بوس ورىندار سانى 9،8%-عا، جۇمىس ىزدەۋشىەر سانى 23،2%-عا تومەندەگەن.
قازاقستاندىق ماماندار مامىر ايىندا ەڭبەك نارىعىندا قانداي وزگەرىستەر بولعانىن باقىلاپ، ءوز قورىتىندىلارىن شىعاردى. ناتيجەسىندە جۇمىس بەرۋشىلەر اراسىندا دا، جۇمىس ىزدەۋشىلەر تاراپىنان دا ەكونوميكالىق بەلسەندىلىكتىڭ تومەندەگەنىن بايقاعان، دەپ حابارلايدى Almaty-akshamy.kz.
«2022 جىلعى مامىردا ەلەكتروندىق ەڭبەك بيرجاسىندا 82،4 مىڭ بوس جۇمىس ورنى جانە 45،7 مىڭ تۇيىندەمە ورنالاستىرىلدى. وتكەن ايمەن سالىستىرعاندا بوس ورىندار سانى 9،8%-عا، ال وزەكتى تۇيىندەمەلەر سانى 23،2%-عا تومەندەدى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
سوڭعى ايدىڭ قورىتىندىسى بويىنشا، ەڭبەك نارىعىنداعى سۇرانىس پەن ۇسىنىستىڭ قۇرىلىمى ورتاشا بىلىكتى ماماندارعا جوعارى سۇرانىستى كورسەتتى، ياعني سۇرانىس (50،8%) ۇسىنىستان (35،5%) 1،4 ەسە اسىپ ءتۇستى. الايدا، اعىمداعى جىلدىڭ باسىنان بەرى بايقالعان ەڭبەك نارىعىنىڭ قاجەتتىلىكتەرى مەن بىلىكتىلىگى تومەن كادرلاردىڭ بولۋى اراسىنداعى تەڭگەرىمسىزدىك كۇشەيدى – بىلىكتىلىگى تومەن ەڭبەككە ىزدەنۋشىلەر ورنالاستىرىلعان بوس جۇمىس ورىندارىنا (40،2%) قاراعاندا 1،5 ەسە كوپ (28،4%). ايتا كەتۋ كەرەك، جوعارى بىلىكتى ماماندار تاراپىنان ەڭبەك ۇسىنىسى (24،3%) سۇرانىسقا سايكەس كەلەدى (20،9%).
«مامىر ايىندا جۇرگىزۋشىلەر (3،9 مىڭ بوس ورىن) جانە كۇزەتشىلەر (1،9 مىڭ بوس ورىن) ەڭ كوپ سۇرانىسقا يە بولدى. سونىمەن قاتار، مەديسينا قىزمەتكەرلەرىنە، اتاپ ايتقاندا دارىگەرلەرگە (2،5 مىڭ بوس جۇمىس ورنى جانە 857 تۇيىندەمە)، ورتا مەديسينا قىزمەتكەرلەرىنە (1،9 مىڭ بوس جۇمىس ورنى جانە 774 تۇيىندەمە) جانە سانيتارلارعا (1 مىڭ بوس جۇمىس ورنى جانە 327 تۇيىندەمە) دەگەن ۇلكەن قاجەتتىلىكتى اتاپ ءوتۋ قاجەت»، – دەپ حابارلادى «ەڭبەك رەسۋرستارىن دامىتۋ ورتالىعى» اق Cتراتەگيا دەپارتامەنتى ديرەكتورىنىڭ ورىنباسارى ۇلپان شەگەنوۆا.