مونوپولياسىزداندىرۋ جانە ىقتيمال شىعىندى وتەۋ ماقساتىندا الماتى اكىمدىگىنە كومپانيا يەلەرىنەن «الماتى سپەستەحپاركينگ سەرۆيس» ءجشس-نىڭ 70% مولشەرىندەگى ۇلەسىن جانە «Alan Parking» ءجشس-نىڭ 100% ۇلەسىن قالا مەنشىگىنە قايتارۋ تۋرالى ۇسىنىس ءتۇستى، دەپ حابارلايدى اlmaty-akshamy.kz.
«الماتى سپەستەحپاركينگ سەرۆيس» ج ش س ءبىرىڭعاي وپەراتور رەتىندە قالانىڭ 5 اۋدانىندا (المالى، بوستاندىق، جەتىسۋ، مەدەۋ، تۇركسىب) ورنالاسقان تروتۋار تۇراقتارىنا قىزمەت كورسەتۋگە ماماندانعان. اكىمدىككە وسى ءجشس-نىڭ 30% تيەسىلى.
«AlanParking» ج ش س 3 اۋداندا (الاتاۋ، بوستاندىق، جەتىسۋ) ورنالاسقان الاڭداعى اۆتوتۇراقتارعا قىزمەت كورسەتۋ جونىندەگى ءبىرىڭعاي وپەراتور بولىپ تابىلادى. ج ش س تولىعىمەن جەكە مەنشىكتە بولدى.
الماتى اكىمدىگى قولدانىستاعى زاڭناماعا سايكەس، جوعارىدا كورسەتىلگەن كومپانيالارداعى ۇلەستەردى قايتارۋ تۋرالى ءتيىستى قاۋلى قابىلدادى. بۇگىندە اقىلى تۇراق جۇيەسى شتاتتىق رەجيمدە جۇمىس ىستەيدى. قاۋلىعا سايكەس، اقىلى تۇراقتار قىزمەتىنەن تۇسكەن بارلىق كىرىس اعىمداعى جىلدىڭ 25 ساۋىرىنەن باستاپ قالا بيۋدجەتىنە باعىتتالاتىن بولادى.
قازىرگى ۋاقىتتا الماتى اكىمدىگى قالانىڭ تۇراق ايماعىن ۇيىمداستىرۋ جونىندە ءبىرىڭعاي وپەراتور قۇرۋ بويىنشا جۇمىستى باستادى. قولدانىستاعى زاڭنامادا بەلگىلەنگەن رۇقسات بەرۋ قۇجاتتارىن الۋ مەرزىمدەرىن، سونداي-اق مونوپولياعا قارسى ورگاندارمەن كەلىسۋ قاجەتتىلىگىن ەسكەرە وتىرىپ، ءبىرىڭعاي وپەراتور 2022 جىلعى 1 تامىزعا دەيىن قۇرىلاتىن بولادى.
الماتى تۇرعىندارىنىڭ شاعىمدارى نەگىزىندە سەرۆيس ساپاسىن ارتتىرۋ ماقساتىندا اقىلى تۇراقتار جۇمىسىن جەتىلدىرۋ ءۇشىن كەشەندى شارالار قابىلدانادى.
الداعى ۋاقىتتا حالىقارالىق تاجىريبەنى قولدانا وتىرىپ، قالالىق تۇراق كەڭىستىگىن دامىتۋ جانە كوشەلەر مەن اۋلالاردى اباتتاندىرۋ ءۇشىن اقىلى تۇراقتاردان تۇسەتىن تۇسىمدەردى پايدالانۋ تۇجىرىمداماسىن ازىرلەۋ جوسپارلانۋدا. سونداي-اق، جيناقتالعان پروبلەمالاردى شەشۋ ءۇشىن قالادا كوپ دەڭگەيلى تۇراقتار سالۋ باسىمدىققا يە بولادى.
الماتىدا اقىلى اۆتوتۇراق جۇيەسى العاش رەت 2016 جىلى ەنگىزىلدى. جوعارىدا اتالعان كومپانيالاردىڭ اقپاراتى بويىنشا، اقىلى تۇراقتاردان قارجى اينالىمى جىلىنا ورتا ەسەپپەن 1،4 ملرد تەڭگەنى قۇرادى.
قازىرگى ۋاقىتتا كومپانيا باسشىلارىنا قاتىستى قىلمىستىق ءىس قوزعالدى جانە بيۋدجەت قاراجاتىن ۇرلاۋمەن بايلانىستى تەرگەۋ امالدارى جۇرگىزىلۋدە.