ماقسات - بالالار ادەبيەتىن دامىتۋ.
الماتىدا جازۋشىلارعا ارنالعان بايقاۋدىڭ جەڭىمپازدارى انىقتالدى، دەپ حابارلايدى Almaty-akshamy.kz.
«بالالار جىلى اياسىندا الماتى قالاسىندا ق ر اقپارات جانە قوعامدىق دامۋ مينيسترلىگىنىڭ «قازاقستاندىق قوعامدىق دامۋ ينستيتۋتى» كەاق جانە «قازاقستان جازۋشىلار وداعى» رقب قولداۋىمەن «التىن ساقا» بالالار ادەبيەتى شىعارمالارى رەسپۋبليكالىق بايقاۋىنىڭ جەڭىمپازدارى ماراپاتتالدى»،- دەلىنگەن اقپارات جانە قوعامدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
بايقاۋدىڭ ماقساتى – بالالار ادەبيەتىن دامىتۋ، قازاقستاندىق جاس قالامگەرلەرگە قولداۋ كورسەتۋ.
ءىس-شاراعا ق ر اقپارات جانە قوعامدىق دامۋ ۆيسە-مينيسترى دانيار قادىروۆ، «قازاقستاندىق قوعامدىق دامۋ ينستيتۋتى» كەاق باسقارما ءتوراعاسى قازبەك مايگەلدينوۆ، قازاقستاننىڭ ەڭبەك سىڭىرگەن قايراتكەرى، ق ر جازۋشىلار وداعىنىڭ ءتوراعاسى ۇلىقبەك ەسداۋلەت، ق ر مەملەكەتتىك «دارىن» جاستار سىيلىعىنىڭ يەگەرى، اقىن اقبەرەن ەلگەزەك، جازۋشى بەيبىت سارىباي، بالالار جازۋشىسى زاۋرە تورەحان، ق ر ەڭبەك سىڭىرگەن قايراتكەرلەرى، «پاراسات» جانە «قۇرمەت» وردەنىنىڭ يەگەرلەرى، حالىقارالىق «الاش» ادەبي سىيلىعىنىڭ لاۋرەاتتارى، زيالى قاۋىم وكىلدەرى مەن ەلىمىزگە بەلگىلى قالامگەرلەر قاتىستى.
«قازاق حالقى «تاربيە تال بەسىكتەن» دەپ بالانىڭ بولاشاعىنا ۇلكەن جاۋاپكەرشىلىكپەن قاراعان. سوندىقتان، بالا تاربيەسىنىڭ زامانۋي قۇرالدارى ارقىلى ءداستۇرىمىزدى، ۇلتتىق تاريح، ادەبيەت، مادەنيەتىمىزدى ناسيحاتتاپ، جاڭعىرتۋىمىز كەرەك»، - دەدى ۆيسە-مينيستر دانيار قادىروۆ.