AirAsia X (AAX) كۋالا-لۋمپۋردان الماتىعا دەيىنگى العاشقى تىكەلەي رەيسىن ءساتتى ىسكە قوستى. بۇل جاڭالىقتى مەرەكەلى ءىس-شارادا اتاپ وتكەننەن كەيىن، Air Asia X «Kazakh Tourism» ۇلتتىق كومپانياسىمەن ستراتەگيالىق ىنتىماقتاستىق بويىنشا ءوزارا تۇسىنىستىك تۋرالى مەموراندۋمعا قول قويدى.
مەموراندۋم قازاقستان مەن مالايزيا اراسىنداعى ءتۋريزمدى ىلگەرىلەتۋ بارىسىنداعى اۋە كومپانياسى مەن ۇيىم اراسىنداعى كوممەرسيالىق ىنتىماقتاستىقتى كەڭەيتۋدى كوزدەيدى. سونداي-اق، مەموراندۋم بيزنەس ءۇشىن جاڭا مۇمكىندىكتەر اشۋعا، بىرلەسكەن ساتۋ مەن ماركەتينگتىك ناۋقانداردى دامىتۋعا، وعان قوسا، تۋريزم ارقىلى ەكى ەلدىڭ ەكونوميكاسىن ىنتالاندىرۋعا كومەكتەسەدى.
ستراتەگيالىق سەرىكتەس رەتىندە AirAsia الماتىعا مالايزيا مەن وڭتۇستىك-شىعىس ازيا ەلدەرىنەن ساياحاتشىلار اكەلىپ قانا قويماي، كۋالا-لۋمپۋر ارقىلى قازاقستاندىق تۋريستەر ءۇشىن اتاپ وتىلگەن ايماق بويىنشا 130 جاڭا باعىت اشادى. كومپانيالار بىرلەسكەن كونفەرەنسيالار، تۋريستىك كورمەلەر مەن باسقا دا ءىس-شارالار ارقىلى وڭتۇستىك-شىعىس ازيادا مالايزيا مەن قازاقستاننىڭ تۋريستىك ونىمدەرىن دامىتۋدى كوزدەيدى.
ءوزارا تۇسىنىستىك تۋرالى مەموراندۋمعا AirAsia X كومپانياسىنىڭ باس ديرەكتورى بەنيامين يسمايل مەن «Kazakh Tourism» اق باسقارما ءتوراعاسى قايرات ءسادۋاقاسوۆ قول قويدى. سونىمەن قاتار سالتاناتتى شاراعا مالايزيانىڭ قازاقستانداعى ەلشىسى جوعارى مارتەبەلى موحدا ادلي بين ابدۋللا؛ Capital A اتقارۋشى ءتوراعاسى داتۋك كامارۋدين مەرانۋن؛ جانە AirAsia X ءتوراعاسى داتو فام لي ي قاتىستى. سونداي-اق الماتى حالىقارالىق اۋەجايىنىڭ، قازاقستاننىڭ ازاماتتىق اۆياسيا باسقارماسىنىڭ وكىلدەرى مەن سالانىڭ باسقا دا ماماندارى قاتىستى.
بەنيامين يسمايل، AirAsia X كومپانياسىنىڭ باس ديرەكتورى:
«بۇل ستراتەگيالىق وداق مالايزيا ءۇشىن دە، قازاقستان ءۇشىن دە ماڭىزدى قادام بولىپ تابىلادى. بۇل ساياحات ساپاسىن جاقسارتۋ عانا ەمەس، سونىمەن قاتار ءبىزدىڭ ەكونوميكامىزدى قولداۋعا باعىتتالعان ءىس. ءبىز قايدا ۇشساق تا، ءبىزدىڭ باسەكەگە قابىلەتتى تاريفتەرىمىز اۋە ساياحاتىن ىنتالاندىرىپ، جۇمىس ورىندارىن قۇرۋ مەن ەكونوميكالىق ءوسۋدىڭ نەگىزگى قوزعالتقىشى بولىپ تابىلاتىن تۋريزم سەكتورىنا ۇلكەن ىقپال ەتەدى».
قايرات ءسادۋاقاسوۆ، «Kazakh Tourism» كومپانياسىنىڭ باسقارما ءتوراعاسى:
«ءبىز AAXء-تى ەلىمىزدە قارسى الۋعا قۋانىشتىمىز. Air Asia-نىڭ ءبىزدىڭ نارىققا شىعۋى قازاقستان ءۇشىن عانا ەمەس، بۇكىل ورتالىق ازيا ايماعى ءۇشىن ماڭىزدى. AAX-پەن ىنتىماقتاستىق جەمىستى بولىپ، ماڭىزدى ساۋدا، كوممەرسيالىق، مادەني جانە ءبىلىم بەرۋ الماسۋلارىنا ىقپال ەتەدى دەگەن ۇمىتتەمىز».
ەكى باعىتتاعى ءتۋريزمدى دامىتۋ ماقساتىندا AAX اپتاسىنا 4 رەت جيىلىكپەن كۋالا-لۋمپۋر-الماتى جانە الماتى-كۋالا-لۋمپۋر باعىتتارىندا رەيستەردى ىسكە قوستى. ۇشاقتار ءار سەيسەنبى، بەيسەنبى، سەنبى جانە جەكسەنبى كۇندەرى ۇشاتىن بولادى.
AAXء-تىڭ كۋالا-لۋمپۋردان الماتىعا العاشقى رەيسى 2024 جىلدىڭ 14 ناۋرىزىندا 90%-دان جوعارى جۇكتەمە كوەففيسيەنتىمەن قوندى. بۇل اۋە كومپانياسى تاراپىنان ورتالىق ازيانىڭ ءدال جۇرەگىنە جاسالعان ۇلكەن قادام. سول كۇنى اۋە كومپانياسى الماتىدان كۋالا-لۋمپۋرعا جۇكتەردىڭ 80 پايىزدان استامىن تاسىمالدادى. بۇل كومپانيانىڭ ايماقتاعى جۇمىسىنىڭ ءساتتى باستالعانىن كورسەتەدى.