سىناقتاردى وتكىزۋدىڭ اشىقتىعىنا ۇلكەن ءمان بەرەدى.
جالپى ءبىلىم بەرەتىن پاندەر بويىنشا رەسپۋبليكالىق وليمپياداعا ەلىمىزدىڭ بارلىق وڭىرىنەن 2 070 وقۋشى قاتىسادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ق ر ءبىلىم جانە عىلىم مينيسترلىگى باسپا ءسوز قىزمەتىنىڭ مالىمەتتەرى بويىنشا، وليمپيادانىڭ قورىتىندى كەزەڭى 18 ساۋىردە باستالىپ، 23 ساۋىرگە دەيىن جالعاسادى.
1 107 وقۋشى جاراتىلىستانۋ-ماتەماتيكالىق باعىتتاعى پاندەر، ال 963 وقۋشى قوعامدىق-گۋمانيتارلىق باعىتتاعى پاندەر بويىنشا سىنعا تۇسەدى.
«قورىتىندى كەزەڭ وليمپيادانىڭ بارلىق الدىڭعى كەزەڭدەرى سياقتى Oqylyq.kz پلاتفورماسىندا ەلەكتروندى فورماتتا وتەدى. وزدەرىڭىز بايقاپ وتىرعانداي، ءبىلىم جانە عىلىم ءمينيسترى ۇبت، وليمپيادا جانە باسقا دا سىناقتاردى وتكىزۋدىڭ اشىقتىعىنا ۇلكەن ءمان بەرەدى. بىلتىر ءبىز العاش رەت رەسپۋبليكالىق كەزەڭدى ەلەكتروندى فورماتقا كوشىردىك. ءبىراق وبلىستىق كەزەڭدە زياتكەرلىك جارىستار قاعاز تۇرىندە وتكىزىلگەندىكتەن، ونىڭ قورىتىندىسىنا اتا-انالار تاراپىنان شاعىمدار ءتۇستى. ەندى وقۋشىلار اراسىنداعى رەسپۋبليكالىق وليمپيادانىڭ بارلىق كەزەڭىن وتكىزۋ پروسەسىنىڭ اشىقتىعىن قامتاماسىز ەتۋ ماقساتىندا سايىستار ەلەكتروندى فورماتتا وتكىزىلەدى. بۇل تاپسىرمالاردىڭ جاريالانىپ كەتۋ جانە بەلگىلى ءبىر قاتىسۋشىلاردىڭ مۇددەسىن قولداۋ ءقاۋپىن ازايتادى. بىلتىر حالىقارالىق وليمپيادالاردا رەكوردتىق مەدالعا قول جەتكىزدىك. ارينە، بۇل ءادىل ىرىكتەۋدىڭ ارقاسى. ەندى وسى جەتىستىكتەردى ودان سايىن كوبەيتۋ ءۇشىن اۋقىمدى جۇمىس اتقارامىز. ءتورتىنشى كەزەڭنىڭ جەڭىمپازدارى وليمپيادالىق رەزەرۆكە وتەدى جانە ولار ءۇشىن وقۋ-جاتتىعۋ جيىندارى ۇيىمداستىرىلاتىنىن ەسكەرتەمىن. ناتيجەسىندە IMO سياقتى اۋقىمدى حالىقارالىق وليمپيادالاردا قازاقستاننىڭ نامىسىن قورعايتىن ۇلتتىق قۇراما جاساقتالادى»، - دەدى ق ر بعم «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشوۆ.
وليمپيادانى اشىق، ءادىل وتكىزۋ ءۇشىن پروسەسس ونلاين-رەجيمدە بەينەباقىلاۋ جۇيەسىمەن قامتاماسىز ەتىلەدى. سونىمەن قاتار جارىستى مۇددەلى ەمەس تۇلعالار، ونىڭ ىشىندە «Adaldyq alańy» جوبالىق كەڭسەسىنىڭ قىزمەتكەرلەرى، اتا-انالار كوميتەتىنىڭ وكىلدەرى، جۋرناليستەر، عالىمدار مەن جوو وقىتۋشىلارى باقىلايدى.
ەستەرىڭىزگە سالا كەتەيىك، وليمپيادانىڭ مەكتەپ كەزەڭىنە 16 ءپان بويىنشا 266 805 وقۋشى، اۋداندىق كەزەڭدە 96 443، وبلىستىق كەزەڭدە 14 369 وقۋشى قاتىستى.
«وليمپيادا جەڭىمپازدارى مەن جۇلدەگەرلەرى تۋرالى تولىق اقپارات https://daryn.kz سايتىندا ورنالاستىرىلادى»، - دەلىنگەن حابارلامادا.