الماتىدا «ءبىرىڭعاي بەينەمونيتورينگ جۇيەسىنە» قوسىلعان بەينەكامەرالار سانى 30%-عا دەرلىك ارتادى
بۇگىندە الماتىدا «الماتى – سمارت-سيتي» تۇجىرىمداماسى اياسىندا سينگاپۋر، شانحاي، شەنچجەن سىندى مەگاپوليستەرگە ۇقساس قالانىڭ «سيفرلىق ەگىزىن» ىسكە اسىرۋعا نەگىز بولاتىن ۇلكەن دەرەكتەردى جيناۋ مەن تالداۋ ءۇشىن الماتى قالاسىنىڭ احۋالدىق ورتالىعى جوباسى جۇزەگە اسىرىلىپ جاتىر.
الماتى قالاسىنىڭ احۋالدىق ورتالىعى قالا تىرشىلىگىنىڭ بارلىق سالاسىنداعى دەرەكتەردى جيناۋعا، تالداۋعا، حالىققا اقپارات بەرۋگە جانە قالا بيلىگىنىڭ تۇرعىنداردان كەرى بايلانىس الۋعا مۇمكىندىك بەرەتىن 53 مودۋلدەن تۇرادى.
الماتى قالاسىنىڭ احۋالدىق ورتالىعىنىڭ ماقساتى سەنىمدى ءارى وزەكتى دەرەكتەر نەگىزىندە قالانىڭ الەۋمەتتىك-ەكونوميكالىق پروسەسىن باقىلاۋ، تالداۋ، جوسپارلاۋ، ونى كەيىننەن ۆيزۋاليزاسيالاۋ ءۇشىن ءبىرىڭعاي اقپاراتتىق-تالدامالىق كەڭىستىك قۇرۋ.
دەرەكتەر 50-دەن استام ۇيىمنان، سونداي-اق، مەملەكەتتىك جانە قالالىق اقپاراتتىق جۇيەلەردەن (ۇلتتىق ستاتيستيكا بيۋروسىنىڭ سايتى، «قىلمىستىق قۇقىق بۇزۋشىلىق كارتاسى»، «109-قىزمەت»، «ءبىرىڭعاي بەينە مونيتورينگ جۇيەسى»، «سەرگەك»، «وڭاي»، مەتروپوليتەن، تجد جانە ت.ب.) جينالادى.
2022 جىلدىڭ تامىزىنان باستاپ الماتىدا «ءبىرىڭعاي بەينەمونيتورينگ جۇيەسى» جوباسى قولعا الىنعان، ونىڭ باستى مىندەتى ناقتى ۋاقىت رەجيمىندە بەينە اناليتيكا قالىپتاستىرۋ ءۇشىن قالاداعى بارلىق بەينەباقىلاۋ كامەراسىن ءبىرىڭعاي پلاتفورماعا بىرىكتىرۋ.
«ءبىرىڭعاي بەينەمونيتورينگ جۇيەسى» جوباسى اياسىندا ءقازىر شاھاردا بارلىعى 38 854 بەينەكامەرا ورناتىلعان، ال 2024 جىلدىڭ سوڭىنا قاراي قوسىلعان كامەرا سانىن 50 000-عا دەيىن جەتكىزۋ، ياعني 30%-عا دەرلىك ارتتىرۋ جوسپارلانىپ وتىر.
بۇعان قوسا، 2023 جىلى الماتىدا العاش رەت بارلىق مەملەكەتتىك مەكتەپ مەن بالاباقشادا كەشەندى قاۋىپسىزدىك جۇيەسى ەنگىزىلدى. جۇيە 4 قۇرامداس بولىكتەن تۇرادى:
- سيفرلىق بەينەباقىلاۋ كامەرالارى،
- دابىل تۇيمەلەرى،
- ورتكە قارسى قاۋىپسىزدىك جۇيەلەرى،
- Face ID قوندىرعىسى بار ارنايى تۋرنيكەتتەر.
2024 جىلدىڭ سوڭىنا قاراي جۇيەمەن قالانىڭ بارلىق مەملەكەتتىك دەنساۋلىق ساقتاۋ نىسانى قامتىلادى.
ايتا كەتەتىن نارسە، ارقىندى دامۋشى وزىق تەحنولوگيالاردى ەنگىزۋ دەرەكتەردى ۇنەمى جاڭارتىپ وتىرۋدى، تاجىريبە الماسۋدى تالاپ ەتەدى. 2024 جىلدىڭ ناۋرىز ايىندا الماتى قالاسى اكىمدىگىنىڭ دەلەگاسياسى سيفرلىق تەحنولوگيا سالاسىندا كوش باستاپ تۇرعان قىتايدىڭ شەنچجەن قالاسىنا جۇمىس ساپارىمەن باردى.
ساپار اياسىندا دەلەگاسيا «شەنچجەن قالاسىنىڭ دەرەكتەردى باسقارۋ جانە مەملەكەتتىك قىزمەتتەر بيۋروسىنا»، شەنچجەندىڭ «اقىلدى قالا» تەحنولوگيالاردى دامىتۋ توبىنىڭ Data-حابىنا، سونىمەن بىرگە، لونگەن اۋدانىنداعى جەدەل دەن قويۋ ورتالىعىنا ات باسىن بۇردى. بۇل ورتالىقتاردا جاساندى ينتەللەكت ەلەمەنتتەرىن قولدانىپ، بارلىق باعىتتى بەلسەندى دامىتۋ ءۇشىن بەينەباقىلاۋ كامەرالارى، زاتتار ينتەرنەتى داچيكتەرى (IoT) جانە گەو-كەڭىستىكتىك دەرەكتەر قولدانىلادى.
اكىمدىك وكىلدەرىنە سيفرلىق ەگىزدى قالا قۇرىلىسىنا، ينجەنەرلىك ينفراقۇرىلىم مەن كولىك سالاسىندا قولدانۋدىڭ ناقتى مىسالدارى كورسەتىلدى. دەرەكتەردى جيناۋ جانە تالداۋ، مودەلدەۋ مەن ۆيزۋاليزاسيا جانە باسقارۋ جۇيەلەرىمەن بىرىكتىرۋ قوسقاندا، «سيفرلىق ەگىزدى» قۇرۋ مەن قولدانۋدىڭ تەحنيكالىق اسپەكتىلەرى كورسەتىلدى.
بۇعان قوسا، دەلەگاسيا «اقىلدى قالالار» سالاسىنداعى وزىق شەشىمدى زەرتتەۋ ءۇشىن «Inspur»، «Tencent»، «Huawei» كومپانياسىنىڭ وكىلدەرىمەن كەزدەستى. الماتى اكىمدىگىنىڭ دەلەگاسياسى شانحايدا قالانىڭ سيفرلىق ەگىز تەحنولوگياسىنا ماماندانعان «51WORLD» كاسىپورنىنىڭ وكىلدەرىمەن جۇزدەستى.
«سيفرلىق ەگىزدى» قۇرۋعا ارنالعان وزىق تەحنيكالىق قۇرالداردى قولدانۋدى كورسەتۋ، وسى سالاداعى ءوندىرۋشى كوشباسشىلارمەن ديالوگ ورناتۋ «الماتىنىڭ سيفرلىق» دامۋىنا سەرپىن بەرەدى.
سونىمەن قاتار، الماتىدان بارعان دەلەگاسيا قاتتى تۇرمىستىق قالدىقتاردى قايتا وڭدەۋ زاۋىتىنىڭ (Waste to Energy Plant) دا جۇمىسىمەن تانىستى.
اقىلدى قالالار سالاسىندا تاجىريبە الماسۋ ءۇشىن 2024 جىلدىڭ ەكىنشى توقسانىندا الماتىعا شەنچجەننەن دەلەگاسيا ساپارمەن كەلۋدى كوزدەپ وتىر.