2025 جىلعى 16 ساۋىردەگى سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيانىڭ شەشىمىمەن اۋىل شارۋاشىلىعى جانۋارلارىنىڭ تەرىسى مەن ءجۇنىن ەكسپورتتاۋعا سالىناتىن كەدەندىك باج سالىعىن الىپ تاستاۋ ماقۇلداندى.
بۇل جەڭىلدىك ءۇش جىل مەرزىمگە ەنگىزىلىپ، كەيىن قايتا قاراۋ مۇمكىندىگى ساقتالادى، دەپ حابارلايدى aqshamnews.kz.
شەشىمنىڭ باستى سەبەبى — وندىرىلەتىن شيكىزاتتىڭ ەداۋىر بولىگى ىشكى نارىقتا سۇرانىسقا يە ەمەس. اتاپ ايتقاندا، تەرى مەن ءجۇندى وڭدەۋ جانە ەكسپورتتاۋ دەڭگەيى ءالى دە تومەن دەڭگەيدە قالىپ وتىر.
اۋىل شارۋاشىلىعى تاۋارىن وندىرۋشىلەردى ىنتالاندىرۋ جانە وڭدەۋ كاسىپورىندارىنىڭ جۇكتەمەسىن قامتاماسىز ەتۋ ماقساتىندا، وڭدەۋگە وتكىزىلگەن شيكىزاتقا سۋبسيديا بەرۋ تۇرىندە مەملەكەتتىك قولداۋ شارالارى قاراستىرىلىپ جاتىر.
تەرى مەن جۇنگە سالىناتىن ەكسپورتتىق باج سالىعىن الىپ تاستاۋ، ەڭ الدىمەن، ءىرى جانە ۇساق مال وسىرەتىن فەرمەرلەردىڭ شىعىندارى مەن قالدىقتاردى جويۋعا جۇمسالاتىن شىعىستاردى ازايتۋعا، وندىرىستىك-بولۋ تىزبەكتەرىن دامىتۋعا، وتكىزۋ نارىقتارىن كەڭەيتۋگە، سونداي-اق اۋىل شارۋاشىلىعى شيكىزاتىن ءوندىرۋشى جانە ەكسپورتتاۋشى وتاندىق كاسىپكەرلەردىڭ باسەكەگە قابىلەتتىلىگىن ارتتىرۋعا ىقپال ەتەدى.
قازىرگى تاڭدا ق ر ۇلتتىق ەكونوميكا ءمينيسترىنىڭ 2016 جىلعى 27 اقپانداعى بۇيرىعىنا سايكەس، قولدانىستاعى ەكسپورتتىق باج سالىعى مولشەرى مىناداي:
•ءىرى جانە ۇساق مال تەرىلەرى مەن باسقا دا وڭدەلمەگەن تەرىلەردىڭ ەكسپورتىنا — تونناسىنا 200 ەۋرو؛
•ءجۇن ەكسپورتىنا — 10%، ءبىراق تونناسىنا كەمىندە 50 ەۋرو.
ىشكى نارىق قاجەتتىلىگى مەن تەرى-جۇن ەكسپورتى اراسىنداعى تەڭگەرىمدى ساقتاۋ ماقساتىندا اۋىل شارۋاشىلىعى مينيسترلىگى جاعدايدى تۇراقتى باقىلاۋدا ۇستاپ وتىرادى جانە قاجەت بولعان جاعدايدا وڭدەۋ سالاسىنداعى ينۆەستيسيالىق جوبالاردى ەسكەرە وتىرىپ، ءتيىستى شارالاردى جەدەل تۇردە قابىلدايدى.