ماماندار «زەردە» حولدينگىن تاراتۋ ارقىلى اقشا ۇنەمدەۋگە بولاتىنىن ايتتى

جىلىنا 3 ميلليارد تەڭگەگە جۋىق قاراجاتتى ۇنەمدەۋ كوزدەلىپ وتىر.

«زەردە» حولدينگى تاراتىلعاننان كەيىن «ۇات» اق تىكەلەي ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنە بەرىلەدى، دەپ حابارلايدى Almaty-akshamy.kz قازاقپاراتقا سىلتەمە جاساپ.

مينيسترلىكتىڭ «قازاقپارات» اگەنتتىگىنىڭ ساۋالىنا بەرگەن جاۋابىندا كورسەتىلگەندەي، حولدينگتى تاراتۋ ارقىلى جىلىنا 3 ميلليارد تەڭگەگە جۋىق قاراجاتتى ۇنەمدەۋ كوزدەلىپ وتىر. سونداي-اق حولدينگتى تاراتۋ ارقىلى ارتىق قىزمەتتەردەن ارىلىپ، جاۋاپكەرشىلىكتى ناقتى ءبولىپ الۋعا بولادى.

قازىرگى تاڭدا «زەردە» حولدينگىنىڭ قۇرىلىمىندا ءۇش ەنشىلەس ۇيىم بار: «Astana Hub» تەحنوپاركى، «ۇات» اق جانە «Qazinnovations» اق. بۇگىنگى تاڭدا حولدينگ قىزمەتكەرلەرىنىڭ شتاتى 230 ادامدى قۇرايدى.

«زەردە» حولدينگى تاراتىلعاننان كەيىن «ۇلتتىق اقپاراتتىق تەحنولوگيالار» اكسيونەرلىك قوعامى تىكەلەي ق ر ءسدياوم قاراماعىنا بەرىلەدى.

بۇدان باسقا، «يننوۆاسيالىق تەحنولوگيالار پاركى» دكق، «Astana Hub» كق جانە «QazInnovations» يننوۆاسيالاردى دامىتۋ جونىندەگى ۇلتتىق اگەنتتىگى» اق-نى ءبىر ۇيىمعا بىرىكتىرۋ جوسپارلانۋدا.

بۇعان دەيىن حابارلانعانداي، 2016-2021 جىلدار كەزەڭىندە حولدينگتىڭ جيناقتالعان شىعىنى 7 ملرد تەڭگە بولدى.

ەسكە سالا كەتەيىك، ءساۋىر ايىندا مەملەكەت باسشىسى قاسىم-جومارت توقايەۆ «زەردە» حولدينگىن رەفورمالاۋدى تاپسىرعان بولاتىن.

ۇكىمەتتىڭ كەڭەيتىلگەن وتىرىسىندا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ەلىمىزدەگى سيفرلاندىرۋدىڭ بارىسىنا كوڭىلى تولمايتىنىن ايتقان ەدى.

«ەسەپ كوميتەتىنىڭ سىنىنا ۇشىراعان «زەردە» ۇلتتىق حولدينگىنىڭ جۇمىسىن جاقسارتۋدى تاپسىردىم. پرەمەر-مينيستر سيفرلاندىرۋدىڭ كۋراتورى رەتىندە وسى ماسەلەگە ەرەكشە نازار اۋدارۋى كەرەك»، - دەدى قاسىم-جومارت توقايەۆ.