ەلىمىزدە ونلاين نەسيە الۋ قيىنداۋى مۇمكىن.
بۇل - قارجى نارىعىن رەتتەۋ جانە دامىتۋ اگەنتتىگىنىڭ ۇسىنىسى. قاشىقتان نەسيە راسىمدەۋ ءۇشىن، ەندى جەكە كۋالىكتەن بولەك، تاعى بىرنەشە قۇجاتتار تالاپ ەتىلمەك، دەپ حابارلايدى Almaty-akshamy.kz.
ستۋدەنت الىبەك جانداروۆ 3 جىل بۇرىن العاش رەت ونلاين نەسيە العان. قاجەت كەزدە جىلدام راسىمدەلگەن سوڭ، ونىڭ سانى دا كوبەيە بەرگەن. بۇگىنگى كۇنى 2 ملن. تەڭگەدەن اسا بەرەشەگى بار. تابىسىمنىڭ تەڭ جارتىسى نەسيە وتەۋگە كەتەدى دەيدى ول.
«ستۋدەنتپىن، قوسىمشا جۇمىس ىستەيمىن. باسىندا 20 مىڭنان باستاپ الدىم. كەيىن سانى 50-100-200-گە دەيىن كەتە بەردى. تاۋەلدىلىك كادىمگى. قيت ەتسە جۇگىنەسىڭ. تابىسىم 150 مىڭ، سونىڭ 80 مىڭىن كرەديت تولەيمىن. مەن سياقتىلار وتە كوپ، دوستارىمنىڭ باسىندا دا وسىنداي پروبلەما»، - دەيدى ستۋدەنت الىبەك جانداروۆ.
وتكەن ايدا الىبەك سياقتى 2،5 ملن قازاقستاندىقتىڭ باس-باسىنا كرەديت ءىلىندى. ولار بانكتەن جالپى سومماسى 1،2 ترلن تەڭگە قارىز العان. بۇل بۇرىن سوڭدى بولماعان رەكوردىق كورسەتكىش.
حالىق 130 ملرد تەڭگەگە اۆتونەسيە راسىمدەسە، 800 ملرد تەڭگە كەپىلسىز تۇتىنۋشىلىق نەسيە العان. نەگىزىنەن الماتى – (380 مىڭ ادام) استانا (216 مىڭ ادام) قالالارى مەن تۇركىستان – (210 مىڭ ادام) وبلىسىنىڭ تۇرعىندارى. ەكونوميستەر مۇنى جاقسى ۇردىسكە بالاپ وتىرعان جوق.
وسىنى ەسكەرگەن ماماندار ونلاين قارىزدىڭ تالابىن كۇشەيتۋدى كوزدەيدى.
ونلاين نەسيە تىپتەن وڭاي، ءارى جىلدام. بۇقارا ونىڭ ءتيىمدى ەكەنىن ايتتى. اقشا كەرەك كەزدە، ەشقايدا بارماي-اق، وتىرعان جەرىڭىزدە سايتقا كىرىپ كەرەكتى قاراجاتتى الا الاسىز. ءبىراق بۇل مۇمكىندىكتى الاياقتاردا پايدالانىپ، قىزىعىن كورىپ ءجۇر. سوندىقتان ساراپشىلار نەسيە بەرۋ تالاپتارى كۇشەيتىلگەنىن قولدايدى.
«ەندىگى ۇسىنىس، الدىمەن بيو سايكەستەندىرۋدەن ءوتۋ كەرەك. ونىڭ ەلەكتروندى سيفرلىق قولتاڭباسى بولۋ كەرەك. ءارتۇرلى فاكتوردان ءوتىپ بارىپ عانا، بۇرىنعىداي 5-10 مينۋت عانا ەمەس، ول 3-5 كۇنگە دەيىن ارتۋى مۇمكىن. دەمەك، بۇل ادامداردىڭ نەسيەگە دەگەن پسيحولوگيالىق كوز-قاراسى وزگەرەدى»، - ءديدى ساراپشى باۋىرجان ىسقاقوۆ.