بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بايلانىس، سيفرلاندىرۋ جانە اقپاراتتاندىرۋ سالاسىنىڭ ينۆەستيسيالىق احۋالىن ارتتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالىپ، قابىلداندى، دەپ حابارلايدى اlmaty-akshamy.kz.
قۇجات ق ر پارلامەنتى ءماجىلىسى دەپۋتاتتارىنىڭ باستاماسىمەن ازىرلەندى. زاڭ اياسىندا ءبىرقاتار تۇزەتۋ مەملەكەت باسشىسىنىڭ تاپسىرمالارىن ورىنداۋعا باعىتتالعان. ول 2024 جىلعى 29 قاڭتاردا ءبىرىنشى وقىلىمدا ماقۇلداندى.
«دەپۋتاتتار ۇسىنعان باستامالاردىڭ ىشىندە ءبىرقاتار ماڭىزدى نورمالاردى ەرەكشە اتاپ وتكىم كەلەدى. پيلوتتىق جوبا اياسىندا گەوستاسيونارلىق ەمەس سپۋتنيكتەردى (StarLink، OneWeb) پايدالانا وتىرىپ، بايلانىس تەحنولوگيالارىن ەنگىزۋ ءۇشىن ەرەكشە رەتتەۋ ەنگىزىلەدى. ىلكى جوبانىڭ قۇقىقتىق جانە تەحنيكالىق رەجيمدەرىن بايلانىس سالاسىنداعى ۋاكىلەتتى ورگان جانە ۇلتتىق قاۋىپسىزدىك كوميتەتى ايقىندايدى. بۇل شالعاي اۋىلدارداعى الەۋمەتتىك نىسانداردى ينتەرنەتپەن قامتاماسىز ەتۋگە مۇمكىندىك بەرەدى»، - دەدى ءماجىلىس دەپۋتاتى ەكاتەرينا سمىشليايەۆا.
سونىمەن قاتار، زاڭ اياسىندا مۇگەدەكتىگى بار ادامداردى قولداۋ ءۇشىن بايلانىس سالاسىنداعى ۋاكىلەتتى ورگان بايلانىس وپەراتورلارىنىڭ جەڭىلدىكتى تاريفتەر بەرۋ جونىندەگى مىندەتتەمەلەرىن بەلگىلەيدى.
«بايلانىس وپەراتورلارى ءوز جەلىلەرىندە حابارلامالاردىڭ كەڭ فورماتتى تارالاۋىن قامتاماسىز ەتۋگە مىندەتتى بولادى. ياعني، الماتى قالاسىندا بولعان سياقتى جاعدايلاردا شۇعىل sms- حابارلامالار تۋرالى ايتىپ وتىرمىز»، - دەدى دەپۋتات.
ونىڭ ايتۋىنشا، وپەراتورلار جەدەل شتابتاردىڭ قاراماعىنا ولاردىڭ سۇراۋى بويىنشا (الەۋمەتتىك سيپاتتاعى، تابيعي جانە تەحنوگەندىك سيپاتتاعى توتەنشە جاعداي تۋىنداعان كەزدە، سونداي-اق توتەنشە جاعداي ەنگىزىلگەن كەزدە) ءموبيلدى بايلانىس ستانسيالارىن ۇسىنۋعا مىندەتتى بولادى. ماسەلەن، دالا ورتتەرى ايماقتارىن بايلانىسپەن قامتاماسىز ەتۋ ەسكەرىلگەن.
«ۇلتتىق بانك جانىنداعى الاياقتىق وپەراسيالاردىڭ الدىن الۋ جونىندەگى انتيفرود ورتالىعىن قۇرۋ جانە ونىڭ جۇمىسى ءۇشىن قۇقىقتىق الاڭ قۇرىلادى. بۇدان بولەك، ناۆيگاسيالىق پلومبالار جانە تەمىرجول كولىگى ءۇشىن جۇكتەردى قاداعالاۋ جۇيەلەرى ەنگىزىلەدى»، - دەدى ە. سمىشليايەۆا.
ونىڭ سوزىنە قاراعاندا، پيلوتتىق جوبا اياسىندا تاراپتاردىڭ كەلىسىمى بويىنشا قاراپايىم ەلەكتروندىق قولتاڭبا جۇمىس ىستەي باستايدى. بۇل شارا پيلوتتىق كەزەڭدە شەتەلدىك كومپانيالار مەن ينۆەستورلاردىڭ جۇمىسى ءۇشىن ەنگىزىلەدى.
مۇنىمەن قوسا، ۆيرتۋالدى بايلانىس وپەراتورلارىنىڭ رۇقسات بەرۋ ءتارتىبى قاراستىرىلعان.
بۇگىن قابىلدانعان قۇجات اياسىندا گەوستاسيونارلىق ەمەس سپۋتنيكتىك جۇيەلەر ارقىلى بايلانىس قىزمەتتەرىن ۇسىنۋدى ليسەنزيالاۋ ءىس-شارالارىن جۇزەگە اسىرماق.
ايتا كەتەيىك، وسى اپتادا قازاقستانعا Starlink جۇيەسىنىڭ العاشقى پارتياسى جەتكىزىلدى.
«بارلىعى 20 كۇن ىشىندە 2000 جيناق كەلەدى، ولار ەلدەگى 2000 شالعايداعى اۋىل مەكتەبىن جوعارى جىلدامدىقتى ينتەرنەتپەن قامتاماسىز ەتەدى»،- دەدى ق ر سيفرلىق دامۋ، يننۆواسيالار جانە اەروعارىش ونەركاسىبى ءمينيسترى باعدات مۋسين.