ماماندىق تاڭداۋ – ءاربىر جاس ءۇشىن ماڭىزدى كەزەڭدەردىڭ ءبىرى. الايدا، ەرەكشە قاجەتتىلىكتەرى بار بالالار ءۇشىن بۇل پروسەسس بەلگىلى ءبىر قيىندىقتارمەن قاتار جۇرەدى. وسىعان بايلانىستى، ولارعا باعىت-باعدار بەرۋ، ىڭعايلى ماماندىقتاردى ۇسىنۋ – ماڭىزدى مىندەتتەردىڭ ءبىرى.
№2 ارنايى مەكتەپ-ينتەرنات ديرەكتورىنىڭ ورىنباسارى جانار قۇتتىقادام قىزىنىڭ ايتۋىنشا، جىل سايىن قالاداعى بىرنەشە كوللەدج وقىتۋشىلارى ارنايى كەلىپ، بالالارعا كاسىبي باعدار بەرەدى. بۇل كەزدەسۋلەر بارىسىندا ولاردىڭ مۇمكىندىكتەرى ەسكەرىلىپ، قولايلى ماماندىقتار تۋرالى تولىق اقپارات بەرىلەدى.
«ەرەكشە بالالار ءۇشىن ماماندىق تاڭداۋ وڭاي ەمەس. مىسالى، تىرەك-قيمىل اپپاراتى بۇزىلعان بالالارعا كەيبىر ماماندىقتاردى مەڭگەرۋ قيىنعا سوعۋى مۇمكىن. سوندىقتان ولار كوبىنەسە الماتى فلوريستيكا كوللەدجى مەن الماتى تەحنولوگيا كوللەدجىن تاڭدايدى. بۇل وقۋ ورىندارىندا ءبىزدىڭ بالالارعا لايىقتى ماماندىقتار كوپ. اسىرەسە، توقىما، تىگىنشىلىك، ەتىكشىلىك، ءىت سالاسى سەكىلدى كاسىپتەرگە سۇرانىس جوعارى»، – دەيدى جانار قۇتتىقادام قىزى.
دەگەنمەن، ەرەكشە قاجەتتىلىكتەرى بار تۇلەكتەردىڭ اراسىندا مەديسينا، پەداگوگيكا سياقتى سالالاردا دا قىزمەت ەتىپ جۇرگەندەرى از ەمەس. بۇل ولاردىڭ تەك بەلگىلى ءبىر شەڭبەردە شەكتەلمەي، ءوز مۇمكىندىكتەرىن تولىقتاي جۇزەگە اسىرۋعا تالپىناتىنىن كورسەتەدى.
قازىرگى تاڭدا ەرەكشە بالالارعا ارنالعان ماماندىقتار مەن ولاردىڭ ەڭبەك نارىعىنا بەيىمدەلۋى ماڭىزدى تاقىرىپتاردىڭ ءبىرى بولىپ وتىر. سوندىقتان، مۇنداي ءىس-شارالاردىڭ ءجيى ۇيىمداستىرىلۋى – ولاردىڭ بولاشاققا سەنىممەن قادام باسۋىنا ۇلكەن مۇمكىندىك بەرەدى.