قۇرىلىسقا وتاندىق ءونىم پايدالانىلماق.
قاڭتار وقيعاسىندا وتقا ورانعان الماتى اكىمدىگى عيماراتىنىڭ تازالاۋ جۇمىستارى تولىق اياقتالدى. وعان جالپى سانى 700-گە جۋىق جۇمىسشى جۇمىلدىرىلعان بولاتىن، دەپ حابارلايدى Almaty-akshamy.kz Almaty.tv سىلتەمە جاساپ.
تاريحي نىسان قايتا جوندەۋدەن وتسە دە، نەگىزگى تاريحي كەلبەتىن جوعالتپايدى دەپ وتىر ماماندار. اكىمدىك عيماراتىن تازالاۋ قاڭتاردىڭ ورتاسىندا باستالعان، ءقازىر وندا قۇرىلىس كەزەڭىنە دايىندىق ءجۇرىپ جاتىر. شاتىر جابىندىسىنىڭ نەگىزگى قاڭقاسىن الىپ تاستاپ، قۇرىلىسشىلار جارامدى-جارامسىز بولىكتەرىن انىقتاۋ ءۇشىن ارنايى كوميسسياعا تابىستاماق.
«20 قاڭتاردان باستاپ جيىرما «كاماز» قوقىس شىققان شىعار. كىرپىشتەر، تەمىرلەر، اعاشتار بار. ەندى مىنا كىرەبەرىستىڭ ءۇستىن تازالاپ جاتىرمىز»، - دەدى جۇمىسشى جۇمابەك ەسەنامانوۆ.
قۇرىلىسى 1980 جىلى باستالعان ءزاۋلىم عيماراتتا ءىرى بەس كەڭسە زالى بولعان. ولاردىڭ ءارقايسىسى تاريحي كەلبەتىن ساقتاي وتىرىپ، وزگەشە ديزاينمەن ارلەنگەن ەدى. ەڭ وكىنىشىتىسى، ولاردىڭ ءقازىر ساۋ-تامتىعى قالماعان.
قالالىق قۇرىلىس باسقارماسى وكىلدەرى الماتى اكىمدىگى عيماراتىنىڭ سىرتقى قاسبەتى اۋەلگى ارحيتەكتۋراسىنان اينىمايتىنداي ءمارماردان قاپتالادى دەپ وتىر. ال ۇسىنىلعان ماتەريالدىڭ ەكى ءتۇرىن تاڭداۋ ءۇشىن قوعامدىق كەڭەسكە سالامىز دەيدى. تاعى ءبىر ايتا كەتەتىنى، قۇرىلىسقا وتاندىق ءونىم پايدالانىلماق. ءمارمار تاستى شىمكەنت پەن باتىس قازاقستاننان اكەلگەن ەكەن.
«مۇندا جوبالىق جۇمىستار 20-25 ناۋرىزدا بىتەدى. سودان كەيىن مەملەكەتتىك ساراپتاماعا بەرەمىز. سول مەملەكەتتىك ساراپتامانىڭ ناتيجەسىن 10-15 ساۋىرگە دەيىن الامىز دەگەن سەنىمدەمىز. اگلاي پليتاسى ءوزىمىزدىڭ قازاقستاندىكى، ونىڭ ۇستىنە، ۇلگى ءۇشىن شىمكەنتتەگى بەسقۇدىق وڭىرىنەن تاعى پليتالار الدىردىق. پليتالاردى ارنايى جۇيەلەرگە بەكىتۋىمىز كەرەك، سوندىقتان ءبىرشاما وزگەرىستەر بولادى»، - دەدى جايلى قالالىق ورتا باسقارماسى باسشىسىنىڭ ورىنباسارى سايلاۋ باينازاروۆ.