ازىرلەنگەن زاڭ جوباسىنىڭ ماقساتى جەر زاڭناماسىن جەتىلدىرۋ بولىپ تابىلادى.
ق ر پارلامەنتى ءماجىلىسىنىڭ دەپۋتاتتارى پلەنارلىق وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ءبىرىنشى وقىلىمدا ماقۇلدادى، دەپ حابارلايدى Almaty-akshamy.kz اۋىل شارۋاشىلىعى مينيسترلىگىنىڭ باسپا ءسوز قىزمەتىنە سىلتەمە جاساپ.
قۇجاتتى ق ر اۋىل شارۋاشىلىعىنىڭ ءبىرىنشى ۆيسە-مينيسترى ايداربەك ساپاروۆ تانىستىردى. ول ازىرلەنگەن زاڭ جوباسىنىڭ ماقساتى – جەر زاڭناماسىن جەتىلدىرۋ، اۋىل شارۋاشىلىعى ماقساتىنداعى جەرلەردى جالعا بەرۋ ينستيتۋتىن رەتتەۋ جانە جەردى پايدالانۋ مەن قورعاۋعا مەملەكەتتىك باقىلاۋدى كۇشەيتۋ دەپ اتاپ ءوتتى.
«زاڭ جوباسىندا قازاقستاندىقتار مەن قازاقستاندىق زاڭدى تۇلعالارعا اۋىل شارۋاشىلىعى ماقساتىنداعى جەرلەردى 49 جىلعا دەيىنگى ۇزاق مەرزىمدى جالعا بەرۋ، جالداۋ مەرزىمى اياقتالعاندا، ونىڭ مەرزىمىن قايتادان ۇزارتۋدىڭ باسىم قۇقىعى، جەر پايدالانۋشىلار اراسىندا اۋىل شارۋاشىلىعى ماقساتىنداعى جەردى پايدالانۋ قۇقىعىن مەملەكەتتەن ساتىپ الماي يەلىكتەن شىعارۋ قاراستىرىلادى. بۇل رەتتە پايدالانۋ مەرزىمى كەمىندە 5 جىل جانە جەر قاتىناستارى جونىندەگى ۋاكىلەتتى ورگاندى حاباردار ەتۋگە مىندەتتى بولادى»، - دەدى زاڭ جوباسىن دەپۋتاتتارعا تانىستىرعان ءبىرىنشى ۆيسە-مينيستر.
بۇدان بولەك، وبلىستاردىڭ، رەسپۋبليكالىق ماڭىزى بار قالالاردىڭ، استانانىڭ اۋماقتىق بولىمشەلەرى قۇرىلىپ، جەردى پايدالانۋ مەن قورعاۋدىڭ مەملەكەتتىك باقىلاۋ قىزمەتتەرى ورتالىق ۋاكىلەتتى ورگان ۆەدومستۆوسىنا قايتارىلاتىن بولدى.
سونىمەن بىرگە، زاڭ جوباسىندا «باۋ-باقشا شارۋاشىلىعىنا» جانە «ساياجاي قۇرىلىسىنا» اۋىل شارۋاشىلىعى ماقساتىنداعى جەرلەردىڭ نىسانالى ماقساتىن وزگەرتۋگە تىيىم سالۋ، اۋىل شارۋاشىلىعى ماقساتىنداعى جەرلەردى جەكە مەنشىككە بەرۋ جونىندەگى ءموراتورييدىڭ مەرزىمىن 2026 جىلدىڭ 31 جەلتوقسانىنا دەيىن ۇزارتۋ، بەرىلگەن اۋىل شارۋاشىلىعى ماقساتىنداعى جەر ۋچاسكەلەرى تۋرالى مالىمەتتەردى اشىق ءارى قولجەتىمدى بولۋ ءۇشىن مەملەكەتتىك جەر كاداسترى اۆتوماتتاندىرىلعان اقپاراتتىق جۇيەسىنىڭ ينتەرنەت-رەسۋرسىندا جاريالاۋ ماسەلەلەرى قاراستىرىلعان.
ايداربەك ساپاروۆ ازىرلەنگەن زاڭ جوباسىن قابىلداۋ ناتيجەسىندە جالعا الىنعان اۋىل شارۋاشىلىعى ماقساتىنداعى جەرلەردى ەكونوميكالىق اينالىمعا تارتىلاتىنىن، جەرگىلىكتى حالىقتىڭ جايىلىمدىق جەرلەرگە دەگەن قاجەتتىلىگىن قاناعاتتاندىرىلاتىنىن، اۋىل شارۋاشىلىعى ماقساتىنداعى جەر ۋچاسكەلەرى بويىنشا اقپاراتتىڭ قولجەتىمدىلىگى مەن اشىقتىعى قامتاماسىز ەتىلىپ، الەۋمەتتىك-ەكونوميكالىق تۇرعىدان ءتيىمدى بولاتىنىن ايتتى.
«ءسوز جوق، جەر زاڭناماسىنا تالقىلانعان تۇزەتۋلەردى ەنگىزۋ اگروونەركاسىپ كەشەنىن تۇراقتى دامىتۋعا بەرىك نەگىز بولادى. ويتكەنى، جەر ماسەلەلەرى – اۋىل شارۋاشىلىعى ەكونوميكاسىن دامىتۋدىڭ نەگىزگى فاكتورى. ەل پرەزيدەنتى ۇكىمەت الدىنا ءبىرقاتار مىندەتتەر قويدى. ول مىندەتتەردى ءبىز اگروونەركاسىپ كەشەنىن دامىتۋدىڭ 10 جىلعا ارنالعان ۇزاق مەرزىمدى تۇجىرىمداماسىن جانە اوك دامىتۋ جونىندەگى 2021-2025 جىلدارعا ارنالعان ۇلتتىق جوبانى قابىلداۋ ارقىلى ىسكە اسىرۋدى جوسپارلاپ وتىرمىز»، - دەدى ءبىرىنشى ۆيسە-مينيستر ايداربەك ساپاروۆ.