ۇلتتىق بانك 2017 جىلى حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ىسكە قوسقان.
2022 جىلدىڭ مامىر ايىندا ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتتەرىندە جالپى سالماعى 92،7 كەلى 3 316 التىن قۇيما ساتىلدى، دەپ حابارلايدى Almaty-akshamy.kz
باعدارلاما قولعا الىنعالى جالپى سالماعى 3،2 تونناعا جۋىق 94 545 التىن قۇيما ساتىلدى.
«التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گ. ساتىپ الۋشىلار اراسىندا ەڭ كوپ سۇرانىسقا يە ءتۇرى – 10 گرامدىق التىن قۇيما. جالپى ساتىلعان قۇيمالار اراسىندا ونىڭ ۇلەسى – 26%، ياعني، 24 493 دانا. ودان كەيىن 20 گرامدىق قۇيما كوپ ساتىلادى – 20 385 دانا (22%)، 5 گرامدىق قۇيمادان 19 468 دانا (20%)، 100 گرامدىق قۇيمادان 18 679 دانا (20%)، 50 گرامدىق قۇيمادان 11 520 دانا (12%) ساتىلدى. التىن قۇيمالار الماتى، نۇر-سۇلتان جانە اتىراۋ قالالارىندا كوپ ساتىلادى»، - دەپ جازدى ۆەدومستۆودان.
التىن قۇيمالار سەنىمدى ينۆەستيسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى.
«باعدارلاما باستالعاننان بەرى ەكىنشى دەڭگەيلى بانكتەر مەن بانكتىك ەمەس جەكەلەگەن ايىرباستاۋ پۋنكتەرى جالپى سالماعى 330 كەلى 13 692 التىن قۇيمانى كەرى ساتىپ العان، بۇل – جالپى ساتىلعان قۇيمالاردىڭ 14%-ى. كەرى ساتىپ الىنعان التىن قۇيمالاردىڭ بارلىعى دەرلىك ۇلتتىق بانكتىڭ فيليالدارى ارقىلى حالىققا ساتىلادى»، - دەپ حابارلادى ۇلتتىق بانك.
ءار قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە جيەگى بار) جانە ارنايى قوراپتا شىعادى، سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعانىش قورابى ساپا سەرتيفيكاتى دا بولا الادى. سوندىقتان، التىن قۇيمانى ۇقىپپەن ساقتاپ، قورابىن بۇلدىرمەۋ كەرەك. ءقازىر التىن قۇيمالاردى ەكىنشى دەڭگەيلى بانكتەردىڭ ەسەپتىك كاسسا بولىمدەرىندە جانە بانكتىك ەمەس جەكەلەگەن ايىرباستاۋ پۋنكتەرىندە ساتىپ الىپ، كەرى ساتۋعا بولادى.