بيىلعى جىلى سۋ تاپشىلىعى قايتادان باستالۋى مۇمكىن.
جەتىسۋ وڭىرىندەگى ماماندار ۆەگەتاسيالىق كەزەڭگە دايىندىق جۇمىستارىن جۇرگىزىپ جاتىر، دەپ حابارلايدى Almaty-akshamy.kz.
«بيىل الماتى وبلىسىندا اۋىل شارۋاشىلىعى داقىلدارىن سۋارۋ الاڭى 140 858،7 گەكتاردى قۇرايدى. وسىعان بايلانىستى "قازسۋشار" رمك 1 072 113،7 مىڭ تەكشە مەتر سۋارمالى سۋ جەتكىزۋدى جوسپارلاپ وتىر. كاسىپورىننىڭ باس ديرەكتورى التاي ەلجاسوۆ وڭىرگە جۇمىس ساپارى اياسىندا ۆەگەتاسيالىق كەزەڭگە دايىندىق بارىسىمەن تانىستى»، - دەلىنگەن ەكولوگيا مينيسترلىگىنىڭ باسپا ءسوز قىزمەتىنىڭ حابارلاماسىندا.
التاي ەلجاسوۆ الماتى وبلىسى اكىمىنىڭ ورىنباسارى الىبەك جاقانبايەۆپەن كەزدەسىپ، ونىمەن 2022 جىلعى ۆەگەتاسيالىق كەزەڭگە دايىندىق بويىنشا ءتيىستى ماسەلەلەردى تالقىلادى. كەڭەستەن كەيىن "قازسۋشار" رمك باس ديرەكتورى باستاعان جۇمىس توبى اقسۋ جانە ەسكەلدى اۋداندارىنا باردى. جۇمىس دەلەگاسياسى اقسۋ اۋدانىندا قۇرىلىس-مونتاج جۇمىستارىن جۇرگىزۋ ساپاسىن، اباتتاندىرۋ جانە "ەسكەلدى اۋدانىنىڭ سۋارۋ جەلىلەرىن قايتا جاڭارتۋ"وبەكتىسىن تاپسىرۋعا دايىندىق جۇمىستارىن تەكسەردى.
ايتا كەتەيىك، بۇگىنگى كۇنى "قازسۋشار" رمك الماتى فيليالى سۋ بەرۋ كولەمى - 342،364 ملن تەكشە مەتر سۋارمالى سۋدى جەتكىزۋ تۋرالى 3 مىڭنان استام شارت جاساستى، اۋدانى – 43406،5 گا، سۋ بەرۋ اقسۋ، پانفيلوۆ، ۇيعىر، شەڭگەلدى ۋچاسكەلەرىندە، سونداي-اق اقەشكى سۋ قويماسى اۋداندارىندا جۇرگىزىلۋدە.
قازىرگى ۋاقىتتا "قازسۋشار" رمك الماتى فيليالىنىڭ ماماندارى سۋ قويمالارىن تولتىرۋ جانە ىسكە قوسۋ بويىنشا كۇندەلىكتى باقىلاۋ جۇرگىزىپ، جوبالىق بەلگىلەرگە دەيىن سۋدىڭ جينالۋىن باقىلاۋ ءۇشىن سۋ قويمالارىنا تۇراقتى تۇردە بارادى. سونداي-اق، سۋ تاسقىنى كەزەڭىنە ارنالعان تاۋلىك بويى كەزەكشىلىك كەستەسى بەكىتىلدى.
بۇدان باسقا، يرريگاسيالىق ينفراقۇرىلىمدى 2022 جىلدىڭ ۆەگەتاسيالىق كەزەڭىنە دايىنداۋ ءۇشىن 36 گيدروتەحنيكالىق قۇرىلىستى (گتق) جانە 23 گيدرومەتريالىق بەكەتتى (گمب) جوندەۋ جانە سالۋ، ۇزىندىعى 22،2 كم جانە كولەمى شامامەن 80-90 مىڭ تەكشە مەتر ارنالاردى مەحانيكالاندىرىلعان تازارتۋ جۇمىستارى جۇرگىزىلۋدە. سونداي-اق، قاپتالعان كانالدار جوندەلەدى: قاجەت بولعان جاعدايدا ولاردىڭ ءتۇبىن بەتونداۋ، قابىرعالاردى ۇلعايتۋ، بۋىنداردى بەتون ەرىتىندىسىمەن تىعىزداۋ.
انىقتاما ءۇشىن، 2021 جىلى "قازسۋشار" رمك الماتى فيليالى 23 گتق جانە 15 گمب جوندەپ، جالپى ۇزىندىعى 65،25 كم كانالداردى مەحانيكالاندىرىلعان تازارتۋ جۇمىستارىن جۇرگىزگەن.
سونىمەن قاتار، الماتى وبلىسىنىڭ ءار اۋدانىندا اعىمداعى جىلدىڭ 25 قاڭتارى مەن 2 اقپانى ارالىعىندا "قازسۋشار" رمك فيليالىنىڭ ماماندارى جەرگىلىكتى اتقارۋشى ورگانداردىڭ قاتىسۋىمەن ۆەتەگاسيالىق كەزەڭگە دايىندىق بويىنشا اۋىل شارۋاشىلىعى تاۋارىن وندىرۋشىلەرمەن سەمينار-كەڭەستەر وتكىزدى. ىشكى شارۋاشىلىق ارنالاردى مەحانيكالاندىرىلعان تازالاۋ جۇرگىزۋ جانە اۋىل شارۋاشىلىعى داقىلدارىن ەگۋگە ارنالعان سۋارۋ الاڭدارىن جوسپارلاۋ قاجەتتىلىگى تۋرالى اۋقىمدى اقپاراتتىق جۇمىس جۇرگىزىلۋدە.
جۇمىس ساپارىنىڭ قورىتىندىسى بويىنشا "قازسۋشار" رمك الماتى فيليالىنىڭ كەڭسەسىندە باس ديرەكتور التاي ەلجاسوۆ بارلىق جاۋاپتى ۇيىمداردىڭ وكىلدەرىمەن كەڭەس وتكىزدى، وندا ءوڭىردىڭ سۋ شارۋاشىلىعى بويىنشا ماماندارعا ءبىرقاتار تاپسىرمالار بەردى.
اتاپ ايتقاندا، يسلام دامۋ بانكى (يدب) جەلىسى بويىنشا ىسكە اسىرىلاتىن" الماتى وبلىسى اقسۋ اۋدانىنىڭ سۋارۋ جەلىلەرىن قايتا جاڭارتۋ " جوباسى بويىنشا قۇرىلىس-مونتاجداۋ جۇمىستارىنىڭ بارىسىنا باقىلاۋدى كۇشەيتۋ، قۇرىلىس وبەكتىسىندەگى ارنايى تەحنيكا مەن جۇمىس رەسۋرستارىنىڭ سانىن ۇلعايتۋ، ولاردى بەلگىلەنگەن مەرزىمدە اياقتاۋ ءۇشىن جۇمىس قارقىنىن جەدەلدەتۋ تاپسىرىلدى.
سونداي-اق، "الماتى وبلىسى ەسكەلدى اۋدانىنىڭ سۋارۋ جەلىلەرىن قايتا جاڭارتۋ" جوباسى بويىنشا 2022 جىلدىڭ 25 مامىرىنا دەيىن مەردىگەر ۇيىم "اساتاي" ج ش س بارلىق ەسكەرتۋلەردى جويىپ، نىساندى پايدالانۋعا بەرۋ ءۇشىن تولىق قۇجاتتامانى دايىنداۋى ءتيىس.
كوكسۋ اۋدانىنىڭ سۋارۋ جەلىلەرىن قايتا قۇرۋ بويىنشا جسق دايىندالۋى ءتيىس. سونداي-اق، وسى جوبا بويىنشا مەردىگەردى انىقتاۋ بويىنشا كونكۋرس جاريالانادى.
ايتا كەتەيىك، "قازگيدرومەت" رمك-نىڭ 01.03.2022 ج. ارنالعان كونسۋلتاتيۆتىك گيدرولوگيالىق بولجامىنا سايكەس، الماتى وبلىسىنىڭ تاۋ وزەندەرىنىڭ باسسەيندەرىندەگى قار قورى كوپ جىلدىق قورلارمەن سالىستىرعاندا نورمادان 24-32%-عا تومەن. وسىعان بايلانىستى بيىلعى جىلى سۋ تاپشىلىعى قايتادان باستالۋى مۇمكىن.