جارتى ساعاتتان استام ۋاقىتقا سوزىلعان باسەكەدە جەڭىسكە جەتتى.
الەمنىڭ 33-راكەتكاسى يۋليا پۋتينسيەۆا يستبورن (ۇلىبريتانيا) WTA 500 ءتۋرنيرىنىڭ ءۇشىنشى اينالىمىنا شىقتى، دەپ حابارلايدى Almaty-akshamy.kz.
جارىستى ەكىنشى اينالىمنان باستاعان پۋتينسيەۆا الەمنىڭ 40-راكەتكاسى، يسپانيالىق سارا سورريبەس-تورمومەن شەبەرلىك بايقاستى. تارتىستى وتكەن ءبىرىنشى پارتيادا يۋليا تارازى باسىن وزىنە اۋدارا ءبىلدى – 7:5. ەكىنشى سەتتە يۋليا 4:0 ەسەبىمەن العا كەتتى. اقىرى ماچتى جەڭىسپەن تۇيىندەدى – 6:1. جارتى ساعاتتان استام ۋاقىتقا سوزىلعان باسەكە بارىسىندا قازاقستاندىق سپورتشى 1 ەيس جاساپ، 9 برەيك-پوينتتىڭ التاۋىن پايدالانا ءبىلدى. پۋتينسيەۆا شيرەك فينالعا شىعۋ ءۇشىن الەمنىڭ 5-راكەتكاسى، گرەكيالىق ماريا ساككاري نەمەسە دۇنيەجۇزىلىك رەيتينگتە 36-ورىندا تۇرعان ۋكراينالىق انگەلينا كالينينانىڭ بىرەۋىمەن تالاسادى.
قازاقستاننىڭ ءبىرىنشى، الەمنىڭ 21-راكەتكاسى ەلەنا رىباكينا ەكىنشى اينالىمدا رەيتينگتە 114-ساتىداعى تاعى ءبىر ۋكراينالىق لەسيا سۋرەنكومەن كەزدەسەدى.
ەرلەر اراسىندا يستبورن ATP 250 تۋرنيرىندە الەكساندر نەدوۆەسوۆ پاكستاندىق ايسام كۋرەشيمەن بىرگە باستاپقى كەزدەسۋىن ءساتتى وتكىزدى. ولار ۇلىبريتانيالىقتار دجۋليان كەش – گەنري پاتتەندى 6:4، 7:6 (7:4) ەسەبىمەن ۇتىپ، شيرەك فينالعا شىقتى. ا.نەدوۆەسوۆ پەن ا.كۋرەشيدىڭ شيرەك فينالداعى قارسىلاستارى كەيىن انىقتالادى.