الماتىدا جول اپاتىن بولدىرماي، قوعامدىق كولىك پەن جولاۋشىلاردى امان الىپ قالعان جۇرگىزۋشى ماراپاتتالدى، دەپ حابارلايدى Almaty-akshamy.kz Inform.kz-كە سىلتەمە جاساپ.
وقيعا 10 قازان كۇنى ساعات 10:30 شاماسىندا بولعان.
«قاسكەلەڭ اۆتوبۋس پاركى» ج ش س مالىمەتىنشە، سول كۇنى رايىمبەك داڭعىلى مەن ساين كوشەسىنىڭ قيىلىسىنداعى كوپىر ۇستىندە شىعىس باعىتتا كەلە جاتقان 23 اۆتوبۋستىڭ تەجەگىشىنىڭ جۇمىسى قيىنداعان.
«اۆتوبۋس تاڭەرتەڭ تولىق تەحنيكالىق تەكسەرۋدەن وتكەن سوڭ رەيسكە شىققان. وقيعا رەيستىڭ ەكىنشى اينالىمىندا بولعان. جۇرگىزۋشى دامير ۇزاقوۆتىڭ تاجىريبەسى مەن دەر كەزىندەگى ارەكەتى ارقاسىندا وقيعا كەزىندە زارداپ شەككەندەر بولعان جوق. اۆتوبۋس تەحنيكالىق جۇمىس جۇرگىزۋ ءۇشىن اۆتوپارككە جەتكىزىلدى. سونداي-اق، مۇنداي جاعدايدى قايتا بولدىرماس ءۇشىن پاركتىڭ بارلىق اۆتوبۋسىنا تەكسەرىس جۇرگىزىلدى»،- دەپ حابارلادى الماتى قالالىق موبيلدىلىك باسقارماسى.
ايتا كەتەيىك، جۇرگىزۋشى دامير ۇزاقوۆتى باسشىلىعى گراموتامەن ماراپاتتاپ، ءبىر ايدىڭ قورىتىندىسى بويىنشا سىياقى بەردى.
سونداي-اق، جەلى قولدانۋشىسى وقيعانىڭ قالاي بولعانى تۋرالى ۆيدەو ءتۇسىردى.