سولتۇستىك قازاقستان وبلىسىندا بيىل 23 ءجاسوسپىرىم پسيحياتر-ناركولوگتىڭ جانە 18ء-ى پسيحولوگتىڭ كومەگىنە جۇگىندى، دەپ حابارلايدى Almaty-akshamy.kz Inform.kz-كە سىلتەمە جاساپ.
سقو قوعامدىق كەڭەستىڭ مۇشەسى، پەتروپاۆل قۇرىلىس-ەكونوميكالىق كوللەدجىنىڭ ديرەكتورى اعىباي كۇشىمبايەۆتىڭ ايتۋىنشا، جاستار اراسىندا پسيحوبەلسەندى زاتتارعا دەگەن قىزىعۋشىلىقتىڭ وسكەنىن بايقاۋعا بولادى. تاجىريبە كورسەتكەندەي، جاستاردىڭ ناشاقورلىققا كەلۋىنىڭ بىرنەشە سەبەبى بار.
«ونىڭ ءبىرى – سەنگىشتىك جانە ەلىكتەۋگە بەيىمدىلىك. ەكىنشىسى – وتباسىنداعى قارجىلىق قيىندىق، «جەڭىل اقشا» تابۋعا قۇشتارلىق. ماسەلەن، بىلىكتى جۇمىسشى كادرلار ءبولىمىنىڭ ستۋدەنتى ەسىرتكى زاتتارىن ساتىپ الۋ كەزىندە ۇستالدى. ول اڭگىمە بارىسىندا وسىلايشا اقشا تاپپاق بولعانىن ايتتى. جۇمىستى وعان تەلەگرامم كانالىندا ۇسىنعان. ستۋدەنت قولعا تۇسكەن كەزدە، ساراپتاما قورىتىندىسىنا سايكەس، ەسىرتكى تۇتىنباعان بولدى. سوتتىڭ شەشىمى بويىنشا وعان شارتتى تۇردە جازا كەسىلدى. ءقازىر ول 3 كۋرستا وقىپ جاتىر»، - دەيدى اعىباي كۇشىمبايەۆ.
ۇستازدىڭ ايتۋىنشا، جاستاردىڭ ءبىر توبى ەسىرتكى قولدانۋ ارقىلى قاتارلاستارىنىڭ اراسىندا ءوزىن تانىتادى.
«تەحنولوگيا ءبولىمىنىڭ ستۋدەنتى ەسىرتكى زاتتارىن قولدانىپ، مىنەز-قۇلقى وزگەردى. اتا-اناسىمەن جانجالداسىپ، اكەسىمەن توبەلەسەتىندى شىعاردى. ساباقتى قالدىردى. جىگىت ەسىرتكىگە جاقىن جاندارمەن ارالاستى. اكە-شەشەسى دە، جىگىت تە ماماننىڭ كومەگىنەن باس تارتتى. ەكى جاقتى كەلىسىممەن ستۋدەنت ءوز ەركىمەن اسكەرگە اتتاندى. بيىل اسكەردەن كەيىن كوللەدجدە «اسپاز» ماماندىعىن الىپ شىقتى»، - دەيدى كوللەدج ديرەكتورى.
ناشاقورلىققا اكەلەتىن تاعى ءبىر سەبەپ – وتباسىنداعى ماسكۇنەمدىك، اتا-انا مەن بالا اراسىندا سەنىمدى بايلانىستىڭ بولماۋى.
«ماتۆەي ەسىمدى ءجاسوسپىرىم بىزگە ارنايى ءوقۋ-بىلىم ورداسىنان كەلىپ، بىلىكتى جۇمىسشى كادرلار بولىمشەسىنە وقۋعا ءتۇستى. الايدا ساباققا سەبەپسىز كەلمەگەن كۇندەرى كوپ. الەۋمەتتىك-پسيحولوگيالىق قىزمەت بىرنەشە رەت ۇيىنە باردى، وسىنداي اڭگىمە بارىسىندا ستۋدەنتتىڭ وگەي اناسى جىگىتتىڭ اكەسى سياقتى ەسىرتكى قولداناتىنىن ايتتى. ستۋدەنتتىڭ اكەسى بالاسىن پسيحيكالىق دەنساۋلىق ورتالىعىنا اپارىپ ەمدەتۋدەن باس تارتتى. وسىعان بايلانىستى ءتيىستى شارالار قولدانىلدى. ماتۆەي ساباققا كەلمەگەنى ءۇشىن وقۋدان شىعارىلدى»، - دەيدى اعىباي كۇشىمبايەۆ.
ۇستازدىڭ ايتۋىنشا، اتا-انا تاراپىنان دۇرىس باقىلاۋدىڭ بولماۋى، ستۋدەنتتىڭ ءجيى ساباقتى قالدىرۋى، قيىن ومىرلىك جاعداي، كوبىنە ناشاقورلىقپەن اياقتالادى.
سقو دەنساۋلىق ساقتاۋ باسقارماسىنىڭ مالىمەتىنشە، بيىل 23 ءجاسوسپىرىم پسيحياتر-ناركولوگتىڭ جانە 18ء-ى پسيحولوگتىڭ كومەگىنە جۇگىنگەن.