قالادا 240-قا تارتا وبەكت سەيسميكالىق تۇرعىدا كۇشەيتىلگەن.
جىل سايىن قالا مەن الماتى وبلىسىنىڭ اۋماعىندا ەكى جۇزگە جۋىق جەر سىلكىنىسى بولادى. بۇل تۋرالى مەگاپوليس حالقىمەن كەزدەسۋ بارىسىندا توتەنشە جاعدايلار ءمينيسترى يۋريي يلين ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتۋىنشا، بىلتىر توتەنشە جاعدايلار ءمينيسترى مەن سەيسمولوگيا ينستيتۋتى تاجىريبەلىك-ادىستەمەلىك ەكسپەديسيا وتكىزدى. ماماندار قالا مەن الماتى وبلىسىنىڭ اۋماعىندا زەرتتەۋلەر جۇرگىزەدى.
«قالا اۋماعىندا 17 باقىلاۋ ستانسياسى ورنالاسقان، 2023 جىلدىڭ سوڭىنا دەيىن 28 ستانسيا ورناتۋ جوسپاردا. اعىمداعى جىلى كۇشتى جەر سىلكىنىستەرى تۋرالى ەرتە حابارلاۋ جۇيەسىن ەنگىزۋ بويىنشا جۇمىس باستالدى. قازىرگى تاڭدا الماتى قالاسىنىڭ ماڭىندا «Darmen» ءموبيلدى قوسىمشاسىمەن ۇشتاسقان جەر سىلكىنىسى تۋرالى ەرتە حابارلاۋ جۇيەسىنىڭ 9 سەيسميكالىق ستانسياسى ورناتىلدى»،- دەدى ول.
ءمينيستردىڭ سوزىنشە، «Darmen» تج ءقاۋپى تۋرالى حالىقتى دەرەۋ حاباردار ەتۋگە مۇمكىندىك بەرەدى. مىسالى، ماگنيتۋداسى 4 بالل جانە ودان جوعارى جەر سىلكىنىسى كەزىندە سەيسموداچيكتەر ىسكە قوسىلعاندا ازاماتتاردىڭ سمارتفوندارىنا حابارلامالار اۆتوماتتى تۇردە جىبەرىلەدى.
«2000 جىلدان باستاپ 240-قا تارتا وبەكت سەيسميكالىق كۇشەيتىلدى، بيىل 7 ءبىلىم بەرۋ جانە دەنساۋلىق ساقتاۋ وبەكتىلەرىندە جۇمىستار اياقتالادى. اكىمدىكتىڭ قولداۋىمەن قۇلاقتاندىرۋ جۇيەسى جاڭعىرتىلىپ، ادامدار كوپ جينالاتىن عيماراتتار ءۇشىن سيفرلىق جابدىقتار ساتىپ الىندى. ەلىمىزدىڭ سەيسميكالىق قاۋىپسىزدىگىن قامتاماسىز ەتۋ جونىندەگى 2023 جىلعا دەيىنگى جول كارتاسىن ىسكە اسىرۋ جالعاسۋدا. وسىعان بايلانىستى، جەرگىلىكتى اتقارۋشى ورگانداردان جول كارتاسىن ۋاقتىلى ىسكە اسىرۋ بويىنشا قاجەتتى شارالار قابىلداۋدى سۇرايمىن»، - دەدى يۋريي يلين.