ماماندار اۋىل شارۋاشىلىعى جەرلەرى قاشان تولىق سيفرلاندىرىلاتىنىن ايتتى

بۇل جۇمىس ەكى جىلدا اياقتالادى.

اۋىل شارۋاشىلىعى جەرلەرىن سيفرلاندىرۋ جەدەلدەتىلەدى. بۇل تۋرالى سەناتتا اۋىل شارۋاشىلىعى ۆيسە-مينيسترى باعلان بەكباۋوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«مەملەكەت باسشىسىنىڭ جەردى اۋىل شارۋاشىلىعىنا تارتۋ جونىندەگى تاپسىرماسىنا سايكەس، جەردى قاشىقتان زوندتاۋ ارقىلى اۋىل شارۋاشىلىعى جەرلەرىن پايدالانۋ بويىنشا مەملەكەتتىك باقىلاۋدى جۇزەگە اسىرۋعا مۇمكىندىك بەرەتىن عارىش مونيتورينگى جۇيەسىنىڭ قاناتقاقتى جوباسى ءوتتى. وسى جوبانىڭ اياسىندا ءقازىر پيلوتتى وڭىرلەردىڭ عارىش مونيتورينگى قورىتىندىسى بويىنشا 8،3 ملن گەكتارعا تارتا پايدالانىلمايتىن جەر انىقتالىپ، ونىڭ ىشىندە 2،6 ملن گەكتار جايىلىم جەرى كەلىسكەن تۇردە مەملەكەت مەنشىگىنە قايتارىلدى. بۇل باعىتتاعى جۇمىستار ارى قاراي جالعاستىرىلىپ جاتىر»، - دەدى ب. بەكباۋوۆ سەناتتاعى سيفرلاندىرۋ تەحنولوگيالارىن اۋىل شارۋاشىلىعىنا ەندىرۋ تاقىرىبىنداعى دوڭگەلەك ۇستەل وتىرىسىندا.

ونىڭ ايتۋىنشا، قازىرگى كەزدە سيفرلاندىرۋعا ارنالعان ءارى تالاپ ەتىلەتىن اۋىل شارۋاشىلىعى جەرلەرىنىڭ 39 پايىزى سيفرلاندىرىلعان.

«قازىرگى تەحنولوگيالاردى قولدانا وتىرىپ، قالعان 61 پايىز جەر بولىگىن ءبىز 5 جىلدا سيفرلاندىرىپ، مەڭگەرەمىز دەپ جوسپارلاعان ەدىك. «قازاقستان عارىش ساپارى» ۇلتتىق كومپانياسىمەن بىرلەسكەن جۇمىستىڭ ناتيجەسىندە بۇل جۇمىستى ەكى جىلدا اياقتاماقپىز. ياعني بەس جىلدان ەكى جىلعا قىسقارتامىز»، - دەدى ۆيسە-مينيستر.