الماتىدا قالا اكىمى ەربولات دوسايەۆتىڭ توراعالىعىمەن مەردىگەرلىك ۇيىمدار باسشىلارىنىڭ، عىلىمي مەكەمەلەر مەن تەحنيكالىق قاداعالاۋ ماماندارىنىڭ، جول-قۇرىلىس ماتەريالدارىن جەتكىزۋشىلەردىڭ قاتىسۋىمەن قالانىڭ جول ينفراقۇرىلىمىن دامىتۋ ماسەلەلەرى جونىندە كەڭەس ءوتتى، دەپ حابارلايدى اlmaty-akshamy.kz.
كەڭەس بارىسىندا جول ينفراقۇرىلىمىن دامىتۋدىڭ 2022 جىلعا ارنالعان جۇمىس جوسپارىنىڭ ورىندالۋى تۋرالى ەسەپ تىڭدالدى. جوسپارعا جولايرىقتارىن سالۋ، كوشەلەردى ۇزارتۋ، جول سالۋ، ورتاشا جانە اعىمداعى جوندەۋ جۇمىستارىن جۇرگىزۋ، سونداي-اق جول قوزعالىسىن ۇيىمداستىرۋ جانە ت.ب. كىرەدى.
بۇگىندە قالا جولدارىندا وندىرىلەتىن جۇمىس تەحنولوگياسىن ساقتاۋ جانە جول-قۇرىلىس ماتەريالدارىنىڭ ساپاسى بويىنشا پروبلەمالار بار. پايدالانىلاتىن ماتەريالدار قوزعالىستىڭ ينتەنسيۆتىلىگىنە بايلانىستى جولعا تۇسەتىن جۇكتەمەنىڭ وسۋىنە توتەپ بەرە المايدى، بۇعان كوشەلەردەگى تۇراقتى اقاۋلار – پايدالانۋداعى اقپالار، ءتىپتى كەپىلدى قولدانۋ كەزىندەگى جولتابان، جارىقتار دالەل بولا الادى.
كەڭەستە جول قۇرىلىسى كەزىندەگى نەگىزگى بۇزۋشىلىقتار مەن جول ينفراقۇرىلىمىنىڭ اقاۋلارى تۋرالى باياندالدى. الماتى قالاسى بويىنشا جول اكتيۆتەرىنىڭ ساپاسى ۇلتتىق ورتالىعىنىڭ دەرەكتەرى بويىنشا وتكەن جىلى 1100 ينسپەكسيالىق جول ءجۇرۋدىڭ قورىتىندىسى بويىنشا جول-قۇرىلىس ماتەريالدارىنىڭ 3 مىڭعا جۋىق سىناماسى ىرىكتەلىپ، سىنالدى. ناتيجەسىندە 800 سىنامانىڭ (نەمەسە 27%) نورماتيۆتىك-تەحنيكالىق قۇجاتتاردىڭ تالاپتارىنا سايكەس كەلمەيتىنى انىقتالدى، جۇمىس جۇرگىزۋ تەحنولوگيالارىنىڭ بۇزىلاتىنى تىركەلدى. قالا باسشىسى مەردىگەرلىك ۇيىمدارعا كەپىلدىك مىندەتتەمەلەر اياسىندا جاسالعان بۇزۋشىلىقتاردى ءوز قاراجاتى ەسەبىنەن تولىق كولەمدە جانە بەكىتىلگەن مەرزىمدە جويۋدى تاپسىردى. بۇدان باسقا، جول اكتيۆتەرى ساپاسىنىڭ ۇلتتىق ورتالىعىنا ورىندالاتىن جۇمىستار مەن جول-قۇرىلىس ماتەريالدارىنىڭ ساپاسىن باقىلاۋ ءۇشىن ءىس-شارالاردى ۇلعايتۋ تاپسىرىلدى ءارى تەكسەرۋ ايماقتارى كەڭەيەتىن بولادى. ەگەر بۇرىن باقىلاۋ ايماعىنا تەك ماگيسترالدىق جولدار ەنەتىن بولسا، ەندى ەكىنشى دەڭگەيلى، كۆارتال ىشىندەگى جانە ۇيلەر اراسىنداعى جولدار دا باعالانادى. اكىم قاجەت بولعان جاعدايدا مۇنداي باقىلاۋ ءىس-شارالارىن قارجىلاندىرۋدى ۇلعايتۋدى قاراستىرۋعا دايىن ەكەنىن راستادى.
كەڭەس بارىسىندا ماسەلەلەردىڭ جەكە بلوگى جول ينفراقۇرىلىمىنىڭ قۇرىلىسى مەن قىزمەت كورسەتۋ ساپاسىن ارتتىرۋعا ارنالدى. قالا باسشىسى الەمدە بەلسەندى قولدانىلىپ جۇرگەن وزىق تەحنولوگيالار مەن زاماناۋي ماتەريالدارعا، مىسالى، پوليمەر نەگىزىندەگى بيتۋمدى پايدالانۋعا كوشۋ مۇمكىندىگىن قاراستىرۋدى تاپسىردى.
ەربولات دوسايەۆ سىرتقى ءتۇرى توزعان ءارى تەحنيكالىق جاعدايى قاناعاتتانعىسىز جول بەلگىلەرى مەن كونسترۋكسيالارىنىڭ جاعدايىن سىنادى. كوشەلەردە توت باسقان جانە ءوڭسىز تىرەكتەر، جول قورشاۋىنىڭ قيراعان قۇرىلىمدارى بار. ءجيى سىرلاۋ پراكتيكاسى ءتيىمسىز جانە قىمبات – مۇنداي تاسىلدەردى تۇبەگەيلى وزگەرتۋ قاجەت. مەردىگەرگە قازىرگى زامانعى بەرىك ماتەريالدارعا، مىرىشتالعان مەتالل بۇيىمدارعا كوشۋ تاپسىرىلدى. قالا باسشىسى سونداي-اق ەسكىرگەن باعدارشام وبەكتىلەرىن جاڭعىرتۋدىڭ ەكىنشى كەزەڭىن ىسكە اسىرۋ بويىنشا جۇمىستاردى جەدەلدەتۋدى تالاپ ەتتى.
الماتى اكىمى نارىقتىڭ تالاپتارىنا ساي بارلىق ۇسىنىستاردى پىسىقتاۋدى، سونداي-اق اعىمداعى جىلدىڭ 16 مامىرىنا دەيىن قۇرىلىس جۇمىستارىنىڭ ساپاسىن ارتتىرۋ ءۇشىن ستاندارتتار مەن ادىستەردى جەتىلدىرۋ بويىنشا ناقتى شەشىمدەردى ۇسىنۋدى تاپسىردى.
بۇگىندە الماتىنىڭ كوشە-جول جەلىسىنىڭ ۇزىندىعى 3096 كم قۇرايدى، ونىڭ 234 كم قاتتى جابىنى جوق. جاقسى جانە قاناعاتتانارلىق جاعدايداعى جولدار ۇلەسىنىڭ كورسەتكىشىن 95%-عا دەيىن جاقسارتۋ ءۇشىن 2025 جىلعا قاراي 290 كم جاڭا جول سالۋ، جىل سايىن ۇزىندىعى كەمىندە 200 كم جولدارعا ورتاشا جوندەۋ جانە 350 مىڭ شارشى مەتردەن استام اسفالتبەتون جابىنىنا اعىمداعى جوندەۋ جۇرگىزۋ جوسپارلانۋدا.