سايلاۋ ناۋقانى بارىسىندا كانديداتتار سوتقا شاعىمدانىپ، 166 ارىز ءتۇسىردى، دەپ حابارلايدى اlmaty-akshamy.kz قازاقپارات-قا سىلتەمە جاساپ.
«سوتقا پارلامەنت ءماجىلىسى مەن ءماسليحاتتار دەپۋتاتتىعىنا كانديداتتاردان 166 ارىز كەلىپ ءتۇستى. ونىڭ ىشىندە جوعارعى سوتقا 55، مامانداندىرىلعان اۋدانارالىق اكىمشىلىك سوتتارعا 104 جانە اۋداندىق سوتتارعا 7 ارىز بەرىلدى. بۇگىندە سوتتا 164 ارىز-شاعىم قارالدى. ونىڭ ىشىندە 49 ءىس قاناعاتتاندىرىلدى، 84 ءىس بويىنشا قاناعاتتاندىرۋدان باس تارتىلدى، 15 تالاپ قويۋشى ارىزىن كەرى قايتارىپ الدى جانە سوت 16 ارىزدى قاراۋسىز قالدىردى»، - دەدى ورتالىق سايلاۋ كوميسسياسىنىڭ مۇشەسى اسىلبەك سماعۇلوۆ.
ونىڭ ايتۋىنشا، سايلاۋ تۋرالى كونستيتۋسيالىق زاڭنىڭ 89-بابى 4-3-تارماعىنىڭ 4-تارماقشاسىنا، 104-بابى 6-1-تارماعىنىڭ 4-تارماقشاسىنا سايكەس وكرۋگتىك سايلاۋ كوميسسياسى دەكلاراسيادا اكتيۆتەر مەن مىندەتتەمەلەر تۋرالى مالىمەتتەردىڭ دۇرىس ەمەستىگى انىقتالعان جاعدايدا كانديداتتى تىركەۋ تۋرالى شەشىم كۇشىن جويادى.
«اۋداندىق كوميسسيالاردىڭ شەشىمدەرىمەن پارلامەنت ءماجىلىسىنىڭ دەپۋتاتتىعىنا 6 كانديداتتىڭ قۇقىعى قالپىنا كەلتىرىلدى. ونىڭ ىشىندە استانا قالاسى بويىنشا 5 جانە شىمكەنت قالاسى بويىنشا بىرەۋ. سوتقا تۇسكەن 166 ارىزدىڭ 135ء-ىن دەپۋتاتتىققا كانديداتتار ۇسىنعان اكتيۆتەر مەن مىندەتتەمەلەر تۋرالى دەكلاراسيالارداعى مالىمەتتەردىڭ دۇرىس ەمەستىگى تۋرالى، سول سياقتى مەملەكەتتىك كىرىس ورگاندارىنان اقپارات ۇسىنىلعاننان كەيىن سايلاۋ كوميسسيالارى قابىلداعان كانديداتتاردى تىركەۋدىڭ كۇشىن جويۋعا قاتىستى»، - دەيدى ول.