ساياحاتشىلار ساپارلايتىن ايلاردى دۇرىس تاڭداسا، مالديۆ ارالدارىنا 85% جەڭىلدىكپەن بارا الادى.
Travel + Leisure مالىمەتىنشە، 2023 جىلدىڭ سوڭىندا Bounce زەرتتەۋ ناتيجەلەرىن جاريالادى. وندا الەمنىڭ تانىمال تۋريستىك باعىتتارىنىڭ ەڭ ارزان كەزەڭدەرى كورسەتىلگەن.
ناقتى مەرزىمدى انىقتاۋ ءۇشىن Bounce 70 تانىمال تۋريستىك ورىننىڭ ءتىزىمىن جاساقتادى. سودان كەيىن جىل ايلارى مەن اپتا كۇندەرى بويىنشا ءقوناقۇيدىڭ ورتاشا قۇنىن تابۋ ءۇشىن Kayak تۋريستىك ىزدەۋ جۇيەسىن پايدالاندى. وسى مالىمەتتەردىڭ نەگىزىندە جىلدىڭ ەڭ ارزان جانە ەڭ قىمبات ايلارىندا ءۇش جۇلدىزدى ءقوناقۇيدىڭ ورتاشا باعا ايىرماشىلىعىن ەسەپتەدى.
Bounce دەرەكتەردى تالداۋ بارىسىندا جىل مەزگىلى ساياحات قۇنىنا قالاي اسەر ەتەتىنىن زەردەلەي كەلە "قاڭتار - ەڭ ارزان اي" دەگەن قورىتىندىعا كەلدى. ياعني قاڭتار ايىندا اقشاڭىزدى ۇنەمدەپ، 15 ءتۇرلى قالادا تومەن باعادا دەمالا الاسىز. بۇلاردىڭ قاتارىندا لوندون، امستەردام جانە بەرلين سياقتى تانىمال تۋريستىك باعىتتار بار.
ەكىنشى ورىنعا اقپان ايى تۇراقتادى. ءدال وسى ايدا نيۋ-يورك، پاريج جانە ميلاندى قوسا العاندا، 12 ءتۇرلى قالادا تومەن باعادا ساياحاتتاۋعا بولادى. سونداي-اق مالديۆ ارالدارى سياقتى قىمبات باعىتتاردى تاڭداعان ساياحاتشىلار قاڭتاردان تامىز ايىنا دەيىن بارسا، 85 پايىزعا دەيىن ۇنەمدەي الادى.
ەندى ساياحاتتاۋ ارزانعا تۇسەتىن كۇندەرگە كەلەر بولساق، زەرتتەۋ قورىتىندىسى تاڭعالتپاي قويمايدى. سەبەبى كوپتەگەن ادامدا سەنبى كۇنى ساياحاتقا شىعۋ قىمباتقا تۇسەدى دەگەن پىكىر قالىپتاسقان. سونىمەن تۋريستەر سەنبىدە لاس-ۆەگاس، دۋبلين جانە ميلان سياقتى ورىنداردى قوسا العاندا، 17 قالادا ەڭ ارزان باعادا تۇرا الادى ەكەن.
"بۇل ءارتۇرلى فاكتورلارعا بايلانىستى بولۋى مۇمكىن. ونىڭ ىشىندە دەمالىس كۇندەرى ءىسساپارلارعا سۇرانىستىڭ تومەندىگى دە اسەر ەتۋى ىقتيمال. 2022 جىلعى زەرتتەۋىمىزدە دە سەنبى - ەڭ ارزان كۇن بولدى"، - دەپ اتاپ ءوتتى كومپانيا.
جەكسەنبى، جۇما جانە دۇيسەنبى كۇندەرى ەكىنشى ورىننان كورىندى. اپتانىڭ ءدال وسى كۇندەرى پراگا، بارسەلونا، ريم، سينگاپۋر جانە مايامي سياقتى ءىرى باعىتتاردى قوسا العاندا، 10 ءتۇرلى قالاعا ءتيىمدى باعادا ساياحاتتاۋعا بولادى.