ولار ءۇشىن «بيل»، «دارىن» سياقتى مەكتەپتەرگە كۆوتا بولىنەدى.
وقۋ-اعارتۋ ءمينيسترى اسحات ايماعامبەتوۆ الەۋمەتتىك وسال وتباسىلاردان شىققان بالالارعا مامانداندىرىلعان مەكتەپتەرگە ءتۇسۋ ءۇشىن 15 پايىز كۆوتا الۋعا مۇمكىندىك بەرەتىن بۇيرىققا قول قويدى، دەپ حابارلايدى Almaty-akshamy.kz
«ەندى وسىنداي وتباسىلاردان شىققان 1500-عا دەيىن بالا جاڭا كۆوتا بويىنشا «بيل»، «دارىن» جانە ت.ب. مەكتەپتەرگە وقۋعا تۇسە الادى. بۇگىنگى تاڭدا جاڭا بۇيرىقتىڭ ارقاسىندا الەۋمەتتىك وسال وتباسىلاردان شىققان بالالار وسىنداي مامانداندىرىلعان مەكتەپتەرگە قابىلداندى»، - دەپ جازدى ايماعامبەتوۆ Facebook-تەگى جەكە پاراقشاسىندا.
ءمينيستردىڭ ايتۋىنشا، تۇرمىسى تومەن بولعاندىقتان قوسىمشا ءبىلىم الۋعا مۇمكىندىگى جوق بالالار ءۇشىن وسىنداي مەكتەپتەردە وقۋعا مۇمكىندىك بەرۋ ولاردىڭ بولاشاقتاعى جەتىستىكتەرىنە وڭ اسەر ەتەدى.
ول بۇعان دەيىن ۇلتتىق قوعامدىق سەنىم كەڭەسىنىڭ ۇسىنىستارى اياسىندا كوللەدجدەر مەن جوعارى وقۋ ورىندارىنا تۇسۋگە وسىعان ۇقساس كۆوتالار ەنگىزىلگەنىن اتاپ ءوتتى. سول شەشىمنىڭ ارقاسىندا مىڭداعان بالالار وقۋعا ءتۇستى.
«ءبىز جاس دارىندارعا دا، ءوزىن ءالى كورسەتە الماعاندارعا دا تەڭ جاعداي جاساۋىمىز كەرەك. ال ۇستازدارىمىز وزات بالالارعا دا، وقۋدا ۇلگەرىمى ناشار بولسا دا، قولداۋ مەن جىلى سوزگە مۇقتاج بالالارعا دا مەيىرىممەن قارايدى دەپ ۇمىتتەنەمىن»، دەپ جازدى اسحات ايماعامبەتوۆ.