قىزمەتىن ۇزدىك اتقارعان اۋداندار مەن قالالاردىڭ اكىمدىكتەرىنە ءبىرقاتار كوممۋنالدىق تەحنيكا سىيعا تارتىلدى.
وبلىس اكىمىنىڭ ءبىرىنشى ورىنباسارى ءلاززات تۇرلاشوۆتىڭ توراعالىعىمەن ونلاين رەجيمدە اكىمدىك وتىرىسى ءوتىپ، وندا 2020-2021 جىلدارداعى جىلىتۋ ماۋسىمىنىڭ قورىتىندىسى جانە الداعى جاڭا جىلىتۋ ماۋسىمىنا دايىندىق بارىسى قارالدى، دەپ حابارلايدى Almaty-akshamy.kz ايماق باسشىسىنىڭ باسپا ءسوز قىزمەتىنە سىلتەمە جاساپ.
الدىمەن وبلىستىق ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسىنىڭ باسشىسى باعلان تانەكەنوۆ بايانداما جاسادى.
بايانداماشىنىڭ ايتۋىنشا، وتكەن جىلىتۋ ماۋسىمىنا دايىندىققا جانە ونى وتكىزۋگە بيۋدجەتتەن 15،4 ملرد. تەڭگە بولىنگەن. جىلىتۋ ماۋسىمىنىڭ ساپالى جۇرگىزىلۋى ءۇشىن 35 قازاندىقتىڭ نەگىزگى جانە قوسالقى جابدىقتارى، 64،3 شاقىرىم جىلۋ جەلىسى، 13،7 مىڭ شاقىرىم ەلەكتر جەلىسى جانە ءارتۇرلى كەرنەۋدەگى 3016 ترانسفورماتورلىق قوسالقى ستانسيالار جوندەلگەن. بۇگىنگى كۇنى وبلىس بويىنشا جىلۋمەن جابدىقتاۋدى 35 ورتالىقتاندىرىلعان قازاندىق جۇزەگە اسىرسا، سونىڭ 16-سى كومىرمەن، گازبەن، 3-ەۋى مازۋتپەن جۇمىس ىستەيدى.
2020 جىلى جىلۋمەن جابدىقتاۋدىڭ 16 جوباسى ىسكە اسىرىلىپ، وعان 7 ملرد. تەڭگە بولىنگەن. سونىڭ ىشىندە 3،7 ملرد. تەڭگەسى «جۇمىسپەن قامتۋ جول كارتاسى 2020» باعدارلاماسى ارقىلى قارالعان. باعلان تانەكەنوۆ ءوز سوزىندە قازاندىقتاردى گازعا اۋىستىرۋ، بلوكتى-مودۋلدى قازاندىقتار ورناتۋ ىستەرىنىڭ جۇيەلى ءجۇرىپ جاتقانىن دا ايتتى.
سونىمەن قاتار كەيبىر تەحنولوگيالىق زاڭ بۇزۋشىلىقتار، حالىقتى ەلەكتر ەنەرگياسىمەن، سۋمەن جانە ورتالىق جىلۋمەن ۇزدىكسىز قامتاماسىز ەتۋدەگى ءبىرقاتار پروبلەمالارعا دا توقتالدى. ماسەلەن، وتكەن جىلىتۋ ماۋسىمى كەزەڭىندە الاكول، ەڭبەكشىقازاق، ىلە، تالعار اۋداندارى مەن تالدىقورعان، قاپشاعاي قالالارىنىڭ تۇرعىندارىنان پاتەرلەردەگى تەمپەراتۋرانىڭ تومەندىگىنە قاتىستى شاعىمدار تۇسكەن.
«سوندىقتان كەمشىلىكتەردى بولدىرماس ءۇشىن، اۋدان، قالا اكىمدىكتەرى جىلىتۋ ماۋسىمىنا دايىندىق جۇمىستارىن كۇشەيتىپ، ساپالى جانە ۋاقتىلى دايىندىق جۇرگىزۋى كەرەك. كوممۋنالدىق كاسىپورىندار مەن بيۋدجەتتىك سەكتورعا قاجەتتى وتىن مولشەرى الدىن الا دايىندالۋى ءتيىس. كونكۋرستىق راسىمدەردى اياقتاپ، جازعى ۋاقىتتا تاسىمالداۋدى قامتاماسىز ەتۋ كەرەك. دەنساۋلىق ساقتاۋ وبەكتىلەرىن قوسىمشا سىيىمدىلىقپەن قامتاماسىز ەتۋ قاجەت. كوممۋنالدىق جانە يەسىز ەلەكتر جۇيەلەرىنە شۇعىل تۇردە قۇقىق بەلگىلەيتىن قۇجاتتاردى دايىنداپ، ولاردى ەنەرگيا بەرۋشى ۇيىمداردىڭ بالانسىنا وتكىزۋ قاجەت»، - دەدى باعلان تانەكەنوۆ.
سول سياقتى الداعى 2021-2022 جىلدارداعى جىلىتۋ ماۋسىمىنا دايىندىق شارالى جايلى دا باياندادى. ماسەلەن، 2021-2022 جىلدارداعى جىلىتۋ ماۋسىمىنا بيۋدجەتتەن 13،7 ملرد.تەڭگە قاراستىرىلعان. ال جىلۋمەن جابدىقتاۋدىڭ 4 جوباسىن ىسكە اسىرۋعا 3،26 ملرد.تەڭگە بولىنگەن. بيۋدجەتتىك ۇيىمدار ءۇشىن 25،1 مىڭ توننا كومىر، 4،6 مىڭ توننا پەللەت جانە 25،9 ملن. ليتر ديزەل وتىنى ساتىپ الىنادى. جىلىتۋ ماۋسىمى باستالعانعا دەيىن تالدىقورعان قالاسىنىڭ 2 قازاندىعىن گاز جۇيەسىنە اۋىستىرۋ جوسپارلانۋدا، وعان وبلىستىق بيۋدجەتتەن 2،6 ملرد.تەڭگە ءبولىندى.
باسقارما باسشىسىنىڭ مالىمەتىنە سۇيەنسەك، بۇگىنگى كۇنگە وبلىستا تابيعي گازعا 1،2 ملن. ادام قول جەتكىزە الادى. بيىلعى جىلى بيۋدجەت ەسەبىنەن 19 ەلدى مەكەندى گازداندىرۋ جوسپارلانىپ، وعان 6،4 ملرد. تەڭگە بولىنگەن.
نەگىزگى حابارلامادان كەيىن اۋدان، قالالارداعى جىلىتۋ ماۋسىمىنا دايىندىق ماسەلەلەرى جونىندە تالدىقورعان قالاسى اكىمىنىڭ ورىنباسارى اسقار بەگمانوۆ، تەكەلى قالاسى اكىمىنىڭ ورىنباسارى ەلدوس مىرزابەك، وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى ارمان جانسەڭگىروۆ ءسوز الىپ، ءمان-جايدى باياندادى.
اكىمدىك وتىرىسىنىڭ سوڭىندا وتكەن جىلعى جىلىتۋ ماۋسىمىنىڭ قورىتىندىسى شىعارىلىپ، ۇزدىكتەرگە سىي-سياپات كورسەتىلدى. اتاپ ايتقاندا، كەگەن اۋدانىنا وبلىس اكىمىنىڭ 1ء-شى دارەجەلى ديپلومى مەن جۇك تيەگىش تەحنيكا، تالعار اۋدانىنا ءىى دارەجەلى ديپلوم جانە قوقىس شىعاراتىن كولىك، ال ءۇشىنشى ورىنعا يە بولعان وڭىرلەر رەتىندە ەڭبەكشىقازاق جانە ۇيعىر اۋداندارى اتالىپ، ولارعا دا ارنايى ديپلومدار مەن تراكتورلار بەرىلگەنى ايتىلدى.
«وتكەن جىلدىڭ جىلىتۋ ماۋسىمى ۋاقىتىندا قابىلدانعان شارالاردىڭ ارقاسىندا شتاتتىق رەجيمدە ءوتتى. ەندى الدا كەلەسى جىلىتۋ كەزەڭىنە دايىندىقتى جەدەلدەتۋ مىندەتى تۇر. اسىرەسە، بيۋدجەتتىك سالا نىساندارىنا ديزەل وتىنىنىڭ دەر كەزىندە تولىق كولەمدە جەتكىزىلۋى باستى نازاردا بولۋى كەرەك. جىلىتۋ ماۋسىمى باستالعانعا دەيىن بيۋدجەتتىك سالا نىساندارىندا قازاندىقتاردى گازعا اۋىستىرۋ، جاڭعىرتۋ جانە شىعارۋ جۇمىستارى دا اياقتالۋى ءتيىس. ەنەرگەتيكا جانە تۇرعىن ۇي-كوممۋنالدىق شارۋاشىلىق باسقارماسى، قاراساي، ەڭبەكشىقازاق، پانفيلوۆ، ۇيعىر اۋداندارىنىڭ اكىمدەرى، كۇزگە دەيىن 36 بلوكتى-مودۋلدى قازاندىقتى ورناتىپ، مۇلىك يەلەرىنىڭ بىرلەستىگىن قۇرىڭىزدار. بارلىق اۋدان، قالالاردا كوپ پاتەرلى تۇرعىن ۇيلەردىڭ ىشكى جىلۋ جەلىلەرىنىڭ دايىندىعىن قامتاماسىز ەتىڭىزدەر. جاڭا جىلىتۋ ماۋسىمىن ۇزدىكسىز وتكىزۋ دايىندىق جۇمىستارىنىڭ ۋاقىتىلى، ساپالى جۇرگىزىلۋىنە تىكەلەي بايلانىستى ەكەنىن ۇمىتپاڭىزدار»، – دەدى وبلىس اكىمىنىڭ ءبىرىنشى ورىنباسارى ءلاززات تۇرلاشوۆ جيىندى قورىتىندىلاپ.