگەن قايراتكەرى اسىلى وسپان جانە قازاقستاننىڭ ەڭبەك سىڭىرگەن قايراتكەرى، حالىقارالىق مۇقاعالي ماقاتايەۆ اتىنداعى سىيلىعىنىڭ، حالىقارالىق ماحامبەت سىيلىعىنىڭ يەگەرى، ءبىلىم بەرۋ ءىسىنىڭ ۇزدىگى گۇلشارا ەسەت قىزى مەكتەپ ۇستازدارىنا ۇلكەن ريزاشىلىق، العىس سوزدەرىن جەتكىزدى. 

شارانى مۇقاعالي جىرلارىنا جازىلعان ادەمى اندەرمەن ارلەپ، ونەرىمەن كوپشىلىكتى ءتانتى ەتكەن رەسپۋبليكالىق مۇقاعالي ماقاتايەۆ بايقاۋىنىڭ جۇلدەگەرى سيازبەك  ورتقالييەۆ، رەسپۋبليكالىق «اقبەرەن» بايقاۋنىڭ جۇلدەگەرى فاتيما ابەتەي، قالالىق «بالا فەست» بايقاۋىنىڭ باس جۇلدەگەرى كەنجەبەك ابدراحمان بولدى.