شۆەيساريا كونفەدەراسياسىنا رەسمي ساپارى اياسىندا ءماجىلىس ءتوراعاسى ەرلان قوشانوۆ بەرندە شۆەيساريا فەدەرالدى جينالىسى ۇلتتىق كەڭەسىنىڭ ءتوراعاسى ەريك نۋزباۋمەرمەن جانە شۆەيساريا كونفەدەراسياسىنىڭ فەدەرالدى كەڭەسشىسى، سىرتقى ىستەر ءمينيسترى ينياسيو كاسسيسپەن كەزدەستى.
فەدەرالدى جينالىستىڭ ۇلتتىق كەڭەسىنىڭ توراعاسىمەن كەزدەسۋدە ەرلان قوشانوۆ ەريك نۋزباۋمەرگە شۆەيسارياعا رەسمي ساپارمەن شاقىرعانى ءۇشىن العىس ايتتى. ءماجىلىس سپيكەرى شۆەيساريا قازاقستاننىڭ ەۋروپاداعى ماڭىزدى ساياسي جانە ەكونوميكالىق سەرىكتەسى ەكەنىن اتاپ ءوتتى.
– قازاقستان پرەزيدەنتى قاسىم-جومارت توقايەۆتىڭ شۆەيسارياعا 2021 جىلعى قاراشاداعى العاشقى رەسمي ساپارى ەكىجاقتى قارىم-قاتىناسىمىزدىڭ جاڭا تاراۋىن اشتى. 2021 جىلعى تامىزدا قازاقستانعا شۆەيساريا فەدەرالدى جينالىسى ۇلتتىق كەڭەسىنىڭ ءتوراعاسى رەسمي ساپارمەن كەلدى. ءبىزدىڭ بۇگىنگى ساپارىمىز ەكى ەل اراسىنداعى پارلامەنتارالىق ديالوگتى نىعايتۋعا سەپتىگىن تيگىزەدى دەپ ويلايمىز، – دەدى ءماجىلىس ءتوراعاسى.
ەرلان قوشانوۆ ءوز ارىپتەسىنە پرەزيدەنت رەفورمالارى تۋرالى ايتىپ بەردى. ول سونداي-اق VIII شاقىرىلىمداعى كوپ پارتيالى ءماجىلىس جۇمىسى، ونىڭ ىشىندە قابىلدانعان جاڭا زاڭدار تۋرالى مالىمەت بەردى. ءماجىلىس سپيكەرى قازاقستاندىق تاراپتىڭ شۆەيساريامەن قۇقىقتىق سالاداعى ىنتىماقتاستىقتى دامىتۋعا نيەتى تۋرالى ايتتى.
تاراپتار دوستىق توپتارى، كوميتەتتەر مەن پارتيالىق فراكسيالار اراسىنداعى ءوزارا ىقپالداستىقتى ودان ءارى دامىتۋ جولدارىن تالقىلادى. سونداي-اق، ساۋدا-ەكونوميكا، كولىك-لوگيستيكا، ەكولوگيا، ءبىلىم بەرۋ مەن عىلىم سالالارىندا سەرىكتەستىكتى قولداۋ ماسەلەلەرىنە ەرەكشە نازار اۋداردى. ءوز كەزەگىندە ەريك نۋزباۋمەر قازاقستاندا جۇرگىزىلىپ جاتقان رەفورمالاردىڭ ماڭىزدىلىعىن اتاپ ءوتتى.
سونىمەن قاتار پارلامەنتارالىق بايلانىستاردى تەرەڭدەتۋگە دايىن ەكەنىن جەتكىزىپ، دوستىق توپتارىنىڭ جۇمىسىن بەلسەنە جالعاستىرۋعا مۇددەلى ەكەنىن ايتتى. سونداي-اق شۆەيساريا فەدەرالدى جينالىسى ۇلتتىق كەڭەسىنىڭ ءتوراعاسى ەكى جاقتى ىنتىماقتاستىق ماسەلەلەرىن ودان ءارى دامىتۋعا دەپۋتاتتاردىڭ اتسالىساتىنىنا نازار اۋداردى.
كەزدەسۋ سوڭىندا ەرلان قوشانوۆ شۆەيساريالىق شۆينگەن بالۋاندارىن («قازاق كۇرەسىنە» ۇقساس كۇرەستىڭ ۇلتتىق ءتۇرى) استانادا وتەتىن V دۇنيەجۇزىلىك كوشپەندىلەر ويىندارىنا قاتىسۋعا شاقىردى.
شۆەيساريا كونفەدەراسياسىنىڭ سىرتقى ىستەر ءمينيسترى ينياسيو كاسسيسپەن كەزدەسۋدە ءماجىلىس ءتوراعاسى قازاقستان مەن شۆەيساريانىڭ ارىپتەستىگى ءوزارا قۇرمەت، دوستىق جانە سەنىم رۋحىندا، ونىڭ ىشىندە پارلامەنتتەر باعىتى بويىنشا نىعاياتىنىنا سەنىم ءبىلدىردى. تاراپتار ەلدەر اراسىنداعى ەكونوميكالىق بايلانىستاردى دامىتۋ دا تالقىلادى.
– قازاقستاندىق نارىق – بىرلەسكەن ينۆەستيسيالىق جوبالاردى ىسكە اسىرۋ ءۇشىن ءتيىمدى باستاپقى الاڭ. ءبىز شۆەيساريا ەرەكشە جەتىستىككە جەتكەن سالالاردا تىعىز ىنتىماقتاستىق ورناتۋعا مۇددەلىمىز. ول – ەنەرگەتيكا، قازبا بايلىقتارىن قايتا وڭدەۋ، فارماسيەۆتيكا، ماشينا جانە اسپاپ جاساۋ، تۋريزم جانە قارجىلىق قىزمەت كورسەتۋ سالالارى. قازاقستان بيزنەس جۇرگىزۋ ءۇشىن وڭتايلى جاعدايمەن قامتاماسىز ەتۋگە دايىن، – دەدى ەرلان قوشانوۆ.
ءماجىلىس سپيكەرى شۆەيساريا تاراپىنىڭ حالىقارالىق ارەناداعى قازاقستاننىڭ باستامالارىن قولداۋىن جوعارى باعالايتىنىن جانە بۇۇ الاڭىندا كانديداتۋرالاردى ءوزارا قولداۋ بويىنشا ىنتىماقتاسۋدىڭ جوعارى دەڭگەيىن اتاپ ءوتتى.
تاراپتار قازاقستان ازاماتتارى ءۇشىن شەنگەن ايماعىنىڭ ۆيزالىق رەجيمىن جەڭىلدەتۋ جانە قىلمىستىق ىستەر بويىنشا قۇقىقتىق كومەك تۋرالى ءوزارا تۇسىنىستىك جونىندە مەموراندۋم جاساسۋ ماسەلەلەرى بويىنشا دا پىكىر الماستى.