22 مال ۇرلىعى جانە بۇرىن جاسالعان 115 قىلمىس اشىلدى.
589 مال باسى تابىلىپ، زاڭدى يەلەرىنە قايتارىلدى، دەپ حابارلايدى Almaty-akshamy.kz
Polisia.kz سايتىنىڭ مالىمەتى بويىنشا، جاقىندا ءىىم ءۇش مىڭنان استام پوليسيا قىزمەتكەرى مەن 200-دەن استام اۋىل شارۋاشىلىعى جانە ۆەتەريناريالىق باقىلاۋ باسقارمالارىنىڭ ماماندارىن تارتا وتىرىپ، كەزەكتى “مال ۇرلىعى” جەدەل الدىن الۋ شاراسىن وتكىزىلدى. وپەراسيانىڭ ءتورت كۇنىندە مال جانە ەت ونىمدەرىن تاسىمالدايتىن 11 695 اۆتوكولىك، 4 226 مال جانە ەت ونىمدەرىن ساتىپ الۋ، وتكىزۋ ورىندارى، سونداي-اق 8 708 شارۋا قوجالىقتارى مەن مال جايىلىمدارى تەكسەرىلدى. بۇل رەتتە 22 مال ۇرلىعى جانە بۇرىن جاسالعان 115 قىلمىس اشىلدى. وسى قىلمىستى جاساعانى ءۇشىن 136 ادام ۇستالدى، ونىڭ ىشىندە 19 ۇيىمداسقان توپ بار. 589 مال باسى تابىلىپ، زاڭدى يەلەرىنە قايتارىلدى.
«ماسەلەن، الماتى وبلىسى پد قىزمەتكەرلەرى ءتورت ادامنان تۇراتىن مال ۇرلاۋشىلار توبىنىڭ قىلمىستىق ارەكەتىن توقتاتتى، ولار ەركىن جايىلىمنان بىرنەشە رەت مال ۇرلىعىن جاساعان. وتكەن جىلعى قىركۇيەكتەن باستاپ ولار 30-دان استام جىلقى ۇرلاعان. بارلىق جاعدايدا قىلمىسكەرلەر ۇرلانعان مال باستارىن الدىن-الا جالدانعان اۋىر جۇك كولىكتەرىمەن الىپ كەتكەن. كۇنى كەشە عانا شىعىس قازاقستان وبلىسىنىڭ ۇلان اۋدانىندا ەكى رەت مال ۇرلىعىن جاساعان كۇدىكتى ۇستالدى. ۇرلانعان 22 جىلقىنى ۇستاۋ جانە تاركىلەۋ الماتى وبلىسى ۇزىناعاش اۋدانىنىڭ اۋماعىندا جۇرگىزىلدى»، – دەدى ءىىم كريمينالدىق پوليسيا دەپارتامەنتىنىڭ باستىعى ايدوس رىسبايەۆ.
سونىمەن قاتار ۆەتەريناريا سالاسىندا 864 قۇقىق بۇزۋشىلىق انىقتالدى. اتاپ ايتقاندا، ءتيىستى قۇجاتتارسىز مال جانە ەت ونىمدەرىن تاسىمالداۋ جانە ساتۋ فاكتىلەرى ورىن العان.
«بۇرىن قابىلدانعان زاڭنامالىق سيپاتتاعى شارالارعا توقتالساق، قىلمىستىق كودەكسكە “مال ۇرلىعى” جەكە باپ رەتىندە ەنگىزىلىپ، 12 جىلعا دەيىن باس بوستاندىعىنان ايىرۋ جازاسى كوزدەلدى، سونداي-اق ەركىن جايىلىمدا مالدىڭ باقىلاۋسىز بولۋىنا تىيىم سالاتىن اۋىل شارۋاشىلىق مالدارىن جايۋ قاعيدالارى بەكىتىلدى. وعان قوسا جوعارىدا اتالعان پروفيلاكتيكالىق ءىس-شارالار بار. بۇل شارالار وتكەن جىلى مال ۇرلىعىن ازايتۋعا مۇمكىندىك بەردى. ءدال وسىنداي وڭ ءۇردىس اعىمداعى جىلى دا بايقالادى. جۇمىس ساپاسىن ودان ءارى جاقسارتۋ ماقساتىندا ءىىم ازىرلەپ جاتقان 2024-2028 جىلدارعا ارنالعان قوعامدىق قاۋىپسىزدىكتى قوعاممەن سەرىكتەستىكتە قامتاماسىز ەتۋ تۇجىرىمداماسىنا اۋىل شارۋاشىلىعى مالدارىن سيفرلاندىرۋعا عانا ەمەس، سونىمەن قاتار ءاربىر جەكە مالدى سويۋعا دەيىن قاداعالاۋعا مۇمكىندىك بەرەتىن ءبىرقاتار باستامالار ەنگىزىلدى. ىشكى ىستەر مينيسترلىگى ءوز تاراپىنان قۇقىقتىق ءتارتىپتى قامتاماسىز ەتۋدى، مال ۇرلىعىنا قارسى مىندەتتەردى ورىنداۋدى ءارى قاراي جالعاستىراتىن بولادى»، – دەدى ايدوس رىسبايەۆ.