وتكەن جىلمەن سالىستىرعاندا 37 مىڭ ادامعا كوپ.
قازاقستان ۇكىمەتى مەملەكەتىمىزدە جۇمىس كۇشىنىڭ كوبەيگەنىن ايتىپ وتىر. وتكەن جىلمەن سالىستىرعاندا 0،4%-عا كوبەيگەن، دەپ حابارلايدى Almaty-akshamy.kz.
«2022 جىلدىڭ ءبىرىنشى توقسانىنىڭ قورىتىندىسى بويىنشا جۇمىس كۇشىنىڭ سانى 7،1 مىڭ ادامعا نەمەسە 0،1%-عا كوبەيدى جانە 9،3 ميلليونعا جەتتى. بىلتىرعى كەزەڭمەن سالىستىرعاندا جۇمىس كۇشىنىڭ 37 مىڭ ادامعا نەمەسە 0،4%-عا كوبەيگەنىن بايقاۋعا بولادى»، - دەلىنگەن ەڭبەكمينى تاراتقان اقپاراتتا.
جۇمىسپەن قامتىلعاندار سانى ءبىر جىلدا 35،2 مىڭ ادامعا ۇلعايدى. سونىمەن قاتار توقساندىق جانە جىلدىق ديناميكادا جۇمىسپەن قامتۋدىڭ نەگىزگى ءوسۋى نەگىزىنەن جالدامالى جۇمىسكەرلەر سانىنىڭ وسۋىمەن بايلانىستى.
«توقسان ىشىندە جالدامالى جۇمىسكەرلەردىڭ سانى 16،4 مىڭعا (+0،2%) ارتىپ، 6 ملن 773،5 مىڭ ادامعا جەتتى. بۇل رەتتە ءوزىن-وزى جۇمىسپەن قامتىعانداردىڭ سانى كەرىسىنشە 12،1 مىڭعا (-0،6%) قىسقاردى (2 ملن 82،8 مىڭ ادام). جىلدىق ديناميكادا جالدامالى قىزمەتكەرلەر سانىنىڭ ابسوليۋتتىك ءوسىمى (4،4 مىڭ) ءوزىن-وزى جۇمىسپەن قامتىعانداردىڭ وسىمىنەن 7 ەسە اسىپ ءتۇستى – 30،8 مىڭ ادام. ءوزىن-وزى جۇمىسپەن قامتىعان ازاماتتار سانىنىڭ قىسقارۋى ناتيجەلى ءوزىن-وزى جۇمىسپەن قامتۋدىڭ 11 مىڭ ادامعا (-0،6%)، سونداي-اق ءونىمسىز ءوزىن-وزى جۇمىسپەن قامتۋدىڭ 1،1 مىڭ ادامعا (-0،6%) تومەندەۋى ەسەبىنەن بولدى»، – دەدى «ەڭبەك رەسۋرستارىن دامىتۋ ورتالىعى» اق باسقارۋشى ديرەكتورى الەكساندرا مولچانوۆسكايا.
سالالار بولىنىسىندە، وسى جىلدىڭ 1ء-شى توقسانىنىڭ قورىتىندىسى بويىنشا، قىزمەتكەرلەردىڭ باسىم بولىگى اۋىل شارۋاشىلىعىندا (12،7%)، ونەركاسىپتە (12،4%)، ساۋدادا (16،6%) جانە ءبىلىم بەرۋدە (12،8%) جۇمىس ىستەيدى. جىلدىق كەزەڭدە جۇمىسپەن قامتىلعانداردىڭ ەڭ كوپ ءوسۋى دەنساۋلىق ساقتاۋ جانە الەۋمەتتىك قىزمەت كورسەتۋ (+3%)، اقپارات جانە بايلانىس (+2،9%)، كاسىبي، عىلىمي جانە تەحنيكالىق قىزمەت (+2،6%)، مەملەكەتتىك باسقارۋ (+2،15%) سالالارىندا بايقالادى. وسىعان ۇقساس كەزەڭدە جۇمىسپەن قامتۋدىڭ تومەندەۋى اۋىل شارۋاشىلىعى (-2،7%)، ونەر، ويىن-ساۋىق جانە دەمالىس (-2،4%)، اكىمشىلىك قىزمەت كورسەتۋ سالاسىنداعى قىزمەت (-2،1%) جانە جىلجىمايتىن مۇلىكپەن وپەراسيالار (-1،9%) سالاسىندا بايقالدى.
«سونىمەن قاتار، قاشىقتان جۇمىس ىستەيتىن جۇمىسپەن قامتىلعانداردىڭ سانىن ارتتىرۋ ءۇردىسى ساقتالۋدا. وسى جىلدىڭ ءبىرىنشى توقسانىندا ولاردىڭ سانى وتكەن توقسانمەن سالىستىرعاندا 2،2 ەسە، ياعني 53،6 مىڭ ادامعا دەيىن ۇلعايدى. الايدا ءبىر جىلدىق كەزەڭدە بۇل كورسەتكىش 27،3%-عا تومەندەدى، ويتكەنى 2021 جىلدىڭ باسىندا COVID-19 پاندەمياسىنا بايلانىستى شەكتەۋلەر ءالى دە بولدى.«قاشىقتاعى» جۇمىسكەرلەردىڭ سانى بويىنشا شىعىس قازاقستان وبلىسى (27،3%) جانە نۇر-سۇلتان قالاسى (21،4%) الدا كەلەدى. ماسەلەن، شقو-دا قاشىقتان جۇمىسپەن قامتۋ ءبىر جىلدا 73 ەسە، 200 ادامنان 14،6 مىڭ ادامعا دەيىن، ال نۇر-سۇلتان قالاسىندا 3،7 ەسە ءوسىپ، 11،5 مىڭ ادامعا جەتتى»، – دەدى الەكساندرا مولچانوۆسكايا.
ساراپشى سونداي-اق ورتاشا ايلىق نومينالدى جالاقىنىڭ ديناميكاسى تۋرالى ايتىپ بەردى. ماسەلەن، ۇلتتىق ستاتيستيكا بيۋروسىنىڭ دەرەكتەرى بويىنشا بۇل كورسەتكىش 2022 جىلدىڭ ءبىرىنشى توقسانىندا 285،4 مىڭ تەڭگە بولعان. بۇل الدىڭعى توقسانمەن سالىستىرعاندا 9،8 مىڭ تەڭگەگە كوپ.
«توقساندىق كەزەڭدە نومينالدى ءمان بويىنشا ءوسىم نۇر-سۇلتان (-6،4%) جانە الماتى (-0،5%) قالالارىنان، سونداي-اق الماتى وبلىسىنان (-1،9%) باسقا بارلىق وڭىردە بايقالدى. ەڭ تومەنگى جالاقى سولتۇستىك قازاقستان وبلىسىندا تولەنەدى – 203،4 مىڭ تەڭگە، بۇل رەسپۋبليكا بويىنشا ورتاشا كورسەتكىشتەن 28،8%-عا تومەن.ادەتتەگىدەي ەڭ كوپ جالاقى قارجى جانە ساقتاندىرۋ قىزمەتى (521،1 مىڭ تەڭگە) جانە كاسىبي جانە عىلىمي قىزمەت (416،4 مىڭ تەڭگە) سالالارىندا بايقالادى. اۋىل شارۋاشىلىعى مەن ونەر جانە ويىن-ساۋىق سالاسىنىڭ قىزمەتكەرلەرى ەڭ از تابىس تابادى»، - دەپ حابارلادى «ەردو» اق باسقارۋشى ديرەكتورى.
ۇلتتىق ستاتيستيكا بيۋروسىنىڭ مالىمەتى بويىنشا، وسى جىلدىڭ ءبىرىنشى توقسانىنىڭ قورىتىندىسى بويىنشا جۇمىسسىزدار سانى 453،1 مىڭنان استى. وتكەن توقسانمەن سالىستىرعاندا، ولاردىڭ سانى 2،7 مىڭ ادامعا (+0،6%)، ال وتكەن جىلدىڭ ۇقساس كەزەڭىمەن سالىستىرعاندا، 1،9 مىڭ ادامعا (+0،4%) ارتتى. گەندەرلىك بولىنىستە جۇمىسسىز ازاماتتاردىڭ 54%-ى ايەلدەر، 46%-ى ەرلەر.
سونىمەن قاتار جۇمىسسىزدىق دەڭگەيى 4،9% دەڭگەيىندە ساقتالدى جانە سوڭعى جىلى سولاي بولىپ قالا بەردى. ايتا كەتۋ كەرەك، جاستار اراسىنداعى جۇمىسسىزدىق دەڭگەيى وتكەن جىلدىڭ اياعىنان باستاپ 3،7%-دان 3،9%-عا دەيىن ءوستى، ال ايەلدەر اراسىنداعى جۇمىسسىزدىق دەڭگەيى، كەرىسىنشە، 5،4%-عا دەيىن قىسقاردى.
وڭىرلىك بولىنىستە جۇمىسسىزدىق دەڭگەيى ورتاشا رەسپۋبليكالىق دەڭگەيدەن تۇركىستان (5،2%) جانە جامبىل وبلىستارىندا، الماتى جانە شىمكەنت قالالارىندا (5،1%) جوعارى.
بۇل رەتتە ءساۋىر ايىنىڭ باسىندا تىركەلگەن جۇمىسسىزدار سانى 174 مىڭ ادام نەمەسە 1،9%-دى قۇرادى. سونىمەن قاتار، جۇمىسسىزدىقتىڭ جوعارى دەڭگەيى ماڭعىستاۋ (4،2%)، تۇركىستان (3،9%)، قىزىلوردا (3،7%) جانە باتىس قازاقستان وبلىستارىندا (3،5%) تىركەلىپ وتىر.