كەزدەسۋ مەملەكەت باسشىسىنىڭ IV ۇلتتىق قۇرىلتايدا ايتقان يدەيالارى مەن تۇجىرىمدارىنا ارنالدى. جيىنعا قاتىسۋشىلار ۇلتتىق يدەولوگيا، مادەني مۇرا جانە قوعامدىق سانانى جاڭعىرتۋ ماسەلەلەرىن تالقىلادى.
كەزدەسۋدە قازاقستان جازۋشىلار وداعىنىڭ ءتوراعاسى مەرەكە قۇلكەنوۆ مەملەكەت باسشىسىنىڭ ۇلتتىق قۇرىلتايدا ايتقان باستامالارىنا توقتالىپ، ونىڭ يدەولوگياعا، ۇلتتىق قۇندىلىقتار مەن تاربيەگە قاتىستى ۇستانىمدارىنا جوعارى باعا بەردى. ول ۇلت زيالىلارىنىڭ، اسىرەسە قانىش ساتبايەۆ سياقتى رۋحاني تۇلعالاردىڭ ەل بولاشاعى ءۇشىن جاساعان ەڭبەكتەرىن ۇلگى ەتە وتىرىپ، قازىرگى قوعامعا دا سونداي جاناشىرلىق قاجەت ەكەنىن اتاپ ءوتتى.
سونداي-اق، مەرەكە قۇلكەنوۆ 23 ءساۋىردىڭ ۇلتتىق كىتاپ كۇنى رەتىندە بەلگىلەنۋىن ماڭىزدى باستاما دەپ باعالاپ، كىتاپ پەن مەرزىمدى باسىلىمداردىڭ قوعامدىق ساناعا اسەرى تۋرالى وي قوزعادى.
جيىندا قالالىق دەنساۋلىق ساقتاۋ جانە سپورت سالاسىنىڭ وكىلدەرى دە ءسوز سويلەپ، مەملەكەت باسشىسىنىڭ ءسوزىن تولىق قولدايتىندارىن ءبىلدىردى. ولار قازىرگى تاڭدا جۇزەگە اسىرىلىپ جاتقان مەملەكەتتىك باعدارلامالار اياسىندا قول جەتكىزىلگەن جەتىستىكتەر مەن جاڭا باستامالار جونىندە باياندادى. الماتى قالاسىنىڭ اكىمدىگى تاراپىنان كورسەتىلىپ جاتقان قولداۋ مەن ينفراقۇرىلىمدىق جوبالار دەنساۋلىق ساقتاۋ مەن سپورت سالالارىن دامىتۋدا ۇلكەن سەرپىن بەرىپ وتىر.
كەزدەسۋدىڭ نەگىزگى بايانداماشىلارىنىڭ ءبىرى – ق ر پرەزيدەنتىنىڭ كەڭەسشىسى مالىك وتاربايەۆ بولدى. ول ءوز سوزىندە مەملەكەت باسشىسىنىڭ يدەولوگيالىق باعىتى مەن مەملەكەتتىك رەفورمالار جايلى كەڭىنەن ايتىپ، ادىلدىك، ساباقتاستىق جانە ورلەۋ قاعيداتتارى توڭىرەگىندەگى يدەيالاردى تالدادى.
ول سونداي-اق، حالقىمىزدىڭ ساق داۋىرىنەن باستاۋ الاتىن باي تاريحىن تەك وتكەننىڭ كولەڭكەسىندە ەمەس، بۇگىنگى كۇننىڭ نۇرلى كەلبەتىمەن ۇيلەستىرە قاراپ، ۇلتتىق قۇندىلىقتاردى دارىپتەۋ قاجەت ەكەنىن جەتكىزدى. مالىك نۇرجان ۇلى "ءبىرتۇتاس ۇلت" جانە "بىرەگەي حالىق" ۇعىمدارىنىڭ قازىرگى تاڭدا بۇرىنعىدان دا وزەكتى ەكەنىن اتاپ ءوتتى.
الماتىدا وتكەن بۇل كەزدەسۋ – مەملەكەت باسشىسىنىڭ ۇلتتىق قۇرىلتايداعى باستامالارىن جەرگىلىكتى دەڭگەيدە ءتۇسىندىرۋ جانە قولداۋ شارالارىنىڭ ءبىر كورىنىسى. ۇلتتىق يدەولوگيانى نىعايتۋ، مادەنيەت پەن رۋحانياتتى دامىتۋ، حالىقتىڭ الەۋمەتتىك سالالارعا دەگەن سەنىمىن ارتتىرۋ – بۇگىنگى كۇننىڭ باستى مىندەتى بولىپ قالا بەرەدى. ەل بىرلىگى مەن تاريحي جادى – ۇلت بولاشاعىنىڭ مىزعىماس نەگىزى ەكەنىن جيىن قاتىسۋشىلارى تاعى ءبىر مارتە ەسكە سالدى.
