قازاقستان پوليسياسىنا – 30 جىل
قازاق توپىراعىندا، قازاقى ورتادا وسىپ-ونگەن، قازاقتاي ەلدىڭ دارحاندىعى مەن قوناقجايلىلىعىن بويىنا سىڭىرگەن مۋستافايەۆ انار مەحتي-وگلى قازاقشا ماقالداتىپ سويلەگەندە، ارىپتەستەرىنىڭ ءوزى تاڭدانىسىپ قالادى.
الماتى قالاسى قىلمىستىق اتاقارۋ جۇيەسى دەپارتامەنتىنە قاراستى لا-155/6 مەكەمەسىندە قىزمەت ەتىپ جۇرگەن انار مەحتي-وگلى گرۋزيا جەرىندە كىندىك قانى تامعان، ۇلتى – ءازىربايجان، اناسى – قازاق.
الماتى قالاسىنداعى جوعارى وقۋ ورنىندا وقىپ، زاڭتانۋ ماماندىعىن جانە ماگيستراتۋراسىن بىتىرگەن. قازاق تىلىندە ەركىن سويلەيدى. مەملەكەتتىك تىلمەن بايلانىستى تالاي جارىستا توپ جارعان ازامات قۇقىق سالاسىنداعى العاشقى قىزمەتىن 2011 جىلى الماتى وبلىسىنا قاراستى لا-155/18 مەكەمەسىندە رەجيم جانە كۇزەت ءبولىمىنىڭ باقىلاۋشىسى بولىپ باستاعان. ودان سوڭ جاۋاپكەرشىلىگى مول جاس مامانعا وسى مەكەمەدەگى تاربيە بولىمىندە تاربيەشى-مامان قىزمەتى سەنىپ تاپسىرىلدى. باس بوستاندىعىنان ايىرىلعان، تەمىر توردا وتىرعان قىلمىسكەر ادامدارمەن ءتىل تابىسۋ، ولارمەن تۇسىنىك جۇمىستارىن جۇرگىزۋ، دۇرىس جولعا باعىتتاي ءبىلۋ ءۇشىن دە مامانعا ءبىلىم، بىلىك، ادامگەرشىلىك قاسيەتتەر كەرەك. بۇل قىزمەتتەن سوڭ لا-155/6 كولونياسىندا تاربيەشى جانە تەولوگ بولدى. قازىرگى كۇنى وسى مەكەمەدە رەجيم جانە كۇزەت ءبولىمىنىڭ، مەكەمە باستىعىنىڭ كەزەكشى كومەكشىسىنىڭ ورىنباسارى بولىپ، ادىلەت كاپيتانى شەنىندە قىزمەت ەتۋدە.
انار مەحتي-وگلى ءوز بولىمىندەگى قىزمەتكەرلەردىڭ ءاردايىم جيناقى، جىپتىكتەي بولىپ جۇرۋىنە، ناقتى جۇمىستاردىڭ ناقتى ناتيجەسى بولۋىنا ەرەكشە كوڭىل بولەدى. سول سەبەپتى دە بۇكىل ۇجىم الدىندا بەدەلدى. قۇقىق سالاسىندا 11 جىلدان استام تاجىريبەسى بار قىزمەتكەر قىلمىستىق-اتقارۋ جۇيەسىنە جاڭادان كەلگەن ماماندارعا تالىمگەر رەتىندە ءاردايىم بىلگەنىن ۇيرەتىپ، جول سىلتەپ، باعىت-باعدار كورسەتىپ، قامقورلىق كورسەتىپ وتىرادى.
جاقسى ادامنىڭ، جاقسى ماماننىڭ ەڭبەگى قاشان دا باعالانادى. تەمىردەي تارتىپكە توسەلگەن ادىلەت كاپيتانى ءمىنسىز ەڭبەگى ءۇشىن، قازاقستان پوليسياسىنىڭ 30 جىلدىق مەرەكەسىنە وراي قۇرمەتتى «پوليسيا» مەدالىمەن ماراپاتتالدى.
ىسىنە ادال، ورتاسىنا جۇعىمدى، قازاقستان دەگەن رۋحتى ەلدى قادىرلەيتىن انار مۋستافايەۆ – ۇلگىلى وتاعاسى. جارى ەكەۋى ءبىر قىز، ءبىر ۇل تاربيەلەپ وتىر.
وسىنداي مامانداردىڭ جاستارعا ۇلگى بولارى ءسوزسىز.