بۇل ماسەلەنى دەپۋتات فاحريددين قاراتايەۆ قوزعادى
وسى ورايدا ۇكىمەت باسشىسىنىڭ ءبىرىنشى ورىنباسارى رومان سكلياردىڭ اتىنا ساۋال جولدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىزدىڭ دەپۋتاتتىق ساۋالىمىزعا 2014 جىلدان بەرى ىسكە اسىرىلىپ كەلە جاتقان «ماڭگىلىك ەل جاستارى – يندۋسترياعا!» - «سەرپىن – 2050» الەۋمەتتىك جوباسىن ىسكە اسىرۋ ماقساتىندا حالىقتىڭ وڭتۇستىك وڭىرىنەن جۇمىس كۇشى تاپشى سولتۇستىك وڭىرىنە قونىس اۋدارۋ كەزىندە تىكەلەي تەمىر جول باعدارىنىڭ بولماۋىنا بايلانىستى قاتىناۋ، كوشۋ تۋرالى كۇردەلى ماسەلەسى سەبەپ بولىپ وتىر. اتاپ ايتساق، اتاجۇرتقا ورالعان قانداستار كوشىن سولتۇستىككە بۇرۋ، ەلىمىزدەگى جۇمىس كۇشى ارتىق وڭىرلەردىڭ تۇرعىندارىن ەرىكتى قونىس اۋدارۋ، «سەرپىن» مەملەكەتتىك باعدارلاماسى بويىنشا وڭتۇستىك وڭىرلەرىنىڭ جاستارىن وقۋعا جىبەرۋ سىندى يگى ىستەر اتقارىلۋدا. بۇل باعدارلاما وڭىرلەردىڭ ىنتىماقتاستىعىن، ولاردىڭ تۇرعىندارىنىڭ ءوزارا قارىم-قاتىناسىن كۇشەيتىپ، تۇتاستاي العاندا، حالقىمىزدىڭ بىرلىگىن نىعايتۋعا دا وڭ ىقپالىن تيگىزىپ وتىرعاندىعى انىق»، - دەدى فاحريددين قاراتايەۆ.
وسى ورايدا ول قازاقستاندىقتاردىڭ باسىم بولىگى تەمىرجول تاسىمالى قىزمەتىن پايدالاناتىنىن ەسكە سالدى.
«ونىڭ سەبەبى پويىزدىڭ ءقاۋىپسىز كولىك ەكەندىگىنە، مارشرۋتى مەن ءجۇرىپ-تۇرۋ كەستەسىنىڭ ىڭعايلىلىعىنا جانە بيلەت قۇنىنىڭ قولجەتىمدىلىگىنا بايلانىستى. دەگەنمەن دە، شەشىمىن تاپپاي وتىرعان ماسەلە - ول سولتۇستىكتەگى قوستاناي، پاۆلودار وڭىرىنە قونىس اۋدارىپ جاتقان حالىقتىڭ قاتىناۋى وتە قيىن. اسىرەسە، كوشكەن جاستاردىڭ اتا-انالارى، قارتتارى، بالالارىمەن، جۇكتەرىمەن ءجۇرۋ قيىنعا سوعۋدا. مىسالى، حالىق تۇركىستان وبلىسىنان قوستاناي اۋماعىنا دەيىن قاتىناۋ ءۇشىن الماتى، قاراعاندى نەمەسە نۇر-سۇلتان قالالارى ارقىلى پويىزداردىڭ ۋاقىتتارى بىر-بىرىنە سايكەس كەلمەي جارتى كۇن، كەيدە ءبىر كۇن كۇتۋگە تۋرا كەلەدى. ءتىپتى كەيبىرى جەڭىل كولىك تاكسي جالداپ بارۋعا ءماجبۇر، بۇل وتە وزەكتى جانە كەزەك كۇتتىرمەس ۇلكەن ماسەلەگە اينالىپ وتىر»، - دەدى دەپۋتات.
«جوعارىداعى جاعدايلارعا تۇسىنىستىكپەن قاراي وتىرىپ، حالىقتىڭ ماسەلەسىنىڭ وزەكتىلىگىن جان-جاقتى قاراستىرىپ، جولاۋشىلارعا مۇمكىندىگىنشە جاعداي جاساپ، «سەرپىن» باعدارلاماسىنىڭ تيىمدىلىگىن ارتتىرۋ ماقساتىندا «قىزىلوردا - تۇركىستان - شىمكەنت – جامبىل، قوستاناي» باعىتىنداعى جولاۋشىلار پويىزىنىڭ اشىلۋىنا ىقپال ەتۋدى سۇرايمىز»، - دەدى ول.