قازاق ءتىلى قوعامنىڭ ىنتىماق، بىرلىگىنىڭ ۋىعى، ەلدىڭ كونسوليداسيانىڭ تىرەگى بولۋى ءتيىس - ەرلان سايروۆ
بۇگىن ءماجىلىستىڭ جالپى وتىرىسىندا دەپۋتات ەرلان سايروۆ ق ر پرەمەر-مينيسترىنىڭ ورىنباسارى ەرالى توعجانوۆقا قازاق ءتىلىن ۇيرەنۋگە قاتىستى ساۋال جولدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى وتە كۇردەلى گەوساياسي جاعداي ەلىمىزدىڭ ىشكى ساياساتىنىڭ كوپتەگەن اسپەكتىلەرىن قايتا قاراۋدى تالاپ ەتەدى. وسىناۋ تەرەڭ ماسەلەنىڭ ءبىرى - ءتىل ساياساتى، ونىڭ ىشىندە مەملەكەتتىك ءتىلدى ۇيرەنۋ پروبلەماسى. مەملەكەتتىك ءتىلدى ۇيرەتۋ، وعان باۋلۋ ىجداھاتتى تۇردە بولا وتىرىپ، ءوزارا سىيلاستىق پەن باۋىرلاستىققا اكەلۋى قاجەت. مەملەكەتتىك ءتىل قوعامنىڭ ىنتىماعىنىڭ، بىرلىگىنىڭ سيمۆولىنا اينالۋى، وسى تۇرعىدا، مەملەكەتتىك ءتىلدى ۇيرەتۋدىڭ باعدارلامالارىنىڭ تيىمدىلىگى، ءتىل ۇيرەنۋشىلەرگە ناقتى كومەك جاساۋعا قابىلەتتىلىگى تۇرعىسىنان اۋديت جۇرگىزۋ وتە ماڭىزدى»، - دەدى ءماجىلىس دەپۋتاتى.
ونىڭ اتاپ وتۋىنشە، AMANAT پارتياسى سايلاۋالدى باعدارلاماسىندا مەملەكەتتىك ءتىلدى دامىتۋعا باسا نازار اۋدارىلعان. سوندىقتان، مەملەكەتتىك ءتىلدى ۇيرەتۋگە باعىتتالعان قارجى قايدا، قالاي جۇمسالىپ جاتىر؟ مەملەكەتتىك ءتىلدى ۇيرەتۋگە باعىتتالعان وقۋ-ۇيرەتۋ باعدارلامالارىنىڭ تيىمدىلىگى جونىندە قانشا ادام ۇيرەنىپ شىقتى، قانشا ادام تىلدىك ءبىرىنشى، ەكىنشى ساتىعا وتكەندىگى جونىندە ساراپتاما جاساۋ قاجەت. ەرىكتى ازاماتتاردىڭ قازاق ءتىلىن ۇيرەنەمىن دەۋشىلەرگە ادىستەمەلىك ءتاسىل جاعىنان كومەكتەسۋگە قابىلەتتى باعدارلامالارىن مەملەكەتتىك ورگاندار قانشالىقتى ءتيىمدى قولدانۋدا؟ وسى ماسەلەلەر بويىنشا ۇكىمەتتىڭ قۇزىرلى ورگاندارىنىڭ قوعام الدىندا ەسەپ بەرۋىن سۇرايمىز»، - دەدى ول.
دەپۋتات مەملەكەتتىك ءتىلدى دامىتۋدىڭ ارعى جاعىندا ەل مەن جەر ماسەلەسى تۇرعانىنا باسا نازار اۋداردى.
«مەملەكەت مىعىم بولۋى ءۇشىن انا ءتىلىمىز اسقاقتاۋى ماڭىزدى. قازاق ءتىلى قوعامنىڭ ىنتىماق، بىرلىگىنىڭ ۋىعى، ەلدىڭ كونسوليداسيانىڭ تىرەگى بولۋى ءتيىس. وسى ماسەلە بويىنشا شەشىم قابىلداپ، قاراۋ ناتيجەلەرىن زاڭدا كورسەتىلگەن مەرزىمدە حابارلاۋدى سۇرايمىز»، - دەدى ەرلان سايروۆ.