مال ۇرلادى دەگەن كۇدىكپەن جەتىسۋ تۇرعىنى ۇستالدى

كۇدىكتى ۋاقىتشا ۇستاۋ وقشاۋلاعىشىنا قاماققا الىندى.

الماتى وبلىسىنىڭ پوليسەيلەرى بىرنەشە ۇرلىققا قاتىسى بار ەر ادامدى ۇستادى، دەپ حابارلايدى Almaty-akshamy.kz.

ىشكى ىستەر مينيسترلىگىنىڭ رەسمي سايتىنداعى مالىمەت بويىنشا، پوليسياعا اقسۋ اۋدانى، تاۋسامالى اۋىلى كوشەلەرىنىڭ بىرىندە ورنالاسقان تەمىر ليۋكتىڭ ۇرلانعانى جايىندا ج ش س ءبىرىنىڭ باسشىسى ارىزدانعان. شىعىن مولشەرى 197 مىڭ تەڭگە كولەمىندە باعالانعان.

«پوليسەيلەر كۇدىكتىنىڭ ىزىنە ءتۇسىپ، ونىڭ 37 جاستاعى جەرگىلىكتى تۇرعىن ەكەنىن انىقتادى. سونىمەن قاتار تەرگەۋ امالدارى بارىسىندا كۇدىكتىنىڭ بۇدان وزگە اۋدان اۋماعىندا ورىن العان مال ۇرلىعىنىڭ ەكى دەرەگىنە قاتىستىلىعى بەلگىلى بولدى. ول ءوز كىناسىن تولىعىمەن مويىنداپ وتىر. قازىرگى تاڭدا كۇدىكتىنىڭ وزگە دە قىلمىستارعا قاتىستىلىعى تەكسەرىلۋدە. وزگە اقپارات تەرگەۋ مۇددەسىنە ساي جاريا ەتىلمەيدى»، – دەيدى اقسۋ اپب باستىعى داۋرەن ساكەنوۆ.

بۇگىندە كۇدىكتى ۋاقىتشا ۇستاۋ وقشاۋلاعىشىنا قاماققا الىندى. وعان قاتىستى ق ر قك 188-1-بابىنىڭ 3-بولىگى جانە 188-بابىنىڭ 1-بولىگى بويىنشا سوتقا دەيىنگى تەرگەۋ امالدارى جۇرگىزىلۋدە.